Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 5:1-42

HAAPOTORAA O TE MAU TUMU PARAU

  • Anania raua Saphira (1-11)

  • Faatupu te mau aposetolo e rave rahi semeio (12-16)

  • Tapeahia e tuuhia (17-21a)

  • I mua faahou i te Sunederi (21b-32)

    • “O te Atua ta matou e auraro e tia ’i, eiaha te taata” (29)

  • A‘oraa a Gamaliela (33-40)

  • Pororaa na tera e tera fare (41, 42)

5  Tera râ, hoo atura te hoê taata o Anania te i‘oa raua ta ’na vahine faaipoipo o Saphira i te hoê fenua.  Teie râ, tapea omo‘e atura o ’na i te hoê tuhaa o te moni, ua ite hoi ta ’na vahine, e hopoi atura i te toea moni i te mau aposetolo ra.  Na ô maira râ Petero: “Anania, no te aha oe i vaiiho ai ia Satani ia faahema ia oe, a haavare atu ai oe i te varua mo‘a e a tapea omo‘e atu ai i te hoê tuhaa o te moni o te fenua?  E ere anei no oe tera fenua? I muri a‘e i to oe hooraa ’tu, e nehenehe oe e faaohipa i te moni mai ta oe i hinaaro, e ere anei? Eaha ïa oe i mana‘o ai e rave i te hoê ohipa ino mai tera? E ere te taata ta oe i haavare, o te Atua râ.”  I to ’na faarooraa i taua parau ra, marua a‘enei Anania e pohe ihora. Mǎta‘u roa a‘era pauroa te feia i faaroo i te reira.  Tia maira te tahi feia apî, vehî a‘era ia ’na i te ahu, amo atura i rapae e huna ’tura ia ’na.  Piri i te toru hora i muri iho, tomo maira ta ’na vahine ma te ite ore i te ohipa i tupu.  Na ô atura Petero ia ’na: “A faaite mai na, teie anei te taatoaraa o te moni o te fenua ta orua i hoo?” Pahono maira oia: “E, tera iho â.”  Parau atura Petero: “Eaha orua i opua ’i e haavare i te varua o Iehova?* A hi‘o na, tei te uputa te feia i huna i ta oe tane faaipoipo, e e amo ratou ia oe i rapae.” 10  I reira iho, marua a‘enei te vahine i te pae avae o Petero e pohe ihora. Tomo maira te feia apî, ite maira ia ’na ua pohe, amo atura ia ’na i rapae e huna ’tura i pihai iho i ta ’na tane faaipoipo. 11  Mǎta‘u roa a‘era te amuiraa taatoa e te feia atoa i faaroo i teie mau mea. 12  Hau atu â, tamau noa ’tura te mau aposetolo i te faatupu i te semeio e te ohipa maere* e rave rahi i rotopu i te taata, e putuputu ihora ratou pauroa i te Anairaa pou a Solomona. 13  Ua taiâ iho â te tahi atu i te amui mai i te mau pǐpǐ. Noa ’tu râ, te faateniteni ra te taata ia ratou. 14  Mea rahi atu â te tane e te vahine tei tiaturi i te Fatu e tei riro ei pǐpǐ. 15  Hopoi atoa maira ratou i te feia ma‘i i te mau aroâ e tuu ihora ia ratou i nia i te mau ro‘i nainai ia raea vetahi e te ata o Petero o te haere mai na reira. 16  Mea rahi atoa to te mau oire fatata ia Ierusalema tei haere noa mai, a hopoi mai ai i te feia ma‘i e te feia haamauiuihia e te mau varua viivii, e ua ora ratou paatoa. 17  Tera râ, tia maira te tahu‘a rahi e to ’na mau hoa, oia hoi te pǔpǔ faaroo amaha Sadukea, ma te riri, e pohehae rahi hoi to ratou. 18  Haru a‘era ratou i te mau aposetolo e tuu ihora ia ratou i roto i te tapearaa. 19  I te po râ, tatara ihora te melahi a Iehova* i te mau uputa o te tapearaa, aratai atura ia ratou i rapaeau e na ô atura: 20  “A haere i te hiero e a tamau i te parau i te taata i te poroi taatoa o te ora.” 21  I muri a‘e i to ratou faarooraa i te reira, haere atura ratou i te hiero i te aahiata e haapii atura i te taata. I te taeraa mai râ te tahu‘a rahi e to ’na mau hoa, haaputuputu a‘era ratou i te Sunederi e te taatoaraa o te mau aratai o te nunaa Iseraela e tono atura i te mau tiai i te tapearaa e tii i te mau aposetolo. 22  I to te mau tiai taeraa i te tapearaa, aita te mau aposetolo i roto. Ho‘i maira ratou e faaite, 23  e parau maira: “Mea ponao-maitai-hia te tapearaa e te tia noa ra te mau tiai i mua i te mau uputa. I to matou râ iritiraa ’tu, aita e taata to roto.” 24  Faaroo a‘era te raatira o te hiero e te mau tahu‘a tiaau atoa i taua mau parau ra, e uiui a‘era eaha te tupu i muri mai. 25  Haere maira râ te hoê taata e parau maira ia ratou: “Tei te hiero te feia ta outou i tuu i roto i te tapearaa e te haapii ra i te taata.” 26  Tii atura te raatira e ta ’na mau tiai i te mau aposetolo e aratai maira ma te faahepo ore, te mǎta‘u ra hoi ratou ia pehi te taata ia ratou i te ofai. 27  Aratai maira ratou i te mau aposetolo i mua i te Sunederi. Uiui atura te tahu‘a rahi ia ratou 28  e na ô atura: “Ua faaue maitai atu matou eiaha e haapii faahou i te taata na nia i teie nei i‘oa. A hi‘o na, ua î Ierusalema ia outou i ta outou haapiiraa, e te hinaaro ra outou e tuu mai i te toto o teie taata i nia ia matou.” 29  Pahono maira Petero e te tahi atu mau aposetolo: “O te Atua ei faatere ta matou e auraro e tia ’i, eiaha te taata. 30  Ua faatia mai te Atua o to tatou mau tupuna ia Iesu, ta outou i haapohe ma te rî ia ’na i nia i te hoê pou.* 31  Ua faateitei te Atua ia ’na ma te haaparahi ia ’na i to ’na rima atau. Ua faatoroa oia ia ’na ei Aratai rahi e ei Faaora, ia tatarahapa to Iseraela a faaorehia ’tu ai ta ratou mau hara. 32  Ua ite matou i tera mau mea, oia atoa te varua mo‘a, ta te Atua ei faatere i horoa ’tu i te feia e auraro ra ia ’na.” 33  Riri* roa a‘era ratou i to ratou faarooraa i te reira e hinaaro atura e haapohe i te mau aposetolo. 34  Tia maira râ te hoê Pharisea o Gamaliela te i‘oa i roto i te Sunederi, e haapii oia i te ture a Mose e mea faaturahia o ’na e te taata atoa. Faaue atura oia ia tuuhia te mau aposetolo i rapaeau maa taime. 35  Na ô atura oia: “Outou to Iseraela, haapao maitai i ta outou e opua ra e rave i nia i teie mau taata. 36  A hi‘o na ia Teuda tei tia mai i mutaa ihora ma te parau e e taata rahi oia. Ua apiti atoa mai piri i te 400 tane ia ’na. Ua haapohehia râ oia e ua purara ê te feia atoa tei pee ia ’na e ua mou. 37  I muri mai ia ’na, tia maira Iuda no Galilea i te mau mahana tapaoraa i‘oa e ume atura i te taata na muri ia ’na. Ua pohe atoa tera taata e ua purara ê pauroa te feia tei pee ia ’na. 38  No reira ’tura, te parau atu nei au ia outou, eiaha e hauti i tena mau taata, a tuu atu râ ia ratou. Na te taata teie opuaraa aore ra ohipa, e mou ïa. 39  Na te Atua râ, eita ïa e mou ia outou. Haapao maitai a aro outou i te Atua.” 40  Faaroo maira ratou i ta ’na a‘oraa, faaho‘i maira i te mau aposetolo i roto, hui* atura ia ratou, faaue atura eiaha e poro faahou ma te i‘oa o Iesu e tuu atura ia ratou. 41  Faarue a‘era te mau aposetolo i te Sunederi ma te oaoa, no te mea ua tia i te Atua ia hamani-ino-hia ratou no te i‘oa o Iesu. 42  E pauroa te mahana i roto i te hiero e i tera e tera fare, ua tamau noa ratou i te haapii i te taata e i te poro i te parau apî oaoa no nia i te Mesia ra o Iesu.

Nota i raro i te api

A hi‘o i te titionare.
Aore ra “tapao.”
A hi‘o i te titionare.
Aore ra “raau.”
Aore ra “Puta.”
Aore ra “rutu.”