Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Petero 2, 1:1-21

HAAPOTORAA O TE MAU TUMU PARAU

  • Aroharaa (1)

  • Ia mau papu ia outou to outou titau-manihini-raahia (2-15)

    • Huru maitatai apitihia i te faaroo (5-9)

  • Ua papu roa ’tu â te parau a te mau peropheta (16-21)

1  O Simona Petero, e tavini e e aposetolo na Iesu Mesia, i te feia i noaa ia ratou te hoê faaroo faufaa rahi mai to matou, na roto i te parau-tia a to tatou Atua e i ta te Faaora o Iesu Mesia:  Ei ia outou te hamani maitai rahi e te hau e ia rahi atu â na roto i te ite papu i te Atua e i to tatou Fatu ra o Iesu,  no te mana o te Atua i noaa mai ai te mau mea atoa e ora ’i tatou ma te haamori i te Atua ana‘e na roto i te ite papu ia ’na, o tei titau manihini ia tatou na roto i to ’na iho hanahana e huru maitai roa.  Na roto i teie nau mea i horoa noa mai ai oia i te mau parau fafau faufaa rahi e te faahiahia mau, ia riro hoi outou ei varua mai ia ’na ma te haapae i te mau peu viivii a teie nei ao ta te mau hinaaro tia ore* e faatupu.  No reira, a tutava maite i te apiti i to outou faaroo te huru maitai roa, i to outou huru maitai roa te ite ïa,  i to outou ite te haavîraa ïa ia outou iho, i to outou haavîraa ia outou iho te faaoromai tamau ïa, i to outou faaoromai tamau te haamoriraa ïa i te Atua ana‘e,  i ta outou haamoriraa i te Atua ana‘e te here* i te mau taeae ïa, i to outou here* i te mau taeae te here ïa.  Mai te peu e te vai ra teie mau huru maitatai i roto ia outou e ia rahi atu â, eita ïa outou e faatau, e nuu râ outou i mua i te faaohiparaa i te ite papu i to tatou Fatu ra o Iesu Mesia.  Te taata hoi e ere ra i teie mau huru maitatai, e matapo ïa, te tapo nei oia i to ’na mata i te maramarama, e ua mo‘e ia ’na e ua tamâhia oia i ta ’na mau hara tahito. 10  No reira taeae ma, a tutava ’tu â ia mau papu ia outou to outou titau-manihini-raahia e maitiraahia. Ia na reira noa hoi outou, eita roa ’tu ïa outou e faarue i te faaroo. 11  Ia na reira hoi outou, e haamaitai-rahi-hia outou a ô atu ai i roto i te Faatereraa arii mure ore a to tatou Fatu* e Faaora ra o Iesu Mesia. 12  No reira, e hinaaro noa vau e haamana‘o ia outou i teie mau parau, noa ’tu e ua ite outou i te reira e ua mau papu i roto i te parau mau e vai ra ia outou ra. 13  Mea tano râ i to ’u mana‘o, a ora noa ’i au i roto i teie nei tiahapa, ia haamana‘o noa ’tu vau ia outou i teie mau parau, 14  ua ite hoi au e fatata vau i te vaiiho i to ’u tiahapa, mai ta to tatou Fatu ra o Iesu Mesia i haapapu atoa ia ’u. 15  E imi noa vau i te mau ravea atoa ia haamana‘o noa outou iho i teie mau parau ua reva ana‘e au. 16  E ere mea na roto i te mau aai a te taata i faaite ai matou ia outou i te puai o to tatou Fatu ra o Iesu Mesia e te tau o to ’na ho‘iraa mai,* ua ite mata roa râ matou i to ’na hanahana. 17  Ua noaa hoi ia ’na te tura e te hanahana no ǒ mai i te Atua te Metua, i to te Atua hanahana* parauraa ’tu ia ’na i teie mau parau: “O ta ’u Tamaiti teie, tei herehia e au, ta ’u iho i mauruuru roa.” 18  Oia mau, ua faaroo matou i teie mau parau no te ra‘i mai i to matou tiaraa e o ’na i nia i te mou‘a mo‘a. 19  No reira, ua papu roa ’tu â ia tatou te parau a te mau peropheta, e ua tano outou i te haapao maitai i te reira mai te hoê lamepa i te hoê vahi poiri (e aahiata noa ’tu e a hiti mai ai te hoê fetia poipoi) i roto i to outou aau. 20  Ua ite hoi outou i teie parau faufaa: aita hoê a‘e parau tohu i roto i te mau Papai i niuhia i nia i te mana‘o taata. 21  E ere hoi na te hinaaro o te taata i hopoi mai i te parau tohu, ua faahiti râ te taata i te mau parau no ǒ mai i te Atua a arataihia ’i* ratou e te varua mo‘a.

Nota i raro i te api

Aore ra “hinaaro vî ore.”
Heleni phileo.
Heleni phileo.
Aore ra “Basileia mure ore o to tatou Fatu.”
Heleni parusia. A hi‘o i te titionare.
“I to taua reo ra” na roto i te reo Heleni.
“A amohia ’i” na roto i te reo Heleni.