Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 1:1-32

HAAPOTORAA O TE MAU TUMU PARAU

  • Aroharaa (1-7)

  • Hinaaro Paulo e tere i Roma (8-15)

  • E ora te taata parau-tia i te faaroo (16, 17)

  • Aita e otoheraa ta te feia faatura ore i te Atua (18-32)

    • To te Atua mau huru maitatai i roto i te mau mea poietehia (20)

1  O vau o Paulo, e tavini na te Mesia ra o Iesu tei titau-manihini-hia ei aposetolo e tei faatoroahia no te faaite i te parau apî oaoa* a te Atua, te papai atu nei ia outou.  Ua fafau te Atua i taua parau apî oaoa ra i mutaa iho ra na roto i ta ’na mau peropheta i roto i te mau Papai mo‘a.  Taua parau apî oaoa ra, no nia ïa i ta ’na Tamaiti tei fanauhia mai i te fenua nei ei huaai* no Davida,  tei faaitehia mai râ ei Tamaiti na te Atua na roto i te puai o te varua mo‘a* i to ’na faatiaraahia mai te pohe mai, oia mau o Iesu Mesia to tatou Fatu.  Na roto ia ’na i fana‘o ai au* i te hamani maitai rahi e i te toroa aposetolo ia auraro te mau nunaa atoa ia ’na ma te faaroo e ia faahanahana ratou i to ’na i‘oa.  No roto mai hoi i taua mau nunaa ra i titau-manihini-atoa-hia ’i outou no te riro ei pǐpǐ na Iesu Mesia.  Te papai nei au i te feia herehia atoa e te Atua i Roma e tei titau-manihini-hia no te riro ei feia mo‘a: Ia fana‘o outou i te hamani maitai rahi e te hau no ǒ mai i te Atua to tatou Metua e no ǒ mai i te Fatu ra o Iesu Mesia.  Na mua roa, e haamauruuru vau i to ’u Atua na roto ia Iesu Mesia no to outou faaroo, no te mea te paraparau ra te taata ati a‘e te ao nei no nia i to outou faaroo.  Te pûpû nei au i te hoê taviniraa mo‘a i te Atua ma to ’u aau* atoa ia faaite au i te parau apî oaoa no nia i ta ’na Tamaiti. Ua ite o ’na e e faahiti noa iho â vau ia outou i roto i ta ’u mau pure, 10  ma te ani ’tu ia ’na ia nehenehe au e tere atu i ǒ outou i te hoê mahana mai te peu e tera to te Atua hinaaro no ’u. 11  Te hinaaro roa nei hoi au e ite atu ia outou no te horoa ’tu i te tahi mau ô pae varua ia mau papu outou, 12  aore ra ia nehenehe outou e faaitoito mai ia ’u i to outou faaroo e ia nehenehe atoa vau e faaitoito ia outou i to ’u faaroo. 13  Teie râ, te hinaaro ra vau ia ite outou, taeae ma, e e rave rahi taime to ’u opuaraa e tere atu i ǒ outou ia nehenehe au e haapii atu i to reira ia riro mai ratou ei pǐpǐ, mai ta ’u i na reira i rotopu i te tahi atu mau nunaa. Tera râ, ua haafifihia vau. 14  E tarahu ta ’u i te Heleni, i te feia ěê,* i te feia maramarama e i te feia ma‘ua. 15  No reira ïa vau e hinaaro roa ’i e faaite i te parau apî oaoa ia outou atoa i Roma. 16  Aita hoi au e haama nei i te faaite i te parau apî oaoa. Inaha, tera te ravea puai a te Atua no te faaora i te feia atoa e tiaturi ra, te ati Iuda na mua, e oia atoa te Heleni. 17  Ua ite hoi te feia e tiaturi ra e na roto i te parau apî oaoa e faaite ai te Atua i ta ’na parau-tia, a puai atu â ’i to ratou faaroo, mai tei papaihia: “E ora te taata parau-tia i to ’na faaroo.” 18  Mai te ra‘i mai e faaite ai te Atua i to ’na riri i te taata atoa aita e faatura ra ia ’na e te feia parau-tia ore o te huna nei i te parau mau ma te tano ore, 19  no te mea ua papu maitai ia ratou te mau mea no nia i te Atua, ua faaite papu atu hoi te Atua i te reira ia ratou. 20  E ite-maitai-hia hoi to ’na mau huru maitatai e ore e ite-mata-hia, oia hoi to ’na puai mure ore e o ’na iho â te Atua, mai te poieteraahia mai â te taata, no te mea e taa-maitai-hia te reira na roto i te mau mea i hamanihia. Aita ïa ta ratou e otoheraa. 21  Noa ’tu râ e ua ite ratou e o ’na iho â te Atua, aita ratou i faahanahana e aita atoa i haamauruuru ia ’na. Ua nenevahia râ ratou e ua poirihia to ratou aau maamaa. 22  A parau noa ’i e e taata paari ratou, ua riro mai ratou ei maamaa 23  e aita i faahanahana i te Atua mure ore, ua faahanahana râ i te hoho‘a o te mau mea e pohe, to te taata anei, to te manu, to te animara avae maha e to te animara e nee haere. 24  No te mau hinaaro o to ratou aau, vaiiho noa ’tura ïa te Atua ia ratou ia rave i te mea faufau a viivii atu ai to ratou tino. 25  Ua maiti ratou e tiaturi i te haavare eiaha râ i te parau mau a te Atua, e ua haamori e ua pûpû i te hoê taviniraa mo‘a i te mau mea i poietehia eiaha râ i te Atua poiete, o te aruehia e a muri noa ’tu. Amene. 26  No reira te Atua i vaiiho noa ’tu ai ia ratou ia rave i te mau peu taotoraa tia ore ta ratou e hinaaro ra, aita hoi te mau vahine i hinaaro e taoto i te tane, e taoto râ i te vahine noa. 27  Aita atoa te mau tane i taoto faahou i te vahine, ua u‘ana râ to ratou hinaaro te tahi i te tahi, tane e tane i te raveraa i te mea faufau a noaa ’tu ai ta ratou utua no to ratou hahi-ê-raa. 28  I te mea e, i to ratou mana‘o, aita e faufaa ia ite o vai mau â te Atua, vaiiho noa ’tura ïa te Atua ia ratou ia mana‘o noa i te mea ino a rave atu ai i te mea tano ore. 29  E ohipa parau-tia ore ana‘e ta ratou e te ino, te nounou, te pohehae, te taparahi taata, te tatama‘i, te haavare, te totoa, te afai parau faaino, 30  te ohumu, te hae i te Atua, te vahavaha, te teoteo, te faaahaaha, te ite i te faatupu i te mau mea ino, te faaroo ore i te metua, 31  te taa ore, te faatura ore i te parau i faaauhia, te au-ore-raa te taata te tahi i te tahi e te aroha ore. 32  Noa ’tu e ua ite maitai ratou i te haavaraa parau-tia a te Atua ia pohe iho â te feia e rave nei i tera mau mea, te tamau noa nei râ ratou i te rave i te reira e i te farii atoa i te feia e na reira atoa ra.

Nota i raro i te api

Aore ra “evanelia.”
“Huero” na roto i te reo Heleni.
Aore ra “puai ohipa o te Atua.”
“Matou” na roto i te reo Heleni.
Heleni peneuma. A hi‘o i te titionare.
Aore ra “te feia e ere i te Heleni.”