Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 16:1-27

HAAPOTORAA O TE MAU TUMU PARAU

  • Faaite Paulo o vai o Phebe (1, 2)

  • Aroharaa i te mau Kerisetiano Roma (3-16)

  • A ara i te amahamaha (17-20)

  • Aroharaa a te mau hoa ohipa o Paulo (21-24)

  • Ua itehia i teie nei te parau huna mo‘a (25-27)

16  Teie atu o Phebe,* to tatou tuahine, o te tavini ra i roto i te amuiraa i Keneherea,  e, mai tei au i te feia mo‘a, ia farii maitai outou ia ’na i roto i te Fatu e ia horoa ’tu i te tauturu atoa ta ’na e hinaaro mau, i paruru na hoi oia i te taeae e rave rahi e ia ’u atoa nei.  E aroha ’tu ia Periseka* raua Akuila no ’u, to ’u nau hoa ohipa i te Mesia ra o Iesu,  mai pohe hoi raua no ’u.* E ere o vau ana‘e teie e haamauruuru nei ia raua, oia atoa râ te mau amuiraa taatoa o te mau nunaa.  E aroha atoa ’tu i te amuiraa e putuputu ra i ǒ raua. E aroha ’tu i to ’u taeae herehia o Epeneto, hoê o te mau pǐpǐ matamua a te Mesia i Asia.  E aroha ’tu ia Maria, e rave rahi hoi ohipa ta ’na i rave no outou.  E aroha ’tu ia Anederoniko raua Iunia to ’u nau fetii, matou hoi i roto i te tapearaa. E roo maitai atoa to raua i te mau aposetolo e mea maoro a‘e raua i te riroraa ei pǐpǐ a te Mesia ia ’u nei.  E aroha ’tu ia Amepelia, to ’u taeae herehia i te Fatu.  E aroha ’tu ia Urobano to tatou hoa ohipa i te Mesia, e i to ’u taeae herehia o Setahu. 10  E aroha ’tu ia Apele, tei fariihia e te Mesia. E aroha ’tu i to te utuafare o Arisetobulu. 11  E aroha ’tu ia Herodiona to ’u fetii. E aroha ’tu i to te utuafare o Narekisu e pee ra i te Fatu. 12  E aroha ’tu ia Teruphaina raua Terophosa, mea rahi te ohipa ta teie nau tuahine e rave nei i te Fatu. E aroha ’tu ia Peresi, to tatou tuahine herehia, mea rahi atoa hoi ta ’na i rave i te Fatu. 13  E aroha ’tu ia Rupho tei maitihia i roto i te Fatu e i to ’na metua vahine, mai te metua vahine atoa hoi oia no ’u. 14  E aroha ’tu ia Asunekerito, ia Phelegona, ia Hereme, ia Pateroba, ia Herema, e i to reira mau taeae. 15  E aroha ’tu ia Philologo raua Iulia, ia Nerea e i to ’na tuahine, ia Olumepa, e te taatoaraa o to reira feia mo‘a. 16  E apa maitai i te tahi e te tahi ma te here taeae. Te aroha ’tu nei te mau amuiraa atoa a te Mesia ia outou. 17  Taeae ma, i teie nei, te ani ru atu nei au ia outou ia ara i te feia e faatupu i te amahamaha e te turoriraa. Te patoi nei te reira i ta outou i haapii mai na e eiaha e amuimui faahou ia ratou. 18  No te mea, e ere tera mau taata i te tavini no to tatou Fatu te Mesia, e tîtî râ ratou no to ratou iho mau hinaaro tia ore o te tino.* E na roto i te tahi mau parau aminamina e te faatietie, te haavare nei ratou i te aau o te feia vare hanoa. 19  Ua atutu te parau o to outou auraro i rotopu i te taata atoa, i oaoa ’i au ia outou. E hinaaro râ vau ia noaa ia outou te paari a tapi atu ai outou i te mea maitai, ia vai hapa ore râ i te mea ino. 20  Area te Atua o te horoa mai i te hau, ua fatata ïa oia i te tuu ia Satani i raro a‘e i to outou avae ia taahi-roa-hia o ’na. Ei ia outou te hamani maitai rahi o to tatou Fatu ra o Iesu. 21  Te aroha ’tu nei to ’u hoa ohipa o Timoteo ia outou. Oia atoa to ’u mau fetii o Lukio, o Iasona e o Sosipatera. 22  O vau iho nei, o Teretio tei papai i teie nei rata a Paulo, te aroha ’tu nei au ia outou i te Fatu. 23  Te arohahia ’tu nei outou e Gaio, tei farii maitai ia ’u e i te amuiraa taatoa i to ’na fare. Te arohahia ’tu nei outou e Eraseto, te haapao faufaa* a te oire, oia atoa to ’na taeae o Kuareto. 24  *—— 25  Te faaite nei te parau apî oaoa ta ’u e poro ra e te poroi no nia ia Iesu Mesia e e nehenehe te Atua e haapuai ia outou, ia au i te maramaramaraa o te parau huna mo‘a i heheuhia e tei hunahia mai tahito mai â. 26  I teie nei râ, ua faaitehia* mai taua parau huna ra. E ua ite te mau nunaa atoa i te reira na roto i te mau Papai a te mau peropheta ia au i te faaueraa a te Atua mure ore o te hinaaro ia auraro ratou ia ’na ma te faaroo. 27  Ei te Atua paari hoê roa te hanahana na roto ia Iesu Mesia e a muri noa ’tu. Amene.

Nota i raro i te api

Aore ra “Mea tiaturi na ’u ia Phebe.”
Pii-atoa-hia Perisila.
Aore ra “ia ora vau.” Heleni pusuke. A hi‘o i te titionare.
Aore ra “no to ratou iho opu.”
Aore ra “te tiaau.”
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
Aore ra “heheuhia.”