Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Philipi 4:1-23

HAAPOTORAA O TE MAU TUMU PARAU

  • Hoêraa, oaoa, mana‘o maitai (1-9)

    • Eiaha e haapeapea noa ’‘e (6, 7)

  • Mauruuru no te mau ô a to Philipi (10-20)

  • Aroharaa hopea (21-23)

4  No reira, to ’u mau taeae ta ’u e here e e ru nei i te ite atu, e oaoaraa e e hei upoo outou no ’u, ia na reira noa outou i te mau papu i roto i te Fatu.  Te ani ru nei au ia Euodia e te ani ru nei au ia Sunetuhe e ei mana‘o hoê to raua i roto i te Fatu.  Oia mau, e ani atoa vau ia oe, mai te hoê hoa ohipa mau, ia tamau i te tauturu i teie na vahine tei tutava* i pihai iho ia ’u no te parau apî oaoa, e oia atoa ia Kalemeno e i te tahi atu o to ’u mau hoa ohipa tei papaihia to ratou i‘oa i roto i te buka o te ora.  A oaoa noa i roto i te Fatu. E parau atu â vau, a oaoa!  Ia itehia to outou huru au noa e te taata atoa. Tei pihai iho nei te Fatu,  eiaha ïa e haapeapea noa ’‘e, na roto râ i te pure e te taparuparuraa e te haamaitairaa, a faaite i ta outou mau aniraa i te Atua.  E na te hau o te Atua, tei hau ê i te mau mana‘o atoa, e tiai i to outou aau e feruriraa na roto i te Mesia ra o Iesu.  Taeae ma, te mau mea e nehenehe e tiaturi, te mau mea tura, te mau mea tia, te mau mea viivii ore, te mau mea e faatupu i te here, te mau mea e au ia haapopouhia, te mau mea maitatai e te mau mea e au ia aruehia, a tamau noa i te haafaufaa* i teie mau mea atoa.  Te mau mea ta outou i haapii mai, ta outou atoa i farii, i faaroo e i ite ia ’u nei, a faaohipa i te reira, e ei pihai iho ïa te Atua o te hau ia outou. 10  E oaoa iti rahi to ’u i roto i te Fatu, i te mea e te haapeapea faahou nei outou no ’u. I haapeapea noa na hoi outou no ’u, aita râ ta outou e ravea no te faaite mai. 11  Aita vau e na reira ra i te parau, no te mea te ere ra vau i te tahi mea, ua haapii hoi au i te mauruuru noa i te mea e vai ra ia ’u i roto i te mau tupuraa atoa. 12  Ua ite au e nafea ia ora i roto i te veve e i roto atoa i te fana‘o. I te mau mea atoa e i roto i te mau tupuraa atoa, ua mataro vau i te ora ma te paia e te poia atoa, ma te tao‘a rahi e te tao‘a ore atoa. 13  E puai to ’u ia faaruru i te mau mea atoa maoti tei horoa mai i te puai. 14  Tera râ, e ohipa maitai ta outou i te tautururaa mai ia ’u a roohia ’i au e te ati. 15  E ua ite maitai atoa outou, te mau taeae no Philipi, e i to outou haamataraa i te haapii i te parau apî oaoa, e ia ’u i faarue ia Makedonia, aita hoê a‘e amuiraa i tauturu ia ’u aore ra i farii i ta ’u tauturu, o outou ana‘e râ. 16  A parahi ai hoi au i Tesalonia, e ere hoê noa taime to outou tautururaa mai ia ’u, e piti râ. 17  Aita vau e titau nei i te ô, te hinaaro nei râ vau ia rave outou i te maitai a apîhia ’tu ai outou. 18  Tera râ, aita vau e ere nei i te tahi noa ’‘e mea, e ua rahi roa atoa ta ’u. Ua navai maitai, i te mea e ua faatae mai Epapherodito i ta outou i hapono mai, e au ïa i te hoê mea no‘ano‘a, te hoê tusia fariihia ta te Atua e mauruuru. 19  E na to ’u ïa Atua e horoa rahi mai i te mau mea atoa hinaaro-mau-hia e outou ia au i te rahi o to ’na hanahana na roto i te Mesia ra o Iesu. 20  E teie nei, ei to tatou Atua e Metua te hanahana e a muri noa ’tu. Amene. 21  A aroha maitai atu i te feia mo‘a atoa i hoê e te Mesia ra o Iesu. Te aroha ’tu nei te mau taeae i pihai iho ia ’u. 22  Te aroha ’tu nei te feia mo‘a atoa, to te utuafare iho â râ o Kaisara.* 23  Ei ia outou te hamani maitai rahi o te Fatu ra o Iesu Mesia a faaite ai outou i te huru feruriraa tano.

Nota i raro i te api

Aore ra “tautoo.”
Aore ra “mana‘o,” “feruriruri.”
Aore ra “te emepera no Roma.”