Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 4:1-25

HAAPOTORAA O TE MAU TUMU PARAU

  • Faarirohia Aberahama ei taata parau-tia na roto i te faaroo (1-12)

    • Aberahama, te metua no te feia i faatupu i te faaroo (11)

  • Parau fafau i noaa na roto i te faaroo (13-25)

4  No reira, eaha ïa ta tatou e nehenehe e parau i tei noaa ia Aberahama, to tatou tupuna?  Ahani hoi ua faarirohia Aberahama ei taata parau-tia no ta ’na i rave, e riro ïa te reira ei haapeuraa na ’na, eiaha râ i te aro o te Atua.  Te nahea mai ra hoi te parau i papaihia? “Ua faatupu Aberahama i te faaroo ia Iehova* e ua faarirohia oia ei taata parau-tia.”  No te taata hoi e rave ra i te ohipa, e ere te moni e aufauhia ’tu na ’na i te mea horoa-noa-hia mai, e moni* râ tei au i ta ’na ohipa.  Area te taata aita e rave ra i te ohipa, o te faatupu râ i te faaroo i te Atua o te faariro i te taata hara ei taata parau-tia, e riro ïa to ’na faaroo ei parau-tia na ’na.  Ua parau atoa Davida no nia i te oaoa o te taata ta te Atua i faariro ei taata parau-tia, noa ’tu e aita ta ’na mau ohipa e tu roa ra i te ture:  “E oaoa te feia tei faaorehia ta ratou mau ohipa iino e tei tapo‘ihia* ta ratou mau hara,  e oaoa te taata ta Iehova* e ore e haamana‘o faahou i ta ’na hara.”  O vai te oaoa? Te feia noa anei i peritomehia, aore ra te feia atoa i ore i peritomehia? Te parau nei hoi tatou: “Ua faarirohia Aberahama ei taata parau-tia no to ’na faaroo.” 10  Afea to ’na faariroraahia ei taata parau-tia? Ua peritome-a‘ena-hia anei oia aore ra aita? Aita â oia i peritomehia ’tura i to ’na faariroraahia ei taata parau-tia. 11  Ua haamau te Atua i te peritomeraa ei tapao, ei haapapuraa i te parau-tia* o Aberahama no to ’na faaroo a vai peritome-ore-hia ’i. Ua riro ïa oia ei metua no te feia atoa i faatupu i te faaroo noa ’tu aita ratou i peritomehia, ia faarirohia ratou ei taata parau-tia. 12  Ua riro atoa ïa Aberahama ei metua, eiaha noa no te feia peritomehia, no te feia atoa râ e pee maite ra i te faaroo o to tatou metua o Aberahama a vai peritome-ore-hia ’i oia. 13  E ere hoi mea na roto i te ture i noaa ’i ia Aberahama aore ra i to ’na huaai* te parau fafau e e riro oia ei fatu no te hoê ao,* mea na roto râ i to ’na parau-tia maoti te faaroo ta ’na i faatupu. 14  Ahani hoi o te feia ana‘e e haapao ra i te ture o te fatu i taua ao ra, e mea faufaa ore ïa te faaroo e ua faaorehia te parau fafau. 15  No te ture a Mose e tupu ai te riri o te Atua, aita ana‘e râ e ture, aita atoa ïa e ofatiraa ture. 16  No reira, mea na roto i te faaroo, ia au i te hamani maitai rahi o te Atua, e noaa iho â ’i tei fafauhia i to ’na huaai* taatoa, eiaha noa i te feia e haapao ra i te ture a Mose, i te feia atoa râ e pee ra i te faaroo o Aberahama, te metua no tatou paatoa. 17  (Mai tei papaihia: “Ua faariro vau ia oe ei metua no te nunaa e rave rahi.”) Ua tupu te reira i te aro o te Atua ta Aberahama i tiaturi, te Atua hoi tei faaho‘i mai i te feia pohe i te ora e tei fafau i te mau parau aita â i tupu atura mai te huru ra e ua tupu ê na. 18  Noa ’tu e aita e tumu e tiaturi ai, no to ’na râ faaroo i tiaturi noa ’i Aberahama e e riro mau oia ei metua no te nunaa e rave rahi ia au i tei parauhia: “E riro to oe huaai* mai tera te rahi.” 19  Noa ’tu e aita to ’na faaroo i paruparuhia, ua ite râ oia e o to ’na tino tei paruparu (ua piri hoi oia i te 100 matahiti), oia atoa Sara, ua ruau roa no te fanau i te tamarii. 20  No te parau fafau râ a te Atua, aita Aberahama i feaa noa ’‘e a ere atu ai i te faaroo. Ua itoitohia râ oia no to ’na faaroo, a faahanahana ’tu ai i te Atua 21  e ua papu roa ia ’na e e faatupu iho â te Atua i ta ’na i fafau. 22  No reira, “ua faarirohia oia ei taata parau-tia.” 23  Aita râ te parau “ua riro to ’na faaroo ei parau-tia na ’na” i papaihia no ’na ana‘e, 24  no tatou atoa râ tei maitihia e te Atua ia riro ei taata parau-tia, no te mea te tiaturi nei tatou i te Atua tei faatia ia Iesu to tatou Fatu mai te pohe mai. 25  Ua vaiiho te Atua ia haapohehia Iesu no ta tatou mau hara. E ua faatia mai te Atua ia ’na mai te pohe mai ia faarirohia tatou ei taata parau-tia.

Nota i raro i te api

A hi‘o i te titionare.
Aore ra “e moni tarahu.”
Aore ra “faaorehia.”
A hi‘o i te titionare.
“Ei tapao no te parau-tia” na roto i te reo Heleni.
“Huero” na roto i te reo Heleni.
Aore ra “no te ao apî.”
“Huero” na roto i te reo Heleni.
“Huero” na roto i te reo Heleni.