Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 6:1-23

HAAPOTORAA O TE MAU TUMU PARAU

  • Oraraa apî na roto i te bapetizoraa i roto i te Mesia (1-11)

  • Eiaha e vaiiho i te hara ia mana i roto i to outou tino (12-14)

  • Tîtî no te hara na mua ’‘e, tavini na te Atua i teie nei (15-23)

    • Pohe, ta te hara ïa e aufau. Ora, ta te Atua ïa ô (23)

6  Eaha ïa te parau? E rave noa anei tatou i te hara ia rahi atu â te Atua i te faaite mai i to ’na hamani maitai rahi?  Eiaha roa ’tu! Mai te huru ra e ua pohe tatou e ua tiamâ mai i te hara, e ere ïa i te mea tano ia rave noa tatou i te hara.  Aita anei outou i ite e, tatou paatoa tei bapetizohia i roto i te Mesia ra o Iesu, ua bapetizohia ia apiti atoa tatou i to ’na pohe?*  No reira, ua hunahia tatou e o ’na atoa na roto i to tatou bapetizoraahia i roto i to ’na pohe, mai te Mesia atoa ra hoi i faatia-faahou-hia mai te pohe mai na roto i te puai hanahana o te Metua, e tia atoa ïa ia tatou ia ora i te hoê oraraa apî.  Mai te peu e ua hoê tatou e o ’na i te huru o to ’na pohe, mea papu e e hoê atoa ïa tatou e o ’na i te huru o to ’na tia-faahou-raa.  Ua ite hoi tatou e ua patitihia to tatou huru taata tahito ra i nia i te pou e o ’na atoa ia ore to tatou tino hara ia haavî faahou ia tatou, e ia ore tatou ia riro faahou ei tîtî no te hara.  Te taata hoi tei pohe, ua matara ïa oia i ta ’na hara.*  Hau atu â, i te mea ua pohe tatou e te Mesia, te tiaturi nei ïa tatou e e ora atoa tatou e o ’na.  Ua ite hoi tatou e eita te Mesia e pohe faahou e aita to te pohe e mana faahou i nia ia ’na, i te mea hoi ua faatia-faahou-hia oia mai roto mai i te feia pohe. 10  Ua pohe hoi oia no te faaore i te hara, hoê roa poheraa, ua ora râ oia no te Atua. 11  Outou atoa, a hi‘o ia outou iho mai te mea ra e ua pohe outou e ua tiamâ mai i te hara, tera râ, te ora ra outou no te Atua na roto i te Mesia ra o Iesu. 12  No reira, eiaha outou e vaiiho faahou i te hara ia mana ei arii i roto i to outou tino pohe a rave ai outou i te mau hinaaro o te tino. 13  Eiaha atoa e pûpû faahou i to outou tino* no te hara ei mauhaa no te mau ohipa iino. Tera râ, e pûpû i to outou tino* i te Atua ei mauhaa no te mau ohipa tia, e e pûpû ia outou iho i te Atua mai te taata ora ra no roto mai i tei pohe. 14  Eiaha roa ’tu hoi te hara ia mana i nia ia outou, i te mea e aita outou i raro a‘e i te ture, i raro a‘e râ i te hamani maitai rahi o te Atua. 15  Te auraa anei ïa e e rave tatou i te hara no te mea aita tatou i raro a‘e i te ture, i raro a‘e râ i te hamani maitai rahi o te Atua? E ere roa ’tu! 16  Aita anei outou i ite? Ia pûpû outou ia outou iho i te tahi taata ei tavini auraro, e tavini ïa outou no taua taata ra ta outou e auraro, no te hara anei e aratai i te pohe aore ra no te auraro e aratai i te parau-tia. 17  Ia haamauruuruhia râ te Atua no te mea e, na mua ’‘e ei tîtî outou no te hara, i teie nei râ, te auraro nei outou i te Atua ma te aau tae e te pee nei outou i ta ’na mau haapiiraa. 18  Oia mau, i te mea e ua faatiamâhia outou i te hara, ua riro ïa outou ei tavini no te parau-tia. 19  No te paruparu o to outou tino hara, te parau nei au i te mau parau ta te taata e taa. Mai ia outou hoi i pûpû na i to outou tino ei tîtî no te mau mea viivii e te ino atoa no te rave i te mea ino, i teie nei râ, ia pûpû ïa outou i to outou tino ei tavini no te parau-tia no te rave i te mea mo‘a. 20  A vai tîtî noa ’i hoi outou no te hara, aita outou i faahepohia ia rave i te mea tia. 21  Teihea hoi hotu ta outou i faatupu i taua tau ra? E mau mea ana‘e ïa ta outou e haama ra i teie nei. O te pohe hoi te hopea o te reira. 22  Tera râ, i te mea e ua faatiamâhia outou i te hara e ua riro outou ei tavini na te Atua, te faatupu ra ïa outou i te hotu ia au i te mea mo‘a, e o te ora mure ore te hopea o te reira. 23  Ta te hara hoi e aufau mai i te taata, o te pohe ïa. Area te ô ta te Atua e horoa mai, o te ora mure ore ïa na roto i te Mesia ra o Iesu, to tatou Fatu.

Nota i raro i te api

“Ua bapetizohia ïa i roto i to ’na pohe” na roto i te reo Heleni.
Aore ra “ua faaorehia ta ’na hara.”
“To outou mau mero” na roto i te reo Heleni.
“To outou mau mero” na roto i te reo Heleni.