Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 7:1-60

HAAPOTORAA O TE MAU TUMU PARAU

  • Paraparau Setephano i mua i te Sunederi (1-53)

    • Tau o te mau patereareha (2-16)

    • Aratairaa a Mose, haamoriraa idolo a Iseraela (17-43)

    • Eita te Atua e parahi i roto i te hiero hamanihia e te rima taata (44-50)

  • Pehihia Setephano i te ofai (54-60)

7  Na ô atura râ te tahu‘a rahi: “Tera iho â anei?”  Pahono maira Setephano: “Taeae ma e outou te feia metua, a faaroo mai na. Ua fa mai te Atua hanahana i to tatou tupuna ra o Aberahama i Mesopotamia hou oia i faaea ’i i Harana,  e ua na ô ia ’na: ‘A faarue i to fenua e to fetii e a haere mai i te fenua ta ’u e faaite ia oe.’  Ua faarue oia i te fenua o to Kaladaio e ua faaea i Harana. I muri a‘e i te poheraa to ’na metua tane, ua aratai mai te Atua ia ’na i teie fenua, ta outou e faaea nei.  Aita râ te Atua i horoa i te hoê tuhaa o teie fenua ia fatu oia, aita hoê noa ’‘e tuhaa iti mai te taahiraa avae te rahi. Ua fafau râ te Atua e horoa i teie fenua no ’na e no to ’na huaai* i muri mai ia ’na, noa ’tu e aita â e tamarii ta Aberahama.  Hau atu â, ua parau te Atua ia ’na e e ora to ’na huaai* i te tahi atu fenua e e faatîtî te taata ia ratou, a haamauiui* atu ai ia ratou e 400 matahiti.  ‘E haava vau i te nunaa e faatîtî ia ratou,’ ta te Atua ïa i parau, ‘e i muri iho e haere mai ratou i rapae e pûpû i te hoê taviniraa mo‘a ia ’u i teie vahi.’  Ua faaau atoa te Atua ia ’na i te hoê faufaa o te peritomeraa, e ua fanau mai ta ’na o Isaaka e ua peritome ia ’na i te va‘u o te mahana, e ua fanau mai ta Isaaka o Iakoba, e ta Iakoba na 12 upoo utuafare.*  Ua pohehae tera mau upoo utuafare ia Iosepha e ua hoo atu ia ’na i to Aiphiti. Tei pihai iho râ te Atua ia ’na, 10  ua faaora mai ia ’na i to ’na mau ati atoa e ua horoa ’tu i te paari e ua farii-maitai-hia oia e Pharao te arii o Aiphiti. Ua faatoroa Pharao ia ’na ei tavana i nia ia Aiphiti e to ’na utuafare taatoa. 11  Teie râ, ua roohia Aiphiti e Kanaana taatoa i te o‘e, e ati rahi mau â, e aita e maa faahou ta to tatou mau tupuna. 12  Ua faaroo râ Iakoba e e maa* tei Aiphiti, e ua tono i to tatou mau tupuna i reira i te taime matamua. 13  I te piti o te taime, ua parau Iosepha i to ’na mau taeae o vai o ’na, e ite atura ïa Pharao i te fetii o Iosepha. 14  Ua poroi Iosepha i to ’na metua tane ia Iakoba e i to ’na fetii atoa, e 75 taata,* ia haere mai ia ’na ra. 15  Ua pou mai Iakoba i Aiphiti e ua pohe i reira, oia atoa to tatou mau tupuna. 16  Ua afaihia ratou i Sekema e ua hunahia i te menema ta Aberahama i hoo mai i te mau tamaiti a Hamora i Sekema. 17  A fatata ’i te taime e tupu ai te parau fafau ta te Atua i faaite ia Aberahama, ua rahi roa mai te nunaa Iseraela i Aiphiti, 18  e tae roa i te taime i tia mai ai te tahi atu arii i Aiphiti, aita i matau ia Iosepha. 19  Ua râmâ oia i to tatou nunaa e ua faahepo ma te haavî i te mau metua tane ia faarue i ta ratou mau aiû ia pohe ratou. 20  I taua tau ra to Mose fanauraahia mai e mea nehenehe oia i te aro o te Atua. Ua faaamuhia oia e toru ava‘e i roto i te fare o to ’na metua tane. 21  Ua faaruehia râ oia, e na te tamahine a Pharao i rave mai ia ’na e i faaamu ei tamaiti na ’na iho. 22  Ua haapiihia ïa Mose i te mau parau paari atoa a to Aiphiti. E mana rahi hoi to ’na i te parau e te ohipa. 23  Teie râ, a raea ’i to ’na e 40 matahiti, ua tupu i roto i to ’na aau te hinaaro* e haere e hi‘o i* to ’na mau taeae, te mau tamarii* Iseraela. 24  I to ’na iteraa e te hamani-ino-hia ra hoê o ratou ma te tano ore, ua paruru oia i to ’na taeae e ua tahoo ma te haapohe i te taata Aiphiti. 25  Ua mana‘o Mose e e taa i to ’na mau taeae e e faaora te Atua ia ratou na roto ia ’na, aita râ i taa ia ratou. 26  I te mahana i muri mai, ua haere oia ia ratou ra a taputô ai e piti o ratou, e ua tamata i te faahau ia raua a na ô atu ai: ‘E homa, e taeae orua, eaha ïa orua e hamani ino ai te tahi i te tahi?’ 27  Ua tiahi râ te taata tei hamani ino i te tahi atu ia Mose a na ô atu ai: ‘Na vai i faatoroa ia oe ei tavana e ei haava i nia ia matou? 28  E haapohe oe ia ’u mai ta oe i haapohe i te taata Aiphiti inanahi ra?’ 29  I to Mose faarooraa i te reira, ua horo ê oia, ua faaea i te fenua Midiana e ua fanau mai ta ’na e toopiti tamaiti. 30  E 40 matahiti i muri iho, ua fa mai te hoê melahi ia ’na i ropu i te hoê raau taratara e ura ra, i te medebara i pihai iho i te mou‘a Sinai. 31  Ua maere Mose i ta ’na i ite. A tapiri atu ai râ oia no te hi‘o maitai i te reira, ua faaroo oia i te reo o Iehova* i te na ôraa: 32  ‘O vau te Atua o to outou mau tupuna, te Atua o Aberahama e to Isaaka e to Iakoba.’ Ua rûrû Mose e ua taiâ roa i te hi‘o maitai atu â. 33  Ua parau mai Iehova* ia ’na: ‘A tatara i te tiaa i to oe na avae, e vahi mo‘a hoi te vahi ta oe e tia nei. 34  Ua ite maitai au e te haavîhia ra to ’u nunaa i Aiphiti, ua faaroo vau i ta ratou autâ, e e pou atu vau e faaora ia ratou. I teie nei, a haere, e tono vau ia oe i Aiphiti.’ 35  Taua Mose ra ta ratou i tiahi a na ô ai: ‘Na vai i faatoroa ia oe ei tavana e ei haava i nia ia matou?’ o ’na ta te Atua i tono ei tavana e ei faaora atoa na roto i te melahi tei fa mai ia ’na i ropu i te raau taratara. 36  Ua aratai mai taua taata ra ia ratou i rapae ma te faatupu i te mau ohipa maere* e te semeio i Aiphiti, i te miti Uteute e i te medebara atoa e 40 matahiti. 37  O taua Mose atoa ra tei parau i te mau tamarii* Iseraela: ‘E faatoroa te Atua no outou, no roto mai i to outou mau taeae, i te hoê peropheta mai ia ’u.’ 38  To rotopu o ’na i te amuiraa i te medebara e ua paraparau te melahi ia ’na i te mou‘a Sinai e to tatou mau tupuna. Ua faaroo oia i te parau ora a te Atua e ua horoa mai ia tatou. 39  Aita to tatou mau tupuna i auraro ia Mose, ua haafaufaa ore râ ia ’na. I roto i to ratou aau, ua hinaaro ratou e ho‘i i Aiphiti, 40  e ua na ô atu ia Aarona: ‘E hamani oe i te atua o te haere na mua ia tatou. Aita hoi tatou i ite te aha mai ra tera Mose tei aratai ia tatou i rapae i te fenua Aiphiti.’ 41  Ua hamani ïa ratou i te hoê puaatoro apî i taua mau mahana ra, ua hopoi i te tusia na taua idolo ra e ua arearea i mua i ta ratou i hamani i to ratou rima. 42  Ua fariu ê te Atua ia ratou e ua vaiiho noa ia ratou ia pûpû i te hoê taviniraa mo‘a i te nuu o te ra‘i, mai tei papaihia i roto i te buka a te mau peropheta: ‘Utuafare o Iseraela, ua pûpû mai anei outou i te animara tupaihia e te tusia ia ’u e 40 matahiti i te medebara? 43  O te tiahapa hoi o Moloha e te fetia o te atua Rephana ta outou i rave, te mau hoho‘a ta outou i hamani no te haamori. No reira, e hopoi ê au ia outou i ǒ roa ’tu i Babulonia.’ 44  E tiahapa o te faaiteraa ta to tatou mau tupuna i te medebara, mai ta te Atua i faaue a parau ai oia ia Mose ia hamani i te reira ia au i te hoho‘a ta ’na i faaite atu. 45  I muri a‘e, ua rave te mau tamarii a taua mau tupuna ra i taua tiahapa ra e ua afai na muri ia ratou, a haere ai ratou e o Iosua i te fenua o te tahi atu mau nunaa, ta te Atua i tiavaru ê i mua i to tatou mau tupuna. E ua vai noa te tiahapa i reira e tae roa i te tau o Davida. 46  Ua farii-maitai-hia Davida e te Atua e ua ani i te haamaitairaa taa ê e hamani i te hoê fare no te Atua o Iakoba. 47  Na Solomona râ i hamani i te hoê fare no ’na. 48  Eita râ te Teitei e parahi i roto i te mau fare hamanihia e te rima taata, mai ta te peropheta i parau: 49  ‘O te ra‘i to ’u terono e o te fenua to ’u taahiraa avae. Teihea huru fare ta outou e hamani no ’u? ta Iehova* ïa e parau ra. Aore ra teihea to ’u vahi faaearaa? 50  E ere na to ’u rima i hamani i teie mau mea atoa?’ 51  Feia etaeta, e te aau e te tari‘a peritome-ore-hia, te patoi noa nei outou i te varua mo‘a. Mai ta to outou mau tupuna i rave, te na reira atoa nei outou. 52  O vai te peropheta aita to outou mau tupuna i hamani ino? Ua haapohe iho â ratou i te feia tei faaite atea e e haere mai te taata parau-tia, ta outou i tuu a‘enei i te rima o te enemi e i haapohe, 53  ia outou hoi i horoahia ’tu ai te ture a Mose na roto i te arai o te mau melahi, aita râ outou i haapao i te reira.” 54  I to ratou faarooraa i teie mau parau, riri roa a‘era ratou i roto i* to ratou aau e hinaaro atura e haamauiui ia ’na. 55  Hi‘o a‘era râ oia tei î i te varua mo‘a i te ra‘i, ite atura i te hanahana o te Atua e ia Iesu e tia ra i te rima atau o te Atua, 56  e na ô atura: “Inaha, te ite ra vau i te ra‘i ua matara e te Tamaiti a te taata nei e tia ra i te rima atau o te Atua.” 57  Tuô a‘era ratou, tuu a‘era i to ratou rima i nia i to ratou tari‘a e horo paatoa ’tura i nia ia ’na. 58  I muri a‘e i to ratou aratoraa ia ’na i rapae i te oire, pehi atura ratou ia ’na i te ofai. Tuu atura te mau ite i to ratou ahu tapo‘i i te pae avae o te hoê taata apî o Saulo te i‘oa. 59  A pehi ai ratou ia Setephano i te ofai, taparu atura oia: “To ’u Fatu Iesu, te tuu atu nei au i to ’u ora* ia oe ra.” 60  Topa turi ihora oia e tuô atura: “Iehova,* eiaha oe e faautua ia ratou no teie hara.” I muri a‘e i to ’na parauraa i te reira, taoto ihora oia i roto i te pohe.

Nota i raro i te api

“Huero” na roto i te reo Heleni.
“Huero” na roto i te reo Heleni.
Aore ra “hamani ino.”
Aore ra “patereareha.”
Aore ra “huero maa.”
Heleni pusuke. A hi‘o i te titionare.
Aore ra “faaoti ihora oia.”
Aore ra “hi‘o eaha te huru o.”
“Tamaiti” na roto i te reo Heleni.
A hi‘o i te titionare.
A hi‘o i te titionare.
Aore ra “tapao.”
“Tamaiti” na roto i te reo Heleni.
A hi‘o i te titionare.
Aore ra “puta roa a‘era.”
Aore ra “puai ora.” Heleni peneuma. A hi‘o i te titionare.
A hi‘o i te titionare.