Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Philipi 1:1-30

HAAPOTORAA O TE MAU TUMU PARAU

  • Aroharaa (1, 2)

  • Haamauruururaa i te Atua, te pure a Paulo (3-11)

  • Nuuraa te ohipa o te parau apî oaoa i mua noa ’tu te mau haafifiraa (12-20)

  • Ora no te Mesia, faufaahia ia pohe (21-26)

  • Ei haerea e au i te parau apî oaoa (27-30)

1  O Paulo e o Timoteo, nau tavini na te Mesia ra o Iesu, i te feia mo‘a atoa tei hoê e te Mesia ra o Iesu e oia atoa i te mau tiaau e te mau tavini tauturu i Philipi:  Ei ia outou te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.  E haamauruuru noa vau i to ’u Atua ia mana‘o vau ia outou  i roto i ta ’u mau taparuparuraa atoa no outou paatoa. E taparuparu noa vau ma te oaoa,  no to outou tururaa i* te parau apî oaoa* mai te mahana matamua mai â e tae roa mai i teie mahana.  Ua papu hoi ia ’u e e faaoti iho â te Atua i teie ohipa maitai ta ’na i haamata i rotopu ia outou e tae noa ’tu i te mahana o te Mesia ra o Iesu.  E mea tano iho â ia na reira vau i te mana‘o ia outou atoa, tei roto hoi outou i to ’u nei aau. Outou hoi tei turu mai ia ’u i roto i te fare tapearaa e oia atoa i te patururaa e te haapapuraa i te parau apî oaoa i mua i te ture. No reira ïa outou e o vau iho nei e fana‘o ai i te hamani maitai rahi o te Atua.  O te Atua hoi te ite ra e te hinaaro roa nei au e ite ia outou paatoa no to ’u here rahi ia outou mai to te Mesia ra o Iesu.  E teie ta ’u e ani noa nei na roto i te pure, ia rahi noa ’tu â to outou here ma te ite mau e te haro‘aro‘a i te hinaaro o te Atua. 10  E ia taa maitai ia outou eaha te mea faufaa roa ’‘e, i reira ïa outou e riro mai ai ei feia viivii ore e te faaturori ore ia vetahi ê e tae noa ’tu i te mahana o te Mesia. 11  E na roto ia Iesu Mesia, ia nehenehe outou ia rave atu â i ta te parau-tia e faatupu no te faahanahana e te arue i te Atua. 12  Taeae ma, te hinaaro nei au ia ite outou e ua nuu te ohipa o te parau apî oaoa no ta ’u i faaruru, 13  ua atutu hoi te parau o to ’u tapearaahia no te Mesia i rotopu i te mau tiai atoa a te emepera Roma e te tahi atu mau taata. 14  E teie nei ua puaihia mai te rahiraa o te mau taeae e tavini ra i te Fatu no to ’u tapearaahia, e ua rahi roa to ratou itoito i te faaiteraa i te parau a te Atua ma te mǎta‘u ore. 15  Oia mau, mea na roto i te pohehae e te aimârô e poro ai vetahi i te Mesia, te tahi atu râ mea na roto ïa i te aau tae. 16  Mea na roto hoi i te here taua feia nei e faaite haere ai i te Mesia, ua ite hoi ratou e ua faatoroahia vau no te paturu i te parau apî oaoa. 17  Area te feia matamua, mea na roto ïa i te tatama‘iraa, no te mau tumu tano ore, te mana‘o ra hoi ratou e haapeapea mai ia ’u i te fare tapearaa. 18  Eaha ’tura ïa? Noa ’tu eaha te tupuraa, ma te haavarevare anei aore ra ma te parau mau, te faaite-haere-hia ra te Mesia, o ta ’u ïa e oaoa nei. E e tamau noa vau i te oaoa, 19  ua ite hoi au e e ora vau i ta outou taparuparuraa e na roto i te fana‘oraa i te varua o Iesu Mesia. 20  Te tiai ru nei au e te tiaturi nei au e eita roa vau e haama, no te mea râ te parau ra vau ma te mǎta‘u ore, te faateitei nei au i te Mesia mai ta ’u i na reira noa na. E faateitei au ia ’na i to ’u nei tino, ia ora aore ra ia pohe noa ’tu vau. 21  Ia ora vau, e ora vau no te Mesia e ia pohe noa ’tu vau, o vau te faufaahia. 22  E teie nei ia ora â vau ei taata, e hotu â ïa ta ’u ohipa. Ahiri e na ’u e faaoti, eita ïa vau e faaite atu. 23  Te feaapiti nei au, te hinaaro nei hoi au e haere e e parahi e te Mesia, o te mea maitai roa ’‘e ïa. 24  Tera râ, no to outou maitai e mea faufaa ia ora noa vau. 25  Ua papu ia ’u te reira, ua ite au e e ora â vau e e apiti noa vau ia outou paatoa ia maitai atu â ta outou taviniraa i te Atua e ia oaoa outou i roto i to outou faaroo, 26  e ia parahi faahou vau i ǒ outou e rahi roa ’i to outou oaoa no te mea e pǐpǐ outou na te Mesia ra o Iesu. 27  Ia tura noa to outou haerea ia au i te parau apî oaoa no nia i te Mesia, e ia haere noa ’tu vau e hi‘o ia outou aore ra aita ana‘e au i rotopu ia outou, ia faarooroo vau e te mau papu ra outou ma te mana‘o* hoê e ma te aau* hoê* i te rohi-amui-raa ia vai noa to outou faaroo i te parau apî oaoa, 28  e eiaha roa e mǎta‘u i to outou mau enemi. Te haapapu ra teie mau mea atoa e e haamouhia ratou, area outou e faaorahia ïa. O te Atua te faaite maitai ra i te reira. 29  Mea horoahia mai teie fana‘oraa taa ê ia outou eiaha noa ia tiaturi outou i te Mesia, ia mauiui atoa râ no ’na. 30  Te faaruru nei hoi outou i te hoê â patoiraa e ta ’u, e ua faaroo outou e te faaruru noa ra vau i te reira.

Nota i raro i te api

Aore ra “no to outou apitiraa mai ia atutu.”
Aore ra “evanelia.”
Heleni peneuma. A hi‘o i te titionare.
Heleni pusuke. A hi‘o i te titionare.
Aore ra “ma te aau tahoê.”