Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Petero 1, 2:1-25

HAAPOTORAA O TE MAU TUMU PARAU

  • Hiaai i te parau a te Atua (1-3)

  • Te mau ofai ora patuhia ei fare pae varua (4-10)

  • E taata ěê i roto i teie nei ao (11, 12)

  • Auraroraa e tano (13-25)

    • E hi‘oraa te Mesia no tatou (21)

2  No reira, a haapae i te ino atoa e te haavare e te haavarevare e te nounou e te faaino atoa.  Mai te mau aiû fanau-apî-hia, ia hiaai outou i te û anoi-ore-hia* o te parau a te Atua, ia nehenehe outou e paari mai i te pae varua maoti te reira, a ora ’tu ai outou,  ua tamata* hoi outou e mea hamani maitai te Fatu.  A faafatata ’i outou ia ’na, te hoê ofai ora tei faaruehia e te taata, tei maitihia râ e te Atua e mea faufaa roa no ’na,  te patuhia nei outou iho mai te mau ofai ora ei fare pae varua ia riro outou ei tahu‘a mo‘a no te pûpû i te mau tusia pae varua e fariihia e te Atua na roto ia Iesu Mesia.  Te na ô ra hoi te mau Papai: “Inaha, te haamau nei au i Ziona i te hoê ofai maitihia, te hoê ofai tihi* faufaa roa, e te taata o te faatupu i te faaroo i te reira, e ore roa ïa e tatarahapa.”*  No outou ïa e mea faufaa roa ’i oia, no te mea te tiaturi ra outou ia ’na. Area no te feia aita e tiaturi ra ia ’na, “te ofai ta te feia patu fare i faarue, ua riro mai ïa ei ofai tihi”*  e “ei ofai turoriraa e ei mato hi‘araa.” Te turori nei ratou, no te mea e mea faaroo ore ratou i te parau a te Atua. Tera atoa te hopea e tiai mai ra ia ratou.  Outou râ, “e opu maitihia ïa, e autahu‘a arii, e nunaa mo‘a, e pǔpǔ taata hoohia mai no te Atua, ia faaite haere hoi outou i te mau huru maitatai roa” o tei titau manihini ia outou mai roto mai i te poiri i to ’na maramarama faahiahia. 10  E ere hoi outou i te hoê nunaa na mua ’‘e, teie nei râ e nunaa ïa no te Atua. Aita outou i arohahia* mai na mua ’‘e, teie nei râ ua arohahia* mai ïa. 11  Taeae here ma, te ani ru nei au ia outou, te taata ěê e purutia ra, ia haapae i te mau hinaaro tia ore o te tino e aro ra ia outou.* 12  Ei haerea maitai noa to outou i rotopu i te mau nunaa, ia pari noa ’tu hoi ratou ia outou i te ohipa ino, e ite ïa ratou i ta outou mau ohipa maitai roa, a faahanahana ’tu ai i te Atua i te mahana e hi‘opoa ’i oia i te huitaata. 13  No te Fatu, a auraro i te mau mea atoa ta te taata i hamani,* i te hoê arii anei tei nia ’‘e 14  aore ra i te mau tavana ta ’na i faatoroa no te faautua i te feia ohipa ino, no te haapopou râ i te feia e rave ra i te maitai. 15  O te hinaaro hoi o te Atua ia rave outou i te maitai no te haamamû i* te feia maamaa e parau ra i te mau parau faufaa ore. 16  Ei feia tiamâ outou o te faaohipa i to outou tiamâraa, eiaha no te huna i te ohipa ino, no te tavini râ i te Atua. 17  A faatura i te mau huru taata atoa, a here i te fetii taeae taatoa, a mǎta‘u i te Atua, a faatura i te arii. 18  Ia auraro te mau tavini i to ratou mau fatu ma te mǎta‘u e au ia ratou, eiaha noa i te mau fatu maitai e te mǎrû, i te mau fatu atoa râ eita e mauruuru hanoa. 19  E mauruuru hoi te Atua i te taata o te faaoromai tamau i te ati* e o te mauiui ma te tano ore no to ’na mana‘o haava i te aro o te Atua. 20  Eaha hoi te faufaa ia tairihia outou no to outou hararaa e ia faaoromai noa outou i te reira? Tera râ, ia faaoromai noa outou i te mauiui, no te mea te rave ra outou i te maitai, e mauruuru mai ïa te Atua. 21  Inaha, no teie huru haerea i titau-manihini-hia ’i outou, no te mea ua mauiui atoa te Mesia no outou, a vaiiho mai ai i te hi‘oraa ia pee maite outou i to ’na mau taahiraa avae. 22  Aita oia i rave i te hara, aita atoa e haavare i itehia i roto i to ’na vaha. 23  A tuhihia ’i* oia, aita oia i tuhi* atu. A mauiui ai oia, aita oia i haamǎta‘u atu, ua tuu râ ia ’na i roto i te rima o tei haava ma te parau-tia. 24  Ua amo oia i ta tatou mau hara i roto i to ’na iho tino i nia i te pou,* ia nehenehe tatou e tiamâ mai i te hara e e ora ma te parau-tia. E “maoti to ’na mau pepe i maitai mai ai outou.” 25  Mai te mamoe ra hoi outou tei atea ê, i teie nei râ ua ho‘i mai outou i te tiai e te tiaau o to outou ora.*

Nota i raro i te api

Aore ra “maitai.”
Aore ra “ite.”
E tuuhia teie ofai i te poro fare i te vahi e tuati ai e piti patu.
“E haama” na roto i te reo Heleni.
“Te tupuai o te poro fare” na roto i te reo Heleni.
Aore ra “aroha-hamani-maitai-hia.”
Aore ra “aroha-hamani-maitai-hia.”
Heleni pusuke. A hi‘o i te titionare.
Aore ra “i faanaho.”
“Tapiri i te vaha o” na roto i te reo Heleni.
Aore ra “oto.”
Aore ra “faainohia ’i.”
Aore ra “faaino.”
Aore ra “raau.”
Heleni pusuke. A hi‘o i te titionare.