Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 5:1-21

HAAPOTORAA O TE MAU TUMU PARAU

  • Ua hau e te Atua na roto i te Mesia (1-11)

  • Pohe na roto ia Adamu, ora na roto i te Mesia (12-21)

    • Ua raea te taata atoa i te hara e te pohe (12)

    • Ohipa tia hoê (18)

5  No reira, i te mea e no te faaroo i faarirohia ’i tatou ei taata parau-tia, e oaoa ana‘e ïa i te hau* e te Atua na roto i to tatou Fatu o Iesu Mesia,  mea na roto hoi ia ’na e maoti te faaroo i noaa atoa ’i ia tatou teie hamani maitai rahi e vai nei ia tatou. E e oaoa ana‘e* no te tiaturiraa e e horoahia mai te hanahana o te Atua.  Oia atoa râ, e oaoa ana‘e* a roohia ’i i te ati, ua ite hoi tatou e no te ati e tupu ai te faaoromai tamau,  e no te faaoromai tamau, te farii maitai ïa o te Atua, e no te farii maitai o te Atua, te tiaturiraa ïa,  e eita te tiaturiraa e faatupu i te haama, no te mea ua î to tatou aau i te here o te Atua na roto i te varua mo‘a tei horoahia mai ia tatou.  Oia hoi, a vai paruparu noa ’i tatou, ua pohe te Mesia no te feia hara i te taime faataahia.  Mea varavara te taata e hinaaro e pohe no te hoê taata parau-tia, area no te hoê taata maitai, ua ineine paha ïa i te pohe no ’na.  Tera râ, te faaite mai ra te Atua i to ’na here ia tatou i te mea e ua pohe te Mesia no tatou a vai taata hara noa ’i tatou.  Hau atu â, i te mea e ua faarirohia tatou i teie nei ei taata parau-tia i to ’na toto, e faaora-atoa-hia ïa tatou i te riri o te Atua na roto ia ’na. 10  Mai te peu hoi e, a vai enemi noa ’i tatou, ua faatupu te Atua i te hau e o tatou na roto i te pohe o ta ’na Tamaiti, eaha ’tu â ïa i teie nei ua hau tatou e te Atua, mea papu ïa e e faaorahia tatou maoti te ora o Iesu. 11  Oia atoa râ, te oaoa atoa nei tatou e te Atua na roto i to tatou Fatu o Iesu Mesia, mea na roto ia ’na i hau ai tatou e te Atua i teie nei. 12  No reira, mai te hara i ô mai i te ao nei na roto i te taata hoê ra e te pohe na roto i te hara, e ua raea roa ïa te mau taata atoa i te pohe no te mea ua hara ratou paatoa . . . 13  I vai na hoi te hara i roto i teie nei ao hou te ture a Mose, eita râ te hoê taata e parihia i te rave i te hara aita ana‘e e ture. 14  Noa ’tu râ, ua mana te pohe ei arii i nia i te taata mai ia Adamu mai â e tae roa ia Mose, i nia atoa i te feia aita i hara mai ia Adamu i faaroo ore, o Adamu hoi te au te huru i to te taata i tiaihia na. 15  Te maitai e noaa mai i te ô, e ere ïa hoê â huru e te utua e noaa mai i te hara. Mea na roto hoi i te hara a te taata hoê ra i pohe ai e rave rahi. Mea hau ê râ te hamani maitai rahi a te Atua e ta ’na ô horoa-noa-hia mai, e e rave rahi taata te fana‘o i te reira. Ua horoahia mai teie ô e te hamani maitai rahi atoa na roto i te taata hoê ra o Iesu Mesia. 16  Oia atoa, te maitai e noaa mai i te ô horoa-noa-hia mai, e ere ïa hoê â huru e te utua e noaa mai i te hara a te taata hoê ra. No te hara hoê ra i faautuahia ’i te taata atoa, area no te ô i horoa-noa-hia mai no te hara e rave rahi i faarirohia ’i te taata e rave rahi ei taata parau-tia. 17  Mea na roto i te hara a te taata hoê ra i mana ’i te pohe ei arii i nia i te taata atoa. Mea hau ê râ te hamani maitai rahi e te ô horoa-noa-hia mai. O te fana‘o i taua nau mea ra, e ora e e faatere ïa ratou ei arii na roto i te taata hoê ra o Iesu Mesia. 18  Mea na roto hoi i te hara hoê ra i faautuahia ’i te mau huru taata atoa, oia atoa mea na roto i te ohipa tia hoê ra* i faarirohia ’i te mau huru taata atoa ei taata parau-tia no te ora. 19  E mea na roto hoi i te faaroo ore o te taata hoê ra i faarirohia ’i e rave rahi ei feia hara, oia atoa mea na roto i te faaroo o te taata hoê ra e faarirohia ’i e rave rahi ei taata parau-tia. 20  Ua horoa mai te Atua i te ture a Mose ia taa i te taata te rahi o ta ratou mau hara. Teie râ, rahi noa ’tu te hara a te taata, hau roa ’tu â te Atua i te faaite i to ’na hamani maitai rahi. 21  No te aha hoi? Mai te hara e te pohe i mana ei arii i nia i te taata, ia nehenehe atoa ïa te hamani maitai rahi e mana ei arii na roto i te parau-tia e aratai ra i te ora mure ore na roto ia Iesu Mesia to tatou Fatu.

Nota i raro i te api

Nehenehe atoa e hurihia “ia vai hau tatou.”
Nehenehe atoa e hurihia “ia oaoa tatou.”
Nehenehe atoa e hurihia “ia oaoa tatou.”
Aore ra “ohipa faatia hoê ra.” Oia hoi te hoê ohipa te faariro i te taata ei taata parau-tia.