Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 4:1-37

HAAPOTORAA O TE MAU TUMU PARAU

  • Haruhia Petero raua Ioane (1-4)

    • 5 000 tane tei tiaturi (4)

  • Haavaraa i mua i te Sunederi (5-22)

    • “Area mâua, eita ïa e tia ia ore e parau” (20)

  • Pure ia noaa te mǎta‘u ore (23-31)

  • Tufa te mau pǐpǐ i ta ratou mau tao‘a (32-37)

4  Te paraparau noa ra Petero raua Ioane i taua mau taata ra, haere maira te mau tahu‘a, te raatira o te hiero e te mau Sadukea.  E riri rahi to ratou no te mea te haapii ra na aposetolo i te taata e te faaite roa ra i te tia-faahou-raa o Iesu mai te pohe mai.  Haru maira ratou ia raua e tuu atura i roto i te tapearaa e ao noa ’tu, ua ahiahi ê na hoi.  Mea rahi râ o te feia o tei faaroo na i te oreroraa parau tei tiaturi, e te rahiraa tane, ua piri ïa i te 5 000.  E ao a‘era, ruru maira i Ierusalema to ratou mau raatira, aratai, ta ratou mau papai parau,  Ana te tahu‘a tiaau, Kaiapha, Ioane, Alesanedero e pauroa te fetii o te tahu‘a tiaau.  Tuu maira ratou ia Petero raua Ioane i ropu ia ratou e ui maira: “I teihea mana aore ra i to vai i‘oa i na reira ’i orua?”  Na ô atura Petero, tei î i te varua mo‘a: “E te mau raatira e aratai,  te haavahia nei mâua i teie mahana no te ohipa maitai i ravehia i nia i teie taata piri‘o‘i, e te hinaaro nei outou e ite na vai i faaora i to ’na ma‘i. 10  Ia ite ïa outou pauroa e te nunaa taatoa o Iseraela e i te i‘oa o Iesu Mesia no Nazareta, ta outou i haapohe i nia i te hoê pou e ta te Atua râ i faatia mai te pohe mai, maoti o ’na e tia ’i teie taata i mua ia outou ma te ma‘i ore. 11  O ’na ‘te ofai ta outou te feia patu i faariro ei mea faufaa ore e tei riro mai ei ofai tihi.’* 12  Ia ite atoa outou e aore roa e ora ia vetahi ê, aita ’tu hoi e i‘oa i raro a‘e i teie nei ra‘i i horoahia mai i te taata, e ora ’i tatou.” 13  I to ratou iteraa i te itoito* o Petero raua Ioane e taaraa e aita raua i haere i te haapiiraa* e aita to raua e tiaraa teitei, maere ihora ratou. Taa a‘era ia ratou e i na muri na raua ia Iesu. 14  A hi‘o noa ’i ratou i te taata ua ora to ’na ma‘i e tia ra i pihai iho ia Petero raua Ioane, aita ratou i pahono atu. 15  Faaue atura ratou i na tane tootoru ia haere i rapaeau i te Sunederi e paraparau a‘era te tahi i te tahi. 16  Na ô a‘era ratou: “E nafea tatou i teie nau taata? Ua rave hoi raua i te hoê semeio faahiahia roa, tei itehia e to Ierusalema taatoa, e eita tatou e nehenehe e parau e aita tatou i ite. 17  E haamǎta‘u ana‘e ïa ia raua ia ore raua e paraparau faahou i te taata ma teie nei i‘oa, e ore ïa teie parau e atutu atu â.” 18  Titau atura ratou ia raua ia ho‘i mai i roto, e faaue atura eiaha roa e paraparau, eiaha atoa e haapii i te taata ma te i‘oa o Iesu. 19  Pahono maira râ Petero raua Ioane: “Mai te peu e mea tia i te aro o te Atua ia faaroo ia outou eiaha râ ia ’na, na outou e hi‘o. 20  Area mâua, eita ïa e tia ia ore e parau i te mau mea ta mâua i ite e i faaroo.” 21  Haamǎta‘u faahou atura ratou ia raua e tuu atura ia haere. Aita hoi i itehia e ratou te tahi tumu e faautua ’i ia raua e te mǎta‘u ra ratou i te taata, no te mea te faahanahana ra ratou pauroa i te Atua no te ohipa i tupu. 22  Ua hau hoi i te 40 matahiti to taua taata ra ua faaora-semeio-hia to ’na ma‘i. 23  I muri a‘e i to raua tuuraahia mai, haere atura raua i te tahi atu mau pǐpǐ e faatia ’tura i ta te mau tahu‘a tiaau e te mau aratai i parau ia raua. 24  I to te mau pǐpǐ faarooraa i te reira, pure a‘era ratou pauroa i te Atua e na ô atura: “To matou Arii hau ê e Fatu, na oe i hamani i te ra‘i e te fenua e te miti e te mau mea atoa i roto, 25  e na oe atoa i parau na roto i to varua mo‘a e na roto i to tavini ra o Davida to matou tupuna: ‘No te aha te mau nunaa i arepurepu ai, e no te aha te taata i feruri ai i te mau mea faufaa ore? 26  Ua tia mai te mau arii o te fenua e ua tahoê te mau raatira no te patoi ia Iehova* e i ta ’na i faatavai.’* 27  Ua amui mau â Heroda raua Ponotio Pilato i to te mau nunaa ěê e to Iseraela i roto i teie nei oire no te patoi i to tavini mo‘a o Iesu ta oe i faatavai, 28  no te rave i tei opua-atea-hia mai e to rima e to hinaaro. 29  I teie nei, Iehova,* haapao mai na oe i ta ratou mau haamǎta‘uraa, e faatia mai na oe i to mau tavini ia faaite i ta oe parau ma te mǎta‘u ore, 30  a toro mai ai oe i to rima no te faaora i te ma‘i e a tupu ai te semeio e te ohipa maere* ma te i‘oa o to tavini mo‘a o Iesu.” 31  Te taparuparu noa ra ratou i te Atua,* aueue ihora te vahi i reira ratou i te putuputuraa, î ihora ratou pauroa i te varua mo‘a e faaite atura i te parau a te Atua ma te mǎta‘u ore. 32  E aau e e mana‘o hoê atoa to te taata e rave rahi tei tiaturi, e aita hoê a‘e o ratou i parau e na ’na ana‘e ta ’na mau tao‘a, ua tufa râ i ta ratou mau mea atoa na te tahi e te tahi. 33  E faaite haere noa ’tura te mau aposetolo ma te mana rahi i te tia-faahou-raa o te Fatu ra o Iesu, e hamani maitai rahi maira te Atua ia ratou pauroa. 34  Inaha, aita hoê a‘e o ratou e ere ra i te tahi mea, te feia atoa hoi e fenua aore ra e fare to ratou, ua hoo atu ïa e ua afai mai i te moni i noaa mai, 35  e ua horoa ’tu i te mau aposetolo, o tei opere na ratou pauroa, ia au i ta te taata tataitahi i hinaaro mau â. 36  E fenua to Iosepha, pii-atoa-hia e te mau aposetolo Baranaba (“Tamaiti o te tamahanahanaraa” te auraa ia hurihia). E ati Levi oia tei fanauhia i Kupero. 37  Hoo atura Iosepha i to ’na fenua, afai maira i te moni e horoa ihora i te mau aposetolo.

Nota i raro i te api

E tuuhia teie ofai i te poro fare i te vahi e tuati ai e piti patu.
Aore ra “mǎta‘u ore.”
Oia hoi te haapiiraa a te mau Rabi. E ere râ te auraa e aita raua i ite i te taio e i te papai.
A hi‘o i te titionare.
Aore ra “ta ’na Mesia.”
A hi‘o i te titionare.
Aore ra “tapao.”
Aore ra “te pure noa ra ratou i te Atua ma te aau atoa.”