Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 2:1-29

HAAPOTORAA O TE MAU TUMU PARAU

  • Haava te Atua i te ati Iuda e te Heleni (1-16)

    • Ohiparaa a te mana‘o haava (14, 15)

  • Te ati Iuda e te ture a Mose (17-24)

  • Peritomeraa o te aau (25-29)

2  No reira oe, e taeae, o vai noa ’tu â oe, ia haava oe i te tahi atu, aita ta oe e otoheraa. Ia haava hoi oe i te tahi atu, te faahapa ra ïa oe ia oe iho, no te mea, o oe e haava ra, te rave atoa ra oe i taua mau mea nei.  Ua ite tatou e te haava ra te Atua i te feia e rave ra i taua mau mea nei ia faautuahia hoi ratou, e te tu ra ta ’na haavaraa i te parau mau.  Tera râ, te mana‘o ra anei oe, e taeae, i to oe haavaraa i te feia e rave ra i taua mau mea nei a rave noa ’i râ oe i te reira, e ape ïa oe i te haavaraa a te Atua?  Aore ra te vahavaha ra anei oe i te rahi o to ’na hamani maitai e to ’na faaoromai, no te mea aita oe i ite e te hinaaro ra te Atua, no to ’na hamani maitai, i te aratai ia oe i te tatarahapa?  No to oe râ aau etaeta e te tatarahapa ore e roohia ’i oe i te faautuaraa a te Atua. E faaite oia i te reira i te mahana e haava ’i oia i te huitaata, e haavaraa parau-tia hoi ta ’na.  E e faaho‘i oia i ta te taata tataitahi ia au i ta ’na mau ohipa:  te ora mure ore no tei imi i te hanahana e te tura e te tahuti ore ma te faaoromai tamau i te raveraa i te mea maitai,  te faautuaraa râ e te riri no te feia mârô aita e pee ra i te parau mau, o tei rave râ i te mea tia ore.  E roohia te taata* atoa e rave ra i te mea ino i te ati e te ahoaho, te ati Iuda na mua, e te Heleni atoa, 10  te hanahana râ e te tura e te hau no tei rave i te mea maitai, te ati Iuda na mua, e te Heleni atoa. 11  E ore hoi te Atua e maitiiti i te taata. 12  Te feia atoa aita ratou i raro a‘e i te ture e ua hara, e pohe ïa noa ’tu aita e ture no te haava ia ratou. Area te feia i hara i raro a‘e i te ture, e haavahia ïa ia au i taua ture ra. 13  E ere hoi o te feia e faarooroo noa i te ture te feia parau-tia i mua i te Atua, o tei haapao râ i te ture te faarirohia ei feia parau-tia. 14  Ia rave hoi te mau taata o te mau nunaa ěê i ta te ture e parau ra noa ’tu e aita ratou i ite i taua ture ra, te faaite ra ïa te reira e to roto ia ratou te ture. 15  O ratou mau te haapapu ra e ua papaihia ta te ture e faaue ra i roto i to ratou aau, a riro atoa ’i to ratou mana‘o haava ei ite no ratou, na roto hoi i to ratou mau mana‘o e parihia ’i aore ra e faatiahia ’i ratou. 16  E tupu te reira i te mahana e haava ’i te Atua, na roto i te Mesia ra o Iesu, i te mau mea hunahia e te taata, ia au i te parau apî oaoa ta ’u e faaite atu. 17  I teie nei, mai te peu e ua parauhia oe e ati Iuda, e te tiaturi ra oe i te ture e e haapeuraa na oe te Atua, 18  e ua ite oe i to ’na hinaaro e ua taa ia oe te mau mea faufaa roa no te mea ua haapiihia oe ia au i te ture a Mose, 19  e ua papu atoa ia oe e: e aratai oe no te matapo, e maramarama hoi no te feia i roto i te poiri, 20  e taata haapii i tei ere i te paari, e orometua no te mau tamarii rii, e ua taa ia oe te hoho‘a o te ite e o te parau mau e vai ra i roto i te ture a Mose. 21  Te haapii ra oe ia vetahi ê, aita râ oe e haapii nei ia oe iho. Te poro ra oe e: “Eiaha roa oe e eiâ,” e te eiâ nei oe. 22  Te parau ra oe e: “Eiaha roa oe e faaturi,” e te faaturi nei oe. Te haafaufau ra oe i te mau idolo, te eiâ nei râ oe i roto i te mau hiero. 23  E haapeuraa na oe te ture, aita râ oe e faatura ra i te Atua a ofati ai i te ture a Mose. 24  Mai tei papaihia hoi: “Te faaino-haere-hia ra te i‘oa o te Atua i roto i te mau nunaa, o outou hoi te tumu.” 25  Oia hoi, e faufaa to te peritomeraa ia haapao oe i te ture. Ia ofati râ oe i te ture, aita ïa e faufaa no oe te peritomeraa. 26  Mai te peu râ e e haapao te hoê taata peritome-ore-hia i te mau titauraa parau-tia a te ture a Mose, no te Atua ua riro ïa oia mai te taata peritomehia, e ere anei? 27  E na roto i te haapaoraa i te ture a Mose, e faahapa ïa te taata tei peritome-ore-hia ia oe e ofati ra i te ture, noa ’tu tei ia oe ra te ture e ua peritomehia oe. 28  Te ati Iuda mau, e ere ïa tei te huru rapaeau noa, e te peritomeraa mau, e ere noa ïa i tei ravehia i nia i te tino. 29  Tera râ, te ati Iuda mau, tei te rotoraa ïa o te taata, e te peritomeraa mau, o ta te varua mo‘a ïa i rave i nia i te aau, e ere ïa na te ture. No ǒ mai te arueraa o taua taata ra i te Atua, e ere râ no ǒ mai i te taata.

Nota i raro i te api

Heleni pusuke. A hi‘o i te titionare.