Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 8:1-40

HAAPOTORAA O TE MAU TUMU PARAU

  • Saulo te taata hamani ino (1-3)

  • Ta Philipa taviniraa manuïa i Samaria (4-13)

  • Tonohia Petero raua Ioane i Samaria (14-17)

  • Tamata Simona i te hoo mai i te varua mo‘a (18-25)

  • Te taata tiaraa teitei Etiopia (26-40)

8  Area Saulo, ua turu ïa i te haapoheraahia Setephano. I taua mahana ra, hamani-ino-rahi-hia ihora te amuiraa i Ierusalema, purara ê atura te mau pǐpǐ atoa na Iudea e na Samaria eiaha râ te mau aposetolo.  Teie râ, rave a‘era te tahi mau taata mǎta‘u i te Atua ia Setephano, huna ihora ia ’na e oto roa ’tura ratou ia ’na.  Area Saulo, hamani ino u‘ana ihora ïa i te amuiraa. E tomo oia i roto i tera e tera fare, a arato mai ai i te tane e te vahine i rapae, e a huri atu ai ia ratou i roto i te tapearaa.  Teie râ, faaite haere atura te mau pǐpǐ tei purara ê i te parau apî oaoa o te parau a te Atua na Iudea e na Samaria.  Area Philipa, pou ihora ïa i te oire o Samaria* e poro atura i to reira mau taata no nia i te Mesia.  Haapao maitai a‘era ratou pauroa i ta Philipa i parau, a faaroo noa ’i ia ’na e a ite ai i te mau semeio ta ’na e rave ra.  Mea rahi hoi e varua viivii to ratou. E tutuô teie mau varua ino a haere mai ai i rapae i taua mau taata ra. Mea rahi atoa te hapepa e te piri‘o‘i, ua ora to ratou ma‘i.  Oaoa roa a‘era te mau taata o taua oire ra.  Teie râ, te vai ra i taua oire ra te hoê taata o Simona te i‘oa, tei rave na i te peu tahutahu, a faahiahia ’tu ai to Samaria ia ’na. I parau atoa na oia e e taata mana o ’na. 10  Pee a‘era ratou pauroa, te taata haihai e tae noa ’tu te taata tiaraa teitei, ia ’na e na ô a‘era: “Teie taata, o te Mana ïa o te Atua, parauhia Mana rahi.” 11  Ua pee ratou ia ’na no te mea i faahiahia maoro na ratou ia ’na no ta ’na peu tahutahu. 12  I to Philipa râ faaiteraa i te parau apî oaoa o te Faatereraa arii a te Atua* e o te i‘oa o Iesu Mesia, tiaturi a‘era te tane e te vahine ia ’na e bapetizohia ’tura ratou. 13  Tiaturi atoa maira Simona ia Iesu, e i muri a‘e i to ’na bapetizoraahia, na muri noa ’tura oia ia Philipa. Ua maere oia i te iteraa i te mau tapao e te mau ohipa mana rahi ta Philipa e rave ra. 14  Faaroo a‘era te mau aposetolo i Ierusalema e ua farii to Samaria i te parau a te Atua, tono atura ia Petero e ia Ioane ia ratou ra, 15  pou ihora raua e pure atura no ratou ia noaa ia ratou te varua mo‘a. 16  Aita â hoi te varua mo‘a i tau maira i nia iho ia ratou, ua bapetizo-noa-hia râ ratou i te i‘oa o te Fatu ra o Iesu. 17  Tuu atura ïa raua i to raua rima i nia iho ia ratou e noaa maira ia ratou te varua mo‘a. 18  I to Simona râ iteraa e na roto i te tuuraa rima a na aposetolo e noaa mai ai te varua mo‘a, parau atura oia e e horoa oia i te moni na raua, 19  a na ô ai: “Horoa atoa mai na i tena mana no ’u, ia tuu hoi au i to ’u rima i nia iho i te taata, a noaa ’tu ai ia ratou te varua mo‘a.” 20  Na ô atura râ Petero: “Ia mou ta oe moni e oe atoa, no te mea ua mana‘o oe e e nehenehe oe e hoo mai i te ô ta te Atua e horoa noa. 21  Aita ta oe e tuhaa i roto i teie taviniraa, e aau haavare hoi to oe i te aro o te Atua. 22  No reira, a tatarahapa e a haapae i tena ino to oe. A taparuparu ia Iehova,* peneia‘e oia i te faaore mai i te mana‘o ino o to oe aau. 23  Te ite nei hoi au e e taero toavaava oe, e tîtî atoa no te parau-tia ore.” 24  Pahono maira Simona: “A taparuparu na orua ia Iehova* no ’u ia ore au e roohia i ta orua i parau mai.” 25  I muri a‘e i to raua poro-maite-raa e faaiteraa i te parau a Iehova,* ho‘i atura raua i Ierusalema a faaite ai i te parau apî oaoa na te oire rii e rave rahi i Samaria. 26  Tera râ, parau maira te hoê melahi a Iehova* ia Philipa: “A haere i te pae apatoa i te purumu e pou atu i Gaza mai Ierusalema mai.” (E purumu teie i te medebara.) 27  Haere atura Philipa e farerei atura i te hoê taata tiaraa teitei* Etiopia. E taata mana oia no Kaneda arii vahine no Etiopia, o te tiaau i ta ’na mau tao‘a atoa. I haere na oia i Ierusalema e haamori i te Atua, 28  e te ho‘i ra na nia i to ’na pereoo, a taio haapuai noa ’i i te buka a te peropheta Isaia. 29  Na ô maira te varua mo‘a ia Philipa: “A tapapa i tera pereoo.” 30  Horo atura Philipa i pihai iho i te pereoo e faaroo ihora i taua taata ra e taio haapuai ra i te buka a Isaia te peropheta. Na ô atura oia: “Te taa ra ia oe* ta oe e taio ra?” 31  Parau maira taua taata ra: “E nahea e taa ’i ia ’u ia ore au e haamaramaramahia?” Ani maira oia ia Philipa ia pauma mai e ia parahi i pihai iho ia ’na. 32  Teie hoi te parau tohu ta ’na e taio ra: “Mai te hoê mamoe oia i te aratairaahia i te tupairaa, e mai te hoê arenio* e mamû noa i mua i te taata e paoti i to ’na huruhuru, eita to ’na vaha e parau noa ’‘e. 33  A faainohia ’i oia, aita oia i haavahia ma te parau-tia. No te mea e haapohehia oia i te fenua nei, na vai ïa e faaite mai i to ’na pǎpǎraa tupuna?” 34  Na ô maira te taata tiaraa teitei ia Philipa: “Faaite mai na, no vai teie parau a te peropheta? No ’na anei aore ra no te tahi atu taata?” 35  Faataa ’tura Philipa i taua parau tohu ra e faaite atura i te parau apî oaoa no Iesu. 36  Teie râ, a tere noa ’i raua na nia i te purumu, tae atura raua i te hoê vahi pape. Na ô maira te taata tiaraa teitei: “A hi‘o na, e pape to ǒ nei. Eaha te tapea ra ia ’u ia ore ia bapetizohia?” 37  *—— 38  Faaue ihora te taata tiaraa teitei e tapea i te pereoo, pou ihora raua Philipa i raro i te pape e bapetizo atura Philipa ia ’na. 39  I to raua haereraa mai i rapae i te pape, faareva ihora te varua o Iehova* ia Philipa. Aita ’tura te taata tiaraa teitei i ite faahou ia ’na, tamau noa ’tura râ i to ’na tere ma te oaoa. 40  Area Philipa, ite ihora ïa e tei Asadoda oia e faaite noa ’tura i te parau apî oaoa na te mau oire rii atoa e tae roa ’tu i Kaisarea.

Nota i raro i te api

Nehenehe atoa e hurihia “te hoê oire no Samaria.”
Aore ra “Basileia o te Atua.”
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
“Eunuka” na roto i te reo Heleni. A hi‘o i te titionare.
Aore ra “Te maramarama ra oe i.”
Aore ra “fanau‘a mamoe.”
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
A hi‘o i te titionare.