Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Petero 1, 4:1-19

HAAPOTORAA O TE MAU TUMU PARAU

  • Ora no te hinaaro o te Atua, mai te Mesia i na reira (1-6)

  • Fatata te hopea o te mau mea atoa (7-11)

  • Ia fifi te hoê taata no te mea e Kerisetiano oia (12-19)

4  I te mea e i mauiui na te Mesia a ora ’i oia ei taata, ia ineine atoa ïa outou i te faaite i te hoê â huru feruriraa,* no te mea te taata i mauiui, ua faaea ïa i te rave i te hara,  ia nehenehe hoi oia e ora i te toea o to ’na oraraa ei taata, eiaha faahou no te rave i te mau hinaaro o te taata, i te hinaaro râ o te Atua.  Ua ravai hoi te tau i mutaa iho ra i rave ai outou i te hinaaro o te feia o teie nei ao, oia hoi te mau peu faufau,* te mau hinaaro vî ore, te inu-hua-raa, te mau arearearaa ahoahoa, te inu faataero e te haamoriraa idolo faufau.  Te maere ra ratou e aita outou e horo faahou ra e o ratou i taua mau peu hairiiri ra, e no reira, te faaino ra ratou ia outou.  Tera râ, e fa‘i teie mau taata i ta ratou i rave i te Mesia tei ineine i te haava i te feia ora e te feia pohe.  No reira te parau apî oaoa i faaite-atoa-hia ’i i te feia pohe,* noa ’tu hoi e te haavahia ra ratou ia au i te raveraa a te taata, e nehenehe râ ratou e ora ma te arataihia e te varua o te Atua.  Ua fatata râ te hopea o te mau mea atoa. No reira, ei mana‘o paari to outou, e a ara eiaha ia haamo‘e i te pure.  Ia here rahi iho â râ outou te tahi i te tahi, no te mea e tapo‘i te here i te hara e rave rahi.  A farii maitai te tahi i te tahi ma te mutamuta ore. 10  Ua fana‘o outou tataitahi i te hoê ô, a faaohipa ïa i te reira no te tavini te tahi i te tahi mai te mau tiaau maitai roa tei fana‘o i te hamani maitai rahi o te Atua i faaitehia na roto i te mau ravea huru rau. 11  Ia paraparau te hoê taata, ia na reira oia mai te mea ra e e poroi no ǒ mai i te Atua. Ia tavini te hoê taata, ia na reira oia ma te turui i nia i te puai ta te Atua e horoa, a faahanahanahia ’tu ai te Atua i te mau mea atoa na roto ia Iesu Mesia. No ’na te hanahana e te mana e a muri noa ’tu. Amene. 12  Taeae here ma, eiaha e maere i te mau ati u‘ana e au i te auahi ta outou e faaruru nei, mai te mea ra e te roohia ra outou i te tahi mea huru ê. 13  Ia oaoa noa râ outou i te mea e te mauiui atoa ra outou mai te Mesia i mauiui, a nehenehe atu ai outou e oaoa roa i te taime atoa e faaitehia mai ai to ’na hanahana. 14  Ia faaino-noa-hia ’tu* outou no te i‘oa o te Mesia, te oaoa nei outou, no te mea tei nia iho ia outou te varua hanahana o te Atua. 15  Tera râ, eiaha te hoê o outou ia fifi ei taparahi taata, eiâ, ohipa ino aore ra faaô i roto i ta vera ma ohipa. 16  Ia fifi râ te hoê taata no te mea e Kerisetiano oia, eiaha oia e haama, ia tamau noa râ i te faahanahana i te Atua a amo ai oia i teie i‘oa. 17  Teie hoi te tau faataahia no te haavaraa i te utuafare o te Atua na mua. I teie nei, mai te peu e o tatou na mua, eaha ïa te faahopearaa no te feia aita e faaroo ra i te parau apî oaoa a te Atua? 18  “E mai te peu e e ere mea ohie e ora ’tu ai te taata parau-tia, eaha ïa te tupu i nia i te taata faatura ore i te Atua e te taata rave hara?” 19  No reira, te feia e fifi nei i te raveraa i te hinaaro o te Atua, ia tamau noa ïa i te tuu i to ratou ora* i roto i te rima o te Atua poiete haapao maitai, a rave ai i te maitai.

Nota i raro i te api

Aore ra “hoê â mana‘o papu.”
Aore ra “haerea haama ore.” A hi‘o i te titionare.
Pohe i te pae varua te auraa. A hi‘o i te Ephesia 2:1.
Aore ra “tuhi-noa-hia ’tu.”
Heleni pusuke. A hi‘o i te titionare.