Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Petero 1, 3:1-22

HAAPOTORAA O TE MAU TUMU PARAU

  • Vahine faaipoipo e tane faaipoipo (1-7)

  • Faaite i te aumauiui, imi i te hau (8-12)

  • Mauiui no te parau-tia (13-22)

    • Ia ineine i te paturu i ta outou e tiaturi ra (15)

    • Bapetizoraa e mana‘o haava maitai (21)

3  Oia atoa outou te mau vahine faaipoipo, a auraro i ta outou iho tane, ore noa ’tu â ratou e faaroo i te parau a te Atua, e nehenehe ratou e taui eiaha maoti te parau, maoti râ te haerea o ta ratou iho vahine,  no te mea ua ite roa ’tu ratou i to outou haerea mâ e to outou faatura rahi.  Eiaha ei faanehenehe rapaeau noa to outou, mai te rouru firi e te faaneheneheraa auro aore ra te ahu moni rahi,  ei faanehenehe râ i te rotoraa o to outou aau i te faaneheneheraa mou ore o te hau e te mǎrû, faufaa rahi hoi to te reira i te aro o te Atua.  Mai te reira hoi te mau vahine mo‘a tei tiaturi i te Atua i tahito ra, ia faanehenehe ia ratou, ma te auraro i ta ratou iho tane faaipoipo,  mai ia Sara i faaroo ia Aberahama, a pii ai ia ’na e fatu. E ua riro outou ei tamahine na ’na, ia tamau noa râ outou i te rave i te maitai e ia ore ia riaria i te tahi noa ’‘e mea.  Oia atoa outou te mau tane faaipoipo, a tamau noa i te parahi e o ratou ia au i te ite.* A faatura i te vahine mai te hoê farii paruparu a‘e, i te mea e e fatu atoa ratou e o outou i te ô horoa noa o te ora. Aita ana‘e, eita ta outou mau pure e faaroohia e te Atua.  E outou paatoa, ia hoê â* to outou mana‘o, a faaite ai i te aumauiui, te here* i te mau taeae, te aumihi î i te here e te haehaa.  Eiaha e tahoo i te ino i te ino aore ra te tuhi i te tuhi. Tera râ, a haamaitai atu, no teie hoi haerea i titau-manihini-hia ’i outou, ia nehenehe outou e fatu i te hoê haamaitairaa. 10  Inaha “te taata mea au na ’na te ora e e hinaaro e ite i te mau mahana oaoa, ia tapea ïa i to ’na arero ia ore ia parau i te mea ino e to ’na vaha i te parau haavare. 11  Ia fariu ê mai oia i te mea ino e ia rave i te mea maitai. Ia imi oia i te hau e ia tapi i te reira. 12  Tei nia iho hoi te mata o Iehova* i te feia parau-tia, e te faaroo ra to ’na tari‘a i ta ratou taparuparuraa, te patoi nei râ Iehova* i te feia e rave ra i te mau mea ino.” 13  Oia mau, ia itoito rahi outou i te rave i te mea maitai, o vai hoi o te hamani ino ia outou? 14  Ia mauiui noa ’tu râ outou no te parau-tia, te oaoa ra outou. Eiaha râ e riaria i ta ratou e riaria ra,* eiaha atoa e horuhoru. 15  I roto râ i to outou aau, a farii e mea mo‘a te Mesia e e Fatu oia. Ia ineine noa outou i te paturu i ta outou e tiaturi ra i mua i te taata atoa o te ui mai i te tumu o te reira, ia na reira râ ma te mǎrû e te faatura rahi. 16  Ei mana‘o haava maitai noa to outou, a haama ’tu ai te feia o te faaino ia outou i te mau huru faainoraa atoa no to outou haerea maitai ei pǐpǐ na te Mesia. 17  Mea maitai a‘e hoi ia mauiui no te mea te rave ra outou i te maitai, mai te peu e tera te hinaaro o te Atua, eiaha râ no te mea te rave ra outou i te ino. 18  Ua pohe hoi te Mesia hoê roa poheraa no te mau hara, te hoê taata parau-tia no te feia parau-tia ore, no te aratai ia outou i te Atua ra. Ua haapohehia oia ei taata, ua faatiahia mai râ ei varua. 19  E ei varua oia i te haereraa e poro i te mau varua i roto i te tapearaa, 20  o tei faaroo ore i mutaa ihora a tiai ai te Atua ma te faaoromai i te tau o Noa, a hamanihia ’i te araka, i roto i taua araka ra i ora mai ai e va‘u ana‘e taata* na roto atu i te pape. 21  I te bapetizoraa o te faahoho‘a ra i te reira e ora atoa ’i outou i teie nei na roto i te tia-faahou-raa o Iesu Mesia (e ere te bapetizoraa i te tamâraa i te repo o te tino, o te aniraa râ i te Atua i te hoê mana‘o haava maitai). 22  Tei te pae atau oia o te Atua, ua haere hoi oia i te ra‘i, e ua tuuhia i raro a‘e ia ’na te mau melahi e tei horoahia ’tu te mana e te puai.

Nota i raro i te api

Aore ra “i te tâu‘a ia ratou,” “i te taa i to ratou huru.”
Aore ra “ia tu.”
Heleni phileo.
A hi‘o i te titionare.
A hi‘o i te titionare.
Nehenehe atoa e hurihia “ta ratou mau haamǎta‘uraa.”
Heleni pusuke. A hi‘o i te titionare.