Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 28:1-31

HAAPOTORAA O TE MAU TUMU PARAU

  • Tae pauroa i uta i Melita (1-6)

  • Faaorahia te ma‘i o te metua tane o Popilio (7-10)

  • Tere i Roma (11-16)

  • Paraparau Paulo i te mau ati Iuda i Roma (17-29)

  • Poro Paulo ma te mǎta‘u ore e piti matahiti (30, 31)

28  I muri a‘e i to matou tae-maitai-raa ’tu i uta, ite a‘era matou e o Melita te i‘oa o te motu.  Hamani maitai* rahi maira to reira mau taata reo ê ia matou. Tahu ihora ratou i te auahi e farii maitai maira ia matou pauroa no te mea te ûa ra e mea to‘eto‘e.  I to Paulo râ ohi-haere-raa i te vahie e tuuraa ’tu i nia i te auahi, ou‘a maira te hoê ophi taero no te âhu e mau maira i nia i to ’na rima.  I to taua mau taata reo ê ra iteraa i te ophi taero e tautau noa ra i nia i to ’na rima, na ô a‘era te tahi i te tahi: “Mea papu e e taparahi taata teie, e noa ’tu e ua ora mai o ’na i te miti, eita o ’na e ora ia Haavaraa.”*  Ueue ihora râ Paulo i taua ophi taero ra i roto i te auahi e aita i mauiui noa ’‘e.  Area ratou, te tiai ra ïa ia oru o ’na aore ra ia topa taue a pohe atu ai. I muri a‘e i to ratou tiai-maoro-raa e iteraa e aita roa ’tu o ’na e ino ra, taui a‘era ratou i te mana‘o e parau atura e e atua o ’na.  I pihai iho mai i taua vahi ra, e fenua to te raatira o taua motu ra o Popilio te i‘oa, ua farii maitai o ’na ia matou ma te hamani maitai ia matou i to ’na fare e toru mahana.  Te tarava noa ra te metua tane o Popilio, e fiva e e hî toto to ’na. Haere atura Paulo i ǒ ’na, pure a‘era, tuu ihora i to ’na na rima i nia iho ia ’na e faaora ’tura i to ’na ma‘i.  I muri a‘e i te reira, haere atoa maira te tahi atu mau taata ma‘i o taua motu ra ia ’na ra, e ora ’tura to ratou mau ma‘i. 10  Hamani maitai atoa maira ratou ia matou ma te ho mai e rave rahi ô, e a fatata ’i matou i te reva, horoa maira ratou i te mau mea atoa ta matou i hinaaro mau. 11  E toru ava‘e i muri iho, fano atura matou na nia i te hoê pahi o te hoho‘a o “Na maehaa a Dia” tei te muaraa o te pahi. No Alesanederia mai taua pahi ra tei tutau na i Melita i te tau to‘eto‘e. 12  Tapae atura matou i Surakusa e faaea ’tura i reira e toru mahana. 13  Mai reira mai reva ’tura matou e tapae atura i Regio. Hoê mahana i muri iho, pûhi maira te mata‘i mai apatoa mai e tae atura matou i Puteoli i te piti o te mahana. 14  I reira itehia maira ia matou te tahi mau taeae o tei parau onoono mai ia faaea ia ratou ra e hitu mahana. Haere tia ’tura ïa matou i Roma. 15  I to te mau taeae i Roma faarooraa i te parau apî no matou, haere roa maira ratou i te Mahora* a Apio e i na Toru fare tipaeraa e farerei ia matou. I to Paulo iteraa ’tu ia ratou, haamauruuru ihora oia i te Atua e itoito atura. 16  I to matou tomoraa ’tu i Roma, faatiahia ’tura Paulo ia parahi i roto i to ’na fare tarahu e te faehau e tiai ra ia ’na. 17  E toru râ mahana i muri iho, titau atura Paulo i te mau raatira ati Iuda. Putuputu maira ratou e na ô atura Paulo: “Taeae ma, aita ta ’u e hara i rave i te nunaa e i te mau peu a to tatou mau tupuna. Noa ’tu râ, ua tapeahia vau i Ierusalema e ua tuuhia i te rima o to Roma. 18  I muri a‘e i to ratou uiuiraa ia ’u, hinaaro a‘era to Roma e tuu ia ’u, aita hoi e tumu e haapohe ai ratou ia ’u. 19  Patoi maira râ te ati Iuda e aita ’tura ta ’u e ravea te parauraa ïa e na Kaisara e haava ia ’u, e ere râ no te pari i to ’u nunaa. 20  No reira vau i ani ai e farerei e e paraparau ia outou, no ta Iseraela hoi i tiaturi noa na i taamuhia ’i au i teie nei fifi auri.” 21  Na ô maira ratou: “Aita ta matou e rata no Iudea mai no nia ia oe, e aita atoa te mau taeae no reira mai i faatia aore ra i parau mai i te tahi ohipa ino no nia ia oe. 22  Te hinaaro nei râ matou e faaroo ia oe ia faaite mai i to oe mana‘o, inaha ua ite iho â matou e mea faainohia taua pǔpǔ faaroo amaha ra i te mau vahi atoa.” 23  Faataa ’tura ratou i te mahana e farerei ai ratou ia Paulo, e haere rahi maira ratou ia ’na ra i to ’na nohoraa. E mai te poipoi e ahiahi noa ’tu, faataa maitai atura Paulo i te parau o te Faatereraa arii a te Atua,* e haaferuri atura ia ratou no nia ia Iesu i nia i te ture a Mose e te mau papai a te mau peropheta. 24  Tiaturi a‘era vetahi i ta ’na i parau. Area te tahi atu, aita ïa. 25  No te mea e te mârô ra te tahi i te tahi, haamata ’tura ratou i te purara e parau atura Paulo: “Ua tano iho â to te varua mo‘a parauraa na roto ia Isaia te peropheta i to outou mau tupuna, 26  a na ô ai: ‘A haere i teie nunaa ra e a parau atu: “E faaroo iho â outou, eita roa râ e taa i te auraa. E hi‘o iho â outou, eita roa râ e ite. 27  Ua etaeta hoi te aau o teie nunaa, ua tapiri ratou i to ratou tari‘a e ua tapo i to ratou mata, ia ore roa hoi to ratou mata e ite e to ratou tari‘a e faaroo e to ratou aau e taa i te auraa e ia ore roa ratou e ho‘i mai, a ore atu ai au e faaora ia ratou.”’ 28  Ia ite ïa outou e ua faaite-haere-hia teie faaoraraa no ǒ mai i te Atua ra i te mau nunaa ěê, e faaroo mai iho â ratou.” 29  *—— 30  Faaea noa ’tura ïa Paulo e piti matahiti taatoa i roto i to ’na fare tarahu, a farii maitai ai i te feia atoa e haere mai ia ’na ra, 31  a poro atu ai i te Faatereraa arii a te Atua e a haapii roa ’tu ai ia ratou* no nia i te Fatu ra o Iesu Mesia ma te ore o ’na e haafifihia.

Nota i raro i te api

Oia hoi hamani maitai i te taata tupu.
Heleni Dike, peneia‘e te ruahine o te tahoo aore ra te haavaraa faataatahia.
I reira te taata e hoohoo ai e e ruru ai.
Aore ra “Basileia o te Atua.”
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
Aore ra “a haapii ai ia ratou ma te mǎta‘u ore.”