Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 15:1-33

HAAPOTORAA O TE MAU TUMU PARAU

  • Farii maitai te tahi i te tahi mai te Mesia i na reira (1-13)

  • Paulo, e tavini no te mau nunaa ěê (14-21)

  • Opuaraa a Paulo no to ’na tere (22-33)

15  Area tatou o tei puai i roto i te faaroo, ia turu ïa tatou i tei ere ra i te puai a faaruru ai ratou i te paruparu e eiaha ia imi noa i to tatou iho maitai e tia ’i.  Ia imi râ tatou tataitahi i te maitai o to ’na taata tupu no te haapuai i to ’na faaroo.  Aita atoa hoi te Mesia i imi i to ’na iho maitai, tera râ, mai tei papaihia: “Ua faaruru vau i te mau faainoraa a te feia tei faaino ia oe.”  Te mau parau atoa hoi i papaihia mai tahito mai â, ua papaihia ïa ei haapiiraa ia tatou e ia noaa atoa te tiaturiraa na roto i te faaoromai tamau e te tamahanahanaraa a te mau Papai.  E tamahanahana mai te Atua ia tatou e e faaitoito mai ia faaoromai tamau. No reira, te taparu nei au i te Atua ia noaa ia outou tataitahi te hoê â huru feruriraa e to te Mesia ra o Iesu,  e ma te reo* hoê, ia faahanahana amui outou paatoa i te Atua, te Metua o to tatou Fatu ra o Iesu Mesia.  Mai te Mesia i farii maitai ia outou, e farii maitai ana‘e ïa te tahi i te tahi ia faahanahanahia te Atua.  Te parau atu nei hoi au ia outou e ua riro te Mesia ei tavini no tei peritomehia ia itehia e e parau mau ta te Atua e ia haapapuhia e e tupu iho â ta ’na i fafau i to ratou mau tupuna,  ia nehenehe te mau nunaa ěê ia faahanahana i te Atua no to ’na aroha.* Mai tei papaihia: “No reira, e arue ïa vau ia oe i mua i te taata o te mau nunaa atoa e e himene au i te himene arueraa no to oe i‘oa.” 10  Ua papai-atoa-hia: “Te mau nunaa, a oaoa outou e to ’na mau taata.” 11  Oia atoa: “A arue ia Iehova,* outou to te mau nunaa atoa, e ia arue te taata atoa ia ’na.” 12  I roto i te tahi atu â papai, ua parau Isaia: “E itehia te a‘a o Iese e o ’na te tia mai no te faatere i te mau nunaa e na roto ia ’na te mau nunaa e tiai ai i te mea maitai.” 13  Ia horoa mai te Atua, no ǒ mai hoi ia ’na te tiairaa i te mea maitai, i te oaoa e te hau rahi no to outou tiaturiraa ia ’na e ia haapuaihia ’tu â to outou tiairaa i te mea maitai na roto i te mana o te varua mo‘a. 14  E ua papu roa ia ’u, to ’u mau taeae, e e ohipa maitai ana‘e ta outou e aita outou e ere ra i te ite, e mea aravihi atoa outou i te a‘o* atu te tahi i te tahi. 15  Teie râ, ua papai roa ’tu vau ia outou no nia i te tahi atu mau parau ei haamana‘oraa ia outou e no te hamani maitai rahi tei horoahia mai ia ’u nei e te Atua 16  i riro ai au ei tavini na te Mesia ra o Iesu no te mau nunaa ěê. Te apiti nei au i teie ohipa mo‘a e poro i te parau apî oaoa a te Atua ia riro taua mau nunaa ra ei tusia pûpûhia e te au, tei haamo‘ahia i te varua mo‘a. 17  No reira, e tumu ta ’u no te oaoa i te Mesia ra o Iesu no ta ’u taviniraa i te Atua. 18  Eita vau e parau i te tahi noa ’‘e parau, ta te Mesia ana‘e râ i rave na roto ia ’u ia auraro te mau nunaa, na roto hoi i ta ’u nei mau parau e ta ’u nei mau ohipa 19  e na roto atoa i te mana o te mau semeio e te mau ohipa maere* e maoti te mana o te varua o te Atua. No reira, ua ati i te poro-haere-hia e au te parau apî oaoa no nia i te Mesia mai Ierusalema mai e tae atu i Iliriko. 20  No reira, ua tutava maite au eiaha e faaite i te parau apî oaoa i te mau vahi ua ite ê na to reira i te i‘oa o te Mesia, ia ore au ia patu i nia i te niu ta te tahi atu i patu, 21  tera râ, mai tei papaihia: “E ite te feia aita i faaitehia ’tu te parau no nia ia ’na e te feia aita i faaroo i to ’na parau, e taa ïa ia ratou.” 22  Teie atoa ïa te tumu i taupupu ai to ’u tere i ǒ outou. 23  I teie nei râ, ua ati ïa teie mau fenua i te poro-haere-hia e au, e e rave rahi matahiti* i teie nei to ’u hinaaro-noa-raa e haere atu i ǒ outou. 24  No reira, ia tere atu vau i te fenua Paniora, e hinaaro vau e ite ia outou e ia oaoa rii tatou na mua a apee mai ai outou ia ’u maa taime i to ’u tere. 25  I teie nei râ, e tere atu vau i Ierusalema no te tavini i te feia mo‘a. 26  Ua oaoa mau â hoi to Makedonia e to Ahaia i te horoa i te tahi ô no te turu i tei veve i rotopu i te feia mo‘a i Ierusalema. 27  Oia mau, ua oaoa mau â ratou i te na reira, mai te huru ra e e tarahu ta ratou i te feia mo‘a i Ierusalema. I te mea e ua apiti te mau nunaa i te mau mea pae varua a teie feia mo‘a, e mea tia atoa ïa ia tauturu ratou i teie feia mo‘a i ta ratou mau mea materia. 28  E ua oti ana‘e te reira i te ravehia, e taua mau ô* ra i te horoa-maite-hia ia ratou, e na ǒ atu ïa vau i ǒ outou i te haere atu i Paniora. 29  Hau atu â, ua ite au e ia haere atu vau i ǒ outou, e hopoi atoa ’tu vau i te rahi o te mau haamaitairaa no ǒ mai i te Mesia. 30  Taeae ma, te ani ru nei au ia outou, na roto i to tatou Fatu ra o Iesu Mesia e na roto i te here ta te varua mo‘a e faatupu, ia pure u‘ana outou e o vau atoa i te Atua no ’u, 31  ia faaorahia mai au i te rima o te feia i Iudea o te ore e tiaturi ra ia Iesu, e ia farii maitai te feia mo‘a i ta ’u taviniraa i to Ierusalema, 32  e ia tia i te Atua, ia haere atu vau i ǒ outou ma te oaoa e ia faaitoitohia tatou paatoa. 33  Ei ia outou paatoa te Atua o te horoa i te hau. Amene.

Nota i raro i te api

“Vaha” na roto i te reo Heleni.
Aore ra “aroha hamani maitai.”
A hi‘o i te titionare.
Aore ra “haapii.”
Aore ra “tapao.”
Nehenehe atoa e hurihia “tau matahiti.”
“Hotu” na roto i te reo Heleni.