Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 9:1-43

HAAPOTORAA O TE MAU TUMU PARAU

  • Saulo e haere ra i Damaseko (1-9)

  • Tonohia Anania no te tauturu ia Saulo (10-19a)

  • Poro Saulo no nia ia Iesu i Damaseko (19b-25)

  • Tere Saulo i Ierusalema (26-31)

  • Faaora Petero i te ma‘i o Ainea (32-35)

  • Faatia-faahou-hia mai Doreka aau horoa noa (36-43)

9  Area Saulo, o te haamǎta‘u noa ra i te mau pǐpǐ a te Fatu a hinaaro noa ’i e taparahi pohe ia ratou, haere atura ïa i te tahu‘a rahi ra.  Ani atura i te rata ta ’na e faaite i te mau sunago i Damaseko, ia nehenehe oia e tapea i te tane e te vahine atoa e pee ra i Te E‘a e e afai ia ratou i Ierusalema.  Teie râ, a haere noa ’i oia i to ’na tere e a fatata ’i oia i te tae i Damaseko, anaana ihora te maramarama no te ra‘i mai e ati a‘e ia ’na.  Marua ihora oia i raro e faaroo a‘era i te hoê reo i te na ôraa mai: “Saulo, Saulo, eaha oe e hamani ino ai ia ’u?”  Ui atura Saulo: “O vai oe?” Na ô maira te Fatu: “O Iesu, ta oe e hamani ino nei.  A tia râ i nia e a haere i roto i te oire, i reira e faaitehia ’tu ai ia oe eaha ta oe e rave.”  Te mau tane râ tei na muri atoa mai ia Saulo, maere ihora ïa. Inaha, e reo ta ratou e faaroo ra, aita râ e ite ra o vai te paraparau ra.  Tia a‘era Saulo i nia. Te araara noa ra to ’na mata, aita râ e ite ra. Aratai rima ’tura taua mau tane ra ia ’na e tae roa ’tu i Damaseko.  E toru mahana to ’na vai-matapo-noa-raa. Aita atoa oia i tamaa e i inu i te pape. 10  I Damaseko, te vai ra te hoê pǐpǐ o Anania te i‘oa. Na ô maira te Fatu ia ’na i roto i te hoê orama: “Anania!” Parau atura oia: “Teie au, to ’u Fatu.” 11  Na ô maira te Fatu: “A tia, a haere i te aroâ parauhia Afaro, a imi i te hoê taata o Saulo te i‘oa no Tareso i te fare o Iuda. Inaha, te pure nei oia. 12  Ua ite orama oia ia oe Anania i te tomoraa i roto i te fare e i te tuuraa i to oe na rima i nia iho ia ’na ia ite faahou o ’na.” 13  Pahono atura râ Anania: “To ’u Fatu, mea rahi te parau ta ’u i faaroo no taua taata ra, ua hamani ino oia i to oe mau taata mo‘a i Ierusalema. 14  E mana atoa to ’na no ǒ mai i te mau tahu‘a tiaau e tapea i te taata atoa e faahiti ra i to oe i‘oa.” 15  Na ô maira râ te Fatu: “A haere, no te mea e farii maitihia e au tera taata no te faaite i to ’u nei i‘oa i te mau nunaa ěê, i te mau arii e i te mau tamarii* Iseraela. 16  E faataa maitai hoi au ia ’na i te mauiui rahi ta ’na e faaruru no to ’u i‘oa.” 17  Haere atura Anania e tomo atura i roto i te fare, tuu ihora i to ’na na rima i nia iho ia Saulo e na ô atura: “Saulo, to ’u taeae, na te Fatu ra o Iesu, tei fa ’tu ia oe ra i nia i te purumu ta oe i haere mai, i tono mai ia ’u ia ite faahou oe e ia î oe i te varua mo‘a.” 18  Topa ihora te tahi mea e au i te poa i‘a no roto mai i to ’na na mata, ite faahou atura oia, tia a‘era e bapetizohia ’tura. 19  Tamaa ihora oia e itoito maira. Faaea ihora oia tau mahana i ǒ te mau pǐpǐ ra i Damaseko, 20  e poro ihora i roto i te mau sunago e o Iesu te Tamaiti a te Atua. 21  Teie râ, maere ihora te feia atoa e faaroo ra ia ’na e na ô a‘era: “E ere anei teie te taata i hamani ino u‘ana i te feia e faahiti ra i te i‘oa o Iesu i Ierusalema? Aita anei o ’na i haere mai i ǒ nei no te tapea i te feia e na reira atoa ra e no te afai ia ratou i te mau tahu‘a tiaau ra?” 22  O Saulo râ, noaa noa ’tura ïa ia ’na te puai e haamamû ihora i te ati Iuda e parahi ra i Damaseko, a haapapu ai oia e o Iesu te Mesia. 23  E rave rahi mahana i muri iho, opua a‘era te ati Iuda e haapohe ia Saulo. 24  Faaitehia ’tura râ ia Saulo ta ratou opuaraa. Te tiai atoa ra ratou i te mau uputa o te oire i te rui e te ao no te haapohe ia ’na. 25  Rave a‘era ïa ta ’na mau pǐpǐ ia ’na, e i te po haapou ihora ia ’na i roto i te hoê farii na roto atu i te hoê haamaramarama o te patu o te oire. 26  I to ’na taeraa ’tu i Ierusalema, tamata ihora oia i te amui atu i te mau pǐpǐ. Mǎta‘u a‘era râ ratou pauroa ia ’na, no te mea aita ratou i tiaturi e ua riro mai o ’na ei pǐpǐ. 27  No reira, tauturu atura Baranaba ia Saulo, aratai atura ia ’na i te mau aposetolo ra, e faatia ’tura e i ite na Saulo i te Fatu i nia i te purumu, i paraparau na te Fatu ia ’na e i faahiti na Saulo i te i‘oa o Iesu ma te mǎta‘u ore i Damaseko. 28  No reira, faaea ihora Saulo ia ratou ra, a haere noa ’i na te mau vahi atoa i* Ierusalema e a paraparau ai i te taata i te i‘oa o te Fatu ma te mǎta‘u ore. 29  E aparau e e mârô oia i te ati Iuda paraparau Heleni. Ua imi râ ratou i te haapohe ia ’na. 30  I to te mau taeae iteraa i te reira, aratai a‘era ratou ia ’na i Kaisarea e faareva ’tura ia ’na i Tareso. 31  E inaha, vai a‘era te amuiraa e ati a‘e Iudea, Galilea e Samaria i roto i te hau, itoito atura e a faaite noa ’i ratou i te mǎta‘u ia Iehova* e a tamahanahanahia ’i ratou e te varua mo‘a, rahi noa maira te amuiraa. 32  Teie râ, a ratere ai Petero na taua mau vahi atoa ra, haere atoa ’tura oia i te feia mo‘a ra e parahi ra i Luda. 33  Ite ihora oia i reira i te hoê tane o Ainea te i‘oa, a va‘u atura matahiti to ’na tarava-noa-raa i nia i te ro‘i, e hapepa hoi oia. 34  Na ô atura Petero ia ’na: “Ainea, te faaora nei Iesu Mesia i to oe ma‘i. A tia i nia e a faanehenehe i to oe ro‘i.” I reira iho, tia maira oia. 35  I te iteraa mai to Luda e to Sarona taatoa ia ’na, tiaturi a‘era ratou i te Fatu. 36  Teie râ, i Iopa, te vai ra te hoê pǐpǐ o Tabita te i‘oa, “Doreka”* te auraa ia hurihia. Mea rahi roa ta ’na ohipa maitatai e mea horoa roa oia i te ô aroha hamani maitai.* 37  Tera râ, i taua mau mahana ra, ma‘ihia ihora oia e pohe atura. Horoi a‘era ratou ia ’na e vaiiho atura ia ’na i roto i te hoê piha i nia. 38  I to te mau pǐpǐ faarooraa e tei Luda Petero, e mea fatata hoi taua oire ra ia Iopa, tono a‘era ratou e piti tane e taparu ia ’na ia haavitiviti i te haere mai. 39  Tia a‘era Petero e pee atura ia raua. I to ’na taeraa ’tu, aratai a‘era raua ia ’na i roto i te piha i nia, tia noa ihora te mau vahine ivi atoa na pihai iho ia ’na, a ta‘i noa ’i e a faaite mai ai i te ahu atoa ta Doreka i nira na. 40  Tuu atura Petero i te taata atoa i rapaeau, tuturi ihora e pure atura. Hi‘o atura oia i taua tino ra, e na ô atura: “Tabita, a tia!” Araara a‘era to Tabita mata, ite ihora ia Petero e parahi maira. 41  Rave maira Petero i to ’na rima, tauturu ihora ia ’na ia tia mai, pii atura i te feia mo‘a e te mau vahine ivi e faaite atura ia Tabita tei ora mai. 42  Atutu atura taua parau ra na Iopa taatoa e tiaturi a‘era e rave rahi i te Fatu. 43  Faaea ihora Petero tau mahana i Iopa i ǒ te hoê taata rapaau iri o Simona te i‘oa.

Nota i raro i te api

“Tamaiti” na roto i te reo Heleni.
“A haere ai i roto e i rapae ia” na roto i te reo Heleni.
A hi‘o i te titionare.
“Zabi” te auraa o te i‘oa Heleni Doreka e te i‘oa Arama Tabita, mai te hoê ïa aili ufa.
Aore ra “ô no te feia veve.” A hi‘o i te titionare.