Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Philipi 3:1-21

HAAPOTORAA O TE MAU TUMU PARAU

  • Eiaha e tiaturi i ta te tino (1-11)

    • Haafaufaa ore i te mau mea atoa no te Mesia (7-9)

  • Tapiraa i te fa (12-21)

    • Tei te ra‘i to tatou ai‘a (20)

3  E teie nei, to ’u mau taeae, ia oaoa noa outou i te Fatu. Aita e fifi no ’u ia papai faahou atu i te mau mea ta ’u i papai a‘ena ia outou, no te paruru hoi ia outou.  A ara i te mau urî.* A ara i te feia ohipa ino. A ara i te feia e turu ra i te peritomeraa.*  Tei ia tatou te peritomeraa mau, tatou hoi e pûpû ra i te hoê taviniraa mo‘a maoti te varua* o te Atua, tatou hoi e haapeu nei i te Mesia ra o Iesu e aita e tiaturi ra i ta te tino,  noa ’tu e e tumu e tiaturi ai au, hau atu i te tahi atu taata, i ta te tino. Ia mana‘o noa ’tu te tahi taata e e tumu e tiaturi ai oia i ta te tino nei, eaha ’tu â ïa vau:  peritomehia i te va‘u o te mahana, no te nunaa Iseraela, no te opu o Beniamina, e Hebera fanauhia e na metua Hebera. No nia i te parau o te ture, e Pharisea.  No nia i te itoito rahi, i hamani ino na vau i te amuiraa. No nia i te parau-tia niuhia i nia i te ture, e haerea hapa ore to ’u.  Tei noaa râ ia ’u, o ta ’u ïa i faariro ei mea faufaa ore* no te Mesia.  Hau atu â, te faariro iho â nei au i te mau mea atoa ei mea faufaa ore no te faufaa hau ê o te ite no nia i te Mesia ra o Iesu to ’u Fatu. No ’na i haapae ai au i te mau mea atoa, ta ’u i faariro ei pueraa pehu, ia faufaahia vau i te Mesia  e ia itehia e ua hoê au e o ’na, eiaha no te parau-tia i noaa ia ’u no te haapaoraa i te ture a Mose, no te parau-tia râ maoti te faaroo i te Mesia, no te faaroo hoi i riro ai tatou ei feia parau-tia i te aro o te Atua. 10  Ta ’u fa, ia ite ïa ia ’na e te puai o to ’na tia-faahou-raa, e ia mauiui mai ia ’na, e ia ineine au i te pohe mai ia ’na, 11  a nehenehe atu ai au e fana‘o i te tia-faahou-raa matamua mai te pohe mai. 12  E ere hoi e ua fana‘o ê na vau i te reira aore ra ua noaa ê na ia ’u te tia-roa-raa, tera râ, te tautoo nei au ia mau ia ’u te mea no reira te Mesia ra o Iesu i maiti ai ia ’u. 13  Taeae ma, aita râ vau e mana‘o ra ia ’u iho mai te mea ra e ua noaa ia ’u te reira. Te mea papu râ: aita vau e tâu‘a faahou ra i to muri, e tapi râ vau i to mua. 14  Te horo tia ’tu ra vau i te fa ia noaa ia ’u te re, oia hoi te oraraa i te ra‘i i titau-manihini-hia ’i au e te Atua na roto i te Mesia ra o Iesu. 15  Mai te reira noa ïa te huru feruriraa o te feia paari i te pae varua, e ia ore noa ’tu râ outou e mana‘o mai tera, na te Atua ïa e faaite ia outou i te huru feruriraa tano. 16  Tera râ, i te mea e ua nuu ê na tatou i mua, e haere maite noa ana‘e ïa ma te tapea i taua aveia ra. 17  Taeae ma, ia pee paatoa mai outou i to ’u hi‘oraa e ia tiatonu noa outou i te feia e faaau ra i to ratou haerea i te hi‘oraa ta matou i horoa ’tu. 18  E rave rahi hoi taata mai to te mau enemi o te pou haamauiuiraa* a te Mesia to ratou haerea. I faahiti pinepine noa na vau i to ratou parau, i teie nei râ, te na reira atoa ra vau ma te ta‘i. 19  I te hopea e mou ratou, e to ratou atua o to ratou ïa opu, e to ratou hanahana o to ratou ïa haama, e tei nia noa to ratou feruriraa i te mau mea o teie nei ao. 20  Tera râ tei te ra‘i to tatou ai‘a, e te tiai ru nei tatou i te hoê faaora no te ra‘i mai, oia hoi te Fatu ra o Iesu Mesia, 21  e i to ’na puai rahi e faariro ai oia i to tatou tino paruparu ei tino hanahana mai to ’na ra, e na roto atoa i taua puai ra e tuu ai oia i te mau mea atoa i raro a‘e ia ’na.

Nota i raro i te api

Te feia ïa e rave ra i te mau mea faufau i te aro o te Atua.
Aore ra “te feia e tâpû ra i te tino.”
Aore ra “puai ohipa.”
Nehenehe atoa e hurihia “o ta ’u ïa i hinaaro e haapae.”
A hi‘o i te titionare.