Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 11:1-36

HAAPOTORAA O TE MAU TUMU PARAU

  • E ere te mau Iseraela atoa tei faaruehia (1-16)

  • Faahoho‘araa o te tumu olive (17-32)

  • Rahi hau ê o te paari o te Atua (33-36)

11  E ui atu ïa vau: Ua faarue anei te Atua i to ’na nunaa? Aita roa ’tu! E taata Iseraela atoa hoi au nei no te huaai* o Aberahama, no te opu o Beniamina.  Aita te Atua i faarue i te nunaa ta ’na i ite a‘ena. Aita anei outou i ite i ta te mau Papai e parau ra no nia ia Elia a faahapa ’i oia i to Iseraela i mua i te Atua?  “Iehova,* ua taparahi pohe ratou i ta oe mau peropheta, ua huri ratou i ta oe mau fata i raro. O vau noa teie e toe nei e te imi nei ratou i te rave i to ’u ora.”*  Tera râ, eaha ta te Atua i pahono ia ’na? “E 7 000 â o to ’u mau taata tei ore i tuturi i mua ia Baala.”  Oia atoa i teie tau, te toe ra te tahi pae o tei maitihia maoti te hamani maitai rahi.  Mai te peu e ua maitihia ratou maoti te hamani maitai rahi, e ere atura ïa maoti te ohipa. Ahiri hoi mea na roto â i te ohipa, e ere atura ïa i te hamani maitai rahi.  Eaha ïa ta tatou e parau? Ta to Iseraela i tutava i te imi, aita te reira i noaa ia ratou paatoa, ua noaa noa râ i tei maitihia e te Atua. Ua etaetahia te aau o te tahi atu pae,  mai tei papaihia: “Ua faatupu te Atua i nia ia ratou i te hoê varea taoto rahi, e ua horoa ia ratou i te mata o te ore e ite e i te tari‘a o te ore e faaroo, e tae roa mai i teie mahana.”  Ua parau atoa Davida: “Ia riro ta ratou mau amuraa maa ei marei, ei herepata e ei turoriraa no ratou e ia faautuahia ratou. 10  Ia poirihia to ratou mata ia ore ratou ia ite e ia pi‘o noa to ratou tua i raro i te hopoia teiaha mau.” 11  E ui atu vau, Ua turori anei to Iseraela e ua topa roa anei i raro? Aita roa ’tu! No to ratou râ hahi-ê-raa i faaorahia ’i te taata o te mau nunaa ěê, e pohehae atura to Iseraela. 12  No reira, mai te peu e no to ratou hahi-ê-raa ua faufaahia to te ao nei e no to ratou itiraa mai ua faufaahia te feia o te mau nunaa ěê, eaha ’tu â ïa ia raea to ratou numera taatoa! 13  I teie nei, teie ta ’u parau ia outou, te feia o te mau nunaa ěê. I te mea e e aposetolo vau i tonohia ’tu i te mau nunaa ěê, te faahanahana* nei au i ta ’u taviniraa 14  e peneia‘e e nehenehe ta ’u e faatupu i te pohehae i roto i to ’u iho nunaa e e faaora mai vetahi i rotopu ia ratou. 15  I te mea hoi e no to te Atua faarueraa i to Iseraela i tupu ai te faahauraa i rotopu i te Atua e to te ao nei, eaha ’tu â ïa ia farii faahou mai te Atua i to Iseraela? Mai te huru ra e i pohe na hoi ratou e ua ora faahou mai. 16  Oia atoa, mai te peu e mea mo‘a te tuhaa matamua i ravehia mai i te faraoa i ôihia, mea mo‘a atoa ïa te puea taatoa. E mai te peu e mea mo‘a te a‘a, mea mo‘a atoa ïa te mau amaa. 17  Ua ofatihia te tahi o te mau amaa, area oe, noa ’tu e e amaa olive oviri oe, ua poihia* oe i taua tumu olive ra e te maitai-atoa-hia ra oe i to ’na a‘a. 18  No reira, eiaha oe e vahavaha* i te mau amaa i ofatihia. E ia vahavaha* noa ’tu oe, a haamana‘o e e ere no oe e mau ai te a‘a, no te a‘a râ oe e mau ai. 19  E parau ïa oe: “Ua ofatihia te amaa ia nehenehe au ia poihia i nia i te tumu.” 20  Parau mau! No to ratou ereraa i te faaroo i ofatihia ’i ratou. Area oe, ua mau papu noa ïa maoti to oe faaroo. Eiaha e teoteo, e ara râ. 21  I te mea e aita te Atua i faaherehere i te mau amaa o te tumu olive i tanuhia, eita atoa ïa e faaherehere ia oe ia na reira noa ’tu oe. 22  A hi‘o na i te hamani maitai o te Atua e to ’na faaherehere ore. Eita oia e faaherehere i te feia i hahi ê. Ia rave noa râ oe i tei au i to ’na hamani maitai, e hamani maitai ïa te Atua ia oe. Ia ore râ, e tâpû-ê-atoa-hia oe. 23  Oia atoa to Iseraela, mai te peu e e faatupu faahou ratou i te faaroo, e poihia ratou i nia i te tumu i tanuhia, e nehenehe hoi te Atua e poi faahou mai ia ratou i nia i taua tumu ra. 24  Mai te peu hoi e ua tâpûhia oe no nia mai i te hoê tumu olive oviri a poihia ’tu ai i nia i te tumu olive i tanuhia, e ere râ hoi tera te raveraa matauhia, eaha ’tu ïa no te mau amaa olive mau ia poihia ’tu i nia i to ratou iho tumu! 25  E hinaaro vau ia ite outou, taeae ma, i te parau huna mo‘a, ia ore outou ia mana‘o e mea ite a‘e outou. Teie hoi taua parau huna ra: E etaetahia te aau o te tahi pae o to Iseraela e ia tia roa te numera o te feia o te mau nunaa ěê i te haaputuputuhia. 26  Mea na reira e faaorahia ’i Iseraela taatoa. Mai tei papaihia: “E haere mai te faaora no roto mai ia Ziona e e haafariu ê oia i te mau tamarii a Iakoba i ta ratou mau ohipa ino. 27  O ta ’u ïa faufaa e o ratou, ia faaore au i ta ratou mau hara.” 28  Oia mau, e enemi ratou no te Atua i to ratou patoiraa i te parau apî oaoa, area outou, ua faufaahia ïa i te reira. Mea herehia râ te tahi pae o ratou no te parau i fafauhia i to ratou mau tupuna. 29  Eita hoi te Atua e tatarahapa i te horoaraa i te ô e te titau-manihini-raa i te tahi pae. 30  Na mua a‘e hoi mea faaroo ore outou i te Atua. I teie nei râ, no te faaroo ore o Iseraela, ua arohahia* mai outou e te Atua. 31  No reira, ua arohahia* mai outou e ana no te faaroo ore o Iseraela, ia nehenehe atoa râ ratou ia arohahia* mai i teie nei. 32  Ua vaiiho te Atua ia ratou paatoa ia riro mai te feia i tapeahia no to ratou faaroo ore, ia nehenehe oia e faaite i to ’na aroha* ia ratou paatoa. 33  Auê te rahi hau ê o ta te Atua mau haamaitairaa e te hohonu mau hoi o to ’na ite e to ’na paari! Eita e noaa ia tatou ia taa roa i ta ’na mau haavaraa atoa e to ’na mau haerea atoa! 34  Ua papaihia hoi: “O vai te nehenehe e ite i te mana‘o o Iehova* aore ra e parau atu ia ’na ia na ô i te rave?” 35  Aore ra “o vai te taata tei na mua i te horoa ’tu i te Atua a tiai ai ia faaho‘ihia mai ta ’na ra?” 36  No te mea no ǒ mai i te Atua e mea na roto ia ’na e no ’na hoi te mau mea atoa. Ei ia ’na te hanahana e a muri noa ’tu. Amene.

Nota i raro i te api

“Huero” na roto i te reo Heleni.
A hi‘o i te titionare.
Heleni pusuke. A hi‘o i te titionare.
Aore ra “faateitei.”
Te poiraa, o te tapiriraa ïa, te puohuraa e te taamuraa i te hoê amaa i nia i te tahi atu tumu ia tupu taua amaa ra.
Aore ra “e teoteo i mua.”
Aore ra “ia teoteo.”
Aore ra “aroha-hamani-maitai-hia.”
Aore ra “aroha-hamani-maitai-hia.”
Aore ra “aroha-hamani-maitai-hia.”
Aore ra “aroha hamani maitai.”
A hi‘o i te titionare.