Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Philemona 1:1-25

HAAPOTORAA O TE MAU TUMU PARAU

  • Aroharaa (1-3)

  • To Philemona here e faaroo (4-7)

  • Taparu Paulo no Onesimo (8-22)

  • Aroharaa hopea (23-25)

 O Paulo tei tapeahia no te Mesia ra o Iesu e o Timoteo to tatou taeae, ia Philemona to mâua taeae here e hoa ohipa,  ia Apephia to mâua tuahine, ia Arehipo to mâua hoa faehau na te Mesia, e i te amuiraa e putuputu i roto i to oe fare:  Ei ia outou te hamani maitai rahi e te hau no ǒ mai i te Atua to tatou Metua e i te Fatu ra o Iesu Mesia.  E haamauruuru noa vau i to ’u Atua ia faahiti au ia outou i roto i ta ’u mau pure,  a faarooroo noa ’i au i to outou faaroo e to outou here no te Fatu ra* o Iesu e no te feia mo‘a atoa.*  Te pure nei au e maoti to oe faaroo e te faaroo o to oe mau taeae e farii ai oe e mea na roto i te Mesia te mau mea maitatai atoa ta mâua e fana‘o nei.  Ua oaoa e ua mahanahana roa hoi to ’u aau i te faaroorooraa i to oe here, no te mea maoti oe, to ’u taeae, i tamahanahanahia ’i te aau o te feia mo‘a.  No reira, noa ’tu e e mana rahi to ’u i te i‘oa o te Mesia no te faaue ia oe e rave i te mea tia,  e mea maitai a‘e na ’u e taparu ia oe no to oe here, no te mea ua ruhiruhia vau o Paulo nei, e ua tapea-atoa-hia nei no te Mesia ra o Iesu. 10  Te taparu nei au ia oe no ta ’u tamaiti o Onesimo, ua riro hoi au ei metua no ’na a tapeahia ’i au.* 11  E tîtî faufaa ore oia no oe na mua ’‘e, i teie nei râ, e mea faufaa oia no tâua. 12  Te faaho‘i atu nei au ia ’na, ta ’u hoi e here nei, ia oe ra. 13  Te hinaaro nei hoi au e tapea mai ia ’na no te tavini ia ’u ei mono ia oe a tapea-noa-hia ’i au no te parau apî oaoa.* 14  Aita râ vau e hinaaro ra e rave i te tahi mea maori noa râ ia farii oe, ia rave oe i ta ’u e ani atu eiaha ma te faahepohia, ma te aau tae râ. 15  No reira paha oia i horo ê ai maa taime poto,* ia parahi tamau oia ia oe ra ua ho‘i ana‘e mai oia, 16  eiaha faahou ei tîtî, hau a‘e râ i te hoê tîtî, ei taeae ta ’u e here rahi nei, ta oe râ e here rahi atu â, i te pae tino e i roto i te Fatu. 17  Mai te peu hoi e e hoa* vau no oe, a farii maitai ia ’na mai te mea ra o vau tera. 18  E mai te peu e ua pau oe ia ’na aore ra e tarahu ta ’na ia oe, na ’u ïa e faaho‘i atu. 19  Te papai atu nei au, o Paulo, i to ’u iho rima: e faaho‘i atu iho â vau. Ua ite hoi oe e e tarahu ta oe ia ’u, to oe iho ora. 20  Oia mau to ’u taeae, ia tauturu mai oe ia ’u no to tâua hoêraa e te Fatu. A haamahanahana i to ’u aau na roto i to oe hoêraa e te Mesia. 21  Te tiaturi nei au e e na reira iho â oe, no reira ïa vau e papai atu ai, ua ite hoi au e e rave hau atu â oe i ta ’u e ani atu ra. 22  A faanaho atoa mai na râ i te hoê piha no ’u, te tiai nei hoi au ia faaho‘ihia ’tu vau ia outou ra* maoti ta outou mau pure. 23  Te aroha ’tu nei o Epaphera to ’u hoa i roto i te tapearaa tei hoê e te Mesia ra o Iesu, 24  na reira atoa o Mareko, o Arisetareho, o Dema e o Luka, to ’u mau hoa ohipa. 25  Ei ia outou te hamani maitai rahi o te Fatu ra o Iesu Mesia a faaite ai outou i te huru feruriraa tano.

Nota i raro i te api

Aore ra “i te Fatu ra.”
Aore ra “i te feia mo‘a atoa.”
“A taamuhia ’i au i te fifi auri” na roto i te reo Heleni.
Aore ra “evanelia.”
“Hoê hora” na roto i te reo Heleni.
“Apiti” na roto i te reo Heleni.
Aore ra “ia tuuhia ’tu vau no outou.”