Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Petero 2, 3:1-18

HAAPOTORAA O TE MAU TUMU PARAU

  • Eita te feia faaooo e tâu‘a i te parau o te haamouraa e piri mai ra (1-7)

  • E ere Iehova i te mea taere (8-10)

  • Feruri i teihea huru taata e titauhia ’i ia riro outou (11-16)

    • Te mau ra‘i apî e te hoê fenua apî (13)

  • Haapao maitai ia ore outou ia hema (17, 18)

3  Taeae here ma, teie te piti o te rata ta ’u e papai atu nei ia outou. I roto i teie rata mai ta ’u rata matamua, te faaaraara nei au i to outou haro‘aro‘a ma te haamana‘o atu i te tahi mau parau,  ia haamana‘o hoi outou i te mau parau i parauhia i mutaa iho* e te mau peropheta mo‘a, e te faaueraa ta te Fatu e Faaora i horoa na roto i ta outou mau aposetolo.  Na mua roa, ua ite outou e i te mau mahana hopea e tia mai te feia faaooo e ta ratou mau parau faaooo, a ohipa ’i ia au i to ratou iho mau hinaaro  e a na ô ai: “Teihea ’tura te tau o to ’na ho‘iraa mai* i fafauhia? Mai te mahana i taoto ai to tatou mau tupuna i roto i te pohe, te vai noa nei â te mau mea atoa te huru â te huru, mai te omuaraa mai â i to te Atua poieteraa i te taata.”  Aita hoi ratou e hinaaro ra e haamana‘o e i vai na i mutaa iho te mau ra‘i e te hoê fenua tei maraa mai no raro mai i te pape e e pape to nia ’‘e maoti te parau a te Atua.  E i teie mau mea i mou ai te ao o taua tau ra i te diluviraahia te reira i te pape.  Tera râ, maoti taua noa parau ra i faataahia ’i te mau ra‘i e te fenua e vai nei no te auahi e i tapeahia ’i e tae roa i te mahana haavaraa e haamouraa o te feia faatura ore i te Atua.  Tera râ, eiaha ia mo‘e ia outou, taeae here ma, no Iehova* hoê mahana hoê ïa tausani matahiti, e hoê tausani matahiti hoê ïa mahana.  E ere Iehova* i te mea taere i te faatupu i ta ’na parau fafau mai ta vetahi e mana‘o ra, mea faaoromai râ oia ia outou, no te mea aita oia e hinaaro ra ia haamouhia te hoê, te hinaaro nei râ ia noaa i te taata atoa te tatarahapa. 10  Tera râ, e tae mai to Iehova* mahana mai te eiâ ra, i reira te mau ra‘i e mou ai ma te haruru rahi, area te mau mea tumu veavea roa, e pau ïa, e te fenua e te mau ohipa i nia iho, e faaite-roa-hia mai ïa. 11  I te mea e e pau teie mau mea atoa mai teie te huru, a feruri ïa i teihea huru taata e titauhia ’i ia riro outou. Ei taata haerea mo‘a ïa e o te rave i te mau ohipa tei taaihia i te haamoriraa i te Atua ana‘e, 12  a tiai noa ’i e a haamana‘o noa ’i* i te taeraa mai o te mahana o Iehova,* i reira e mou ai te mau ra‘i i te auahi e e tahe ai te mau mea tumu i te âhu rahi! 13  Te tiai nei râ tatou i te mau ra‘i apî e te hoê fenua apî ia au i ta ’na i fafau, e i reira e vai noa ’i te parau-tia. 14  No reira, taeae here ma, i te mea e te tiai nei outou i teie mau mea, a imi i te mau ravea atoa a itehia ’tu ai outou e te Atua ei mea viivii ore e te hapa ore e i roto i te hau. 15  Hau atu â, a hi‘o i te faaoromai o to tatou Fatu ei faaoraraa, mai ta Paulo atoa to tatou taeae here i papai ia outou ia au i te paari i horoahia mai ia ’na, 16  i te faahitiraa i teie mau mea mai ta ’na i na reira i roto i ta ’na mau rata atoa. Tera râ, mea fifi ia taa i te tahi mau parau i roto i taua mau rata ra, e te taviri nei te feia ite ore* e te paruparu i taua mau parau ra e te toea atoa o te mau Papai, e e mou ratou. 17  No reira, outou taeae here ma, ua ite ê na outou i teie mau mea, a haapao maitai ïa ia ore outou ia hema i te haavare a te feia ofati ture e ia ore outou iho e paruparu. 18  Tera râ, ia fana‘o atu â outou i te hamani maitai rahi e te ite i to tatou Fatu e Faaora ra o Iesu Mesia. Ei ia ’na te hanahana i teie nei e a muri noa ’tu. Amene.

Nota i raro i te api

Aore ra “te mau tohu.”
Heleni parusia. A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
Aore ra “a hinaaro rahi ai.” “A faaru ai” na roto i te reo Heleni.
A hi‘o i te titionare.
Aore ra “haapii-ore-hia.”