Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Petero 2, 2:1-22

HAAPOTORAA O TE MAU TUMU PARAU

  • E tia mai te mau orometua haavare (1-3)

  • E haavahia iho â te mau orometua haavare (4-10a)

    • Te mau melahi i hurihia i Taretaruso (4)

    • Diluvi, Sodoma e Gomora (5-7)

  • Haerea o te mau orometua haavare (10b-22)

2  Tera râ, i tia atoa mai na te mau peropheta haavare i rotopu i te nunaa Iseraela, e tia atoa mai ïa te mau orometua haavare i rotopu ia outou. E haamau omo‘e ratou i te mau pǔpǔ faaroo amaha o te tuino i to outou faaroo, e e faarue atoa ratou i te fatu tei hoo mai ia ratou, a faatae oioi mai ai i te haamouraa i nia ia ratou.  E mea rahi te pee i ta ratou mau peu faufau,* e no ratou e faainohia ’i te e‘a o te parau mau.  E no to ratou nounou e faahema ’i ratou ia outou na roto i te mau parau haavarevare ia apîhia ratou. Eita râ to ratou haavaraa, tei faaoti-a‘ena-hia, e haamaoro, e e tae mai iho â to ratou haamouraa.  Oia mau ua faautua te Atua i te mau melahi tei rave i te hara e ua huri ia ratou i Taretaruso,* a taamu atu ai ia ratou i roto i te poiri* ta‘ota‘o, a faataa ’tu ai no te haavaraa.  E ua faautua oia i te hoê ao i tahito ra, ua faaora râ ia Noa taata poro i te parau-tia e e hitu â taata i to ’na hopoiraa mai i te diluvi i nia i te hoê ao taata faatura ore i te Atua.  E ua faautua atoa oia i na oire o Sodoma e o Gomora ma te faariro atu ei rehu, a riro atu ai te reira ei faaararaa i te mau taata faatura ore i te Atua no a muri a‘e.  E ua faaora oia ia Lota taata parau-tia, tei mauiui roa no te mau peu faufau a te feia ofati ture.*  (I mauiui roa na hoi taua taata parau-tia ra i tera e tera mahana no te mau ohipa ino ta ’na i ite e i faaroo a ora ’i oia i rotopu ia ratou.)  No reira, ua ite Iehova* i te faaora i te feia e haamori ra ia ’na ana‘e i te mau ati, i te faataa râ i te feia parau-tia ore ia haamouhia* i te mahana haavaraa, 10  te feia iho â râ e imi ra i te haaviivii i te tino o vetahi ê, e vahavaha atoa ra i te mana faatere.* Ma te taiâ ore e te faaahaaha, aita ratou e mǎta‘u ra i te faaino i te feia hanahana o te Atua, 11  area te mau melahi tei hau a‘e i te puai e te mana, aita ïa e pari faaino ra i te mau orometua haavare no to ratou faatura* ia Iehova.* 12  Area teie mau tane, te faaino nei ïa i te mau mea aita ratou i ite. E haamouhia ratou no to ratou iho haerea ino, mai te mau animara aita e feruriraa o te fanauhia ia haruhia e ia haapohehia, 13  e hamani-ino-hia ratou ei utua no ta ratou iho ohipa ino. Mea au na ratou te oraraa fana‘o,* oia atoa i te ao. E tafetafeta ratou o te au roa i te haavare i te taata i te mau haapiiraa hape a tamaa ’i e o ratou atoa. 14  Ua î to ratou mata i te faaturi e eita ratou e fiu i te rave i te hara, e te faahema ra i te feia* paruparu. Ua matau to ratou aau i te nounou i ta vera ma. E tamarii faautuahia ratou e te Atua. 15  A faarue ai ratou i te e‘a maitai, ua atea ê ratou. Ua pee ratou i te e‘a o Balaama te tamaiti a Beora, o tei nounou i te moni o te ohipa ino, 16  ua faaitehia râ ta ’na hapa no to ’na ofatiraa i te mea tia. Ua tamata te hoê asini paraparau ore o tei paraparau ma te reo taata i te tapea i te peropheta ia ore ia rave i te ohipa ino. 17  E apoo pape ore teie mau tane e e rupehu turaihia e te vero puai, e o te poiri ta‘ota‘o tei faataahia no ratou. 18  Te parau ra ratou i te mau parau faaahaaha faufaa ore. Ma te faaara i te mau hinaaro tia ore o te tino e ma te mau peu faufau,* te faahema ra ratou i te mau taata no faataa ê noa mai ra ia ratou, i te feia e ora ra i roto i te haavare. 19  A fafau atu ai ratou i te tiamâraa, e tîtî ratou iho no te mau ohipa viivii. O tei faaterehia hoi e te tahi atu, e tîtî ïa oia no taua taata ra.* 20  Te feia hoi o tei faataa ê mai ia ratou i te mau mea viivii a teie nei ao maoti te ite papu i te Fatu e Faaora ra o Iesu Mesia, e ua rave faahou i taua mau mea ra, a faaterehia ’tu ai e te reira, mea ino roa ’tu ïa to ratou hopea nei i to na mua ’tu. 21  Mea maitai a‘e hoi ahiri aita ratou i ite papu i te e‘a o te parau-tia, i te ite-papu-raa i te reira a fariu ê atu ai i te faaueraa mo‘a i horoahia ia ratou. 22  Ua tano maitai ïa no ratou teie parau paari: “Ua ho‘i te urî e amu i ta ’na i piha‘e, e te maiaa puaa i mâ e taaviriviri i roto i te vari.”

Nota i raro i te api

Aore ra “to ratou haerea haama ore.” A hi‘o i te titionare.
A hi‘o i te titionare.
Nehenehe atoa e hurihia “a huri atu ai ia ratou i roto i te apoo o te poiri.”
Aore ra “te haerea haama ore o te feia ofati ture.” A hi‘o i te titionare.
A hi‘o i te titionare.
“Tâpû-ê-hia” na roto i te reo Heleni.
Oia hoi te Atua e te feia ta ’na i faatoroa.
Aore ra “i mua.”
A hi‘o i te titionare.
Oia hoi e tamaa, e inu, e arearea.
Heleni pusuke. A hi‘o i te titionare.
Aore ra “haerea haama ore.” A hi‘o i te titionare.
Aore ra “O tei faaterehia hoi e te tahi mea, e tîtî ïa oia no taua mea ra.”