Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 3:1-26

HAAPOTORAA O TE MAU TUMU PARAU

  • Faaora Petero i te hoê piri‘o‘i taparu ô (1-10)

  • Oreroraa parau a Petero i te Anairaa pou a Solomona (11-26)

    • ‘Faaho‘ihia te mau mea atoa mai i te matamua ra’ (21)

    • Te hoê peropheta mai ia Mose (22)

3  Te pauma ra Petero raua Ioane i te hiero no te pure, i te iva o te hora,*  te amohia mai ra te hoê taata piri‘o‘i mai to ’na fanauraahia mai. Pauroa te mahana, e tuuhia o ’na i pihai iho i te uputa o te hiero parauhia Nehenehe, no te ani i te ô aroha hamani maitai* i te feia e tomo i roto i te hiero.  I to ’na iteraa mai ia Petero raua Ioane o te haamata ra i te tomo i roto i te hiero, ani maira o ’na i te ô aroha hamani maitai.  Hi‘o atura râ Petero raua Ioane ia ’na e na ô atura Petero: “A hi‘o mai na ia mâua.”  Hi‘o maitai maira oia ia raua, ma te mana‘o e e horoa ’tu raua i te tahi mea.  Na ô atura râ Petero: “Aita ta ’u e ario e te auro, ta ’u râ e vai nei, ta ’u ïa e horoa ’tu. I te i‘oa o Iesu Mesia no Nazareta, a tia i nia e a haere!”  Rave atura Petero i te rima atau o taua taata piri‘o‘i ra e faatia maira ia ’na. Etaeta ihora to ’na nau avae,  ou‘a a‘era o ’na e haere atura. Tomo atura oia e raua atoa i roto i te hiero a haere, a ou‘au‘a e a arue ai i te Atua.  Ite maira te taata atoa ia ’na te haere ra e te arue ra i te Atua. 10  Taa a‘era ia ratou e o ’na tera taata i parahi noa na i te hiero i te uputa parauhia Nehenehe no te ani i te ô aroha hamani maitai, e maere roa ihora i te ohipa i tupu i nia ia ’na. 11  Te tapea noa ra taua taata ra ia Petero raua Ioane, horo maira te taata atoa ma te maere rahi ia ratou ra i te Anairaa pou a Solomona. 12  A ite atu ai Petero, na ô atura oia i taua mau taata ra: “Outou to Iseraela, no te aha outou e maere roa ’i, e no te aha outou e hi‘o noa mai ai ia mâua, mai te mea ra no mâua i haere ai teie taata aore ra no te mea te haamori nei mâua i te Atua? 13  Ua faahanahana te Atua o Aberahama e to Isaaka e to Iakoba, te Atua o to tatou mau tupuna, i ta ’na Tavini ra o Iesu ta outou i tuu i te rima o te enemi e i faarue i mua ia Pilato, tei faaoti na hoi e tuu ia ’na. 14  Ua faarue outou i taua taata mo‘a e te parau-tia ra e ua ani ia tuuhia mai te hoê taparahi taata, 15  area te Aratai rahi tei faatoroahia no te horoa i te ora, ua haapohe ïa outou. Ua faatia mai râ te Atua ia ’na mai te pohe mai, o mâua hoi tei ite i te reira. 16  Maoti to ’na i‘oa e to mâua faaroo i to ’na i‘oa i ora ’i teie taata ta outou e ite nei e i matau. No te faaroo ia ’na i ora roa ’i teie taata i mua ia outou pauroa. 17  I teie nei, taeae ma, ua ite au e aita outou i ite i ta outou i rave na, oia atoa to outou mau raatira. 18  Ua vaiiho râ te Atua i te reira ia tupu te mau mea ta ’na i faaite atea na roto i te mau peropheta atoa, oia hoi e mauiui ta ’na Mesia. 19  No reira, a tatarahapa e a fariu mai ia tumâhia ta outou mau hara, a horoa noa mai ai Iehova* i te anotau haumârû, 20  e ia tono mai oia i te Mesia ta ’na i faatoroa no outou, o Iesu. 21  Ia tiai râ Iesu i nia i te ra‘i e tia ’i e tae noa ’tu i te tau e faaho‘ihia ’i te mau mea atoa mai i te matamua ra. I parau na hoi te Atua i taua mau mea ra na roto i ta ’na mau peropheta mo‘a i tahito ra. 22  Inaha i parau na Mose: ‘E faatoroa Iehova* to outou Atua no outou, no roto mai i to outou mau taeae, i te hoê peropheta mai ia ’u. Ia haapao outou i ta ’na e parau ia outou e tia ’i. 23  Te taata* hoi e ore e faaroo i taua Peropheta ra, e haamou roa ïa te Atua ia ’na.’ 24  Ua faaite atea atoa pauroa te peropheta mai ia Samuela mai â, i taua tau ra. 25  O outou te mau tamarii* a te mau peropheta e no outou te faufaa ta te Atua i faaau i to outou mau tupuna, a na ô ai oia ia Aberahama: ‘Na roto i to huaai* e haamaitaihia ’i te mau fetii atoa o te fenua.’ 26  Ia outou ra na mua i tono mai ai te Atua i ta ’na Tavini, i muri a‘e i to ’na faatoroaraa ia ’na, no te haamaitai ia outou ma te tauturu ia outou pauroa ia haapae i ta outou mau ohipa iino.”

Nota i raro i te api

I te area hora 3 i te taperaa mahana.
Aore ra “ô no te feia veve.” A hi‘o i te titionare.
A hi‘o i te titionare.
A hi‘o i te titionare.
Heleni pusuke. A hi‘o i te titionare.
“Tamaiti” na roto i te reo Heleni.
“Huero” na roto i te reo Heleni.