Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 27:1-44

HAAPOTORAA O TE MAU TUMU PARAU

  • Fano Paulo i Roma (1-12)

  • Tupu te vero (13-38)

  • Parari te pahi (39-44)

27  I te faaotiraahia e e reva matou i Italia, tuuhia ’tura Paulo e te tahi atu feia mau auri ia Iulio ra, te hoê raatira o te pǔpǔ faehau a Auguso.  Haere atura matou i nia i te hoê pahi no Aderamitio o te faareva ra i te mau pae fenua Asia e fano atura matou. O matou Arisetareho, taata Makedonia no Tesalonia, te revaraa.  E ao a‘era, tapae atura matou i Sidona, hamani maitai* maira Iulio ia Paulo, e faatia maira ia ’na ia haere i to ’na ra mau hoa e ia aupuru ratou ia ’na.  I to matou revaraa mai reira ’tu, fano atura matou na pihai iho ia Kupero, mea na mua mai hoi te mata‘i.  Tere atura matou na tua i Kilikia e i Pamephulia e tapae atura i Mura i Lukia.  I reira, ite atura te raatira faehau i te hoê pahi no Alesanederia e faareva ra i Italia, e aratai atura ia matou i nia i taua pahi ra.  Tere rii mǎrû noa ’tura matou e rave rahi mahana, e tapae atura i Kenido ma te fifi. No te mea e mea na mua mai te mata‘i, na pihai iho atura matou ia Kereta i te tereraa i Salimone.  A tere noa ’i matou ma te fifi na taua pae fenua ra, tapae atura matou i te hoê vahi parauhia Uahu papu, i pihai iho i te oire o Lasea.  E rave rahi mahana tei mairi e mea atâta hoi ia tere na nia i te pahi, e no te mea ua oti ê na atoa te haapaeraa maa o te Mahana taraehara, na ô maira Paulo 10  ia ratou: “E homa, ua ite au e e tupu te fifi e te pau rahi i roto i teie tere, te taihaa e te pahi, e nehenehe atoa tatou* e pohe.” 11  Tera râ, faaroo atura te raatira faehau i te pairati e te fatu pahi, eiaha râ i ta Paulo i parau mai. 12  I te mea e ere te uahu i te mea papu no te tutau i te tau to‘eto‘e, parau a‘era te rahiraa e mea maitai a‘e ia faarue i taua vahi ra, a hi‘o atu ai e e nehenehe anei ratou e tutau i Phoiniki, te hoê uahu i Kereta e fariu tia ra i te pae apatoerau hitia o te râ e i te pae apatoa hitia o te râ. 13  I te puihauraa mai te mata‘i no apatoa mai, mana‘o ihora ratou e e tapae ratou i Phoiniki. Huti maira ratou i te tutau i nia, e fano atura na pihai iho i te fenua o Kereta. 14  Aita râ i maoro roa, farara maira te hoê mata‘i rahi no apatoerau hitia o te râ* mai. 15  No te u‘ana o te mata‘i e tairi ra i nia i te pahi, aita ’tura i tia ia matou ia faaû atu, vaiiho atura râ i te pahi ia painu noa na. 16  Fano atura matou na pihai iho i te hoê motu iti ra o Kalauda te i‘oa. Mai ore roa râ te poti e taverehia mai ra i te muriraa o te pahi i noaa mai ia matou. 17  Huti maira ïa ratou i te poti i nia e imi atura i te ravea no te taamuamu i te pahi. E no to ratou mǎta‘u ia îri te pahi i nia i te mau puu one i roto i te miti,* tuu ihora ratou i te mau taura o te ie e painu noa ’tura te pahi. 18  No te mea e te taueue noa ra te pahi no te vero, huri atura ratou i te tahi mau taihaa i roto i te miti i te mahana i muri iho ia mâmâ te pahi. 19  E i te toru o te mahana, huri atura ratou i te tahi mau taura o te pahi i roto i te miti. 20  I te mea aita te mahana e te mau fetia i itehia e rave rahi mahana e te tairi noa mai ra te vero u‘ana, aita ’tura matou i tiaturi faahou e e ora matou. 21  I muri a‘e e rave rahi mahana aita ratou i tamaa, tia a‘era Paulo i rotopu ia ratou e na ô ihora: “E homa, ahiri outou i haapao i ta ’u parau e eiaha e fano mai Kereta ’tu, eita ïa outou e û i teie fifi e teie pau. 22  Teie nei râ, te parau atu nei au ia outou ia faaitoito, eita hoi te hoê* o outou nei e pohe, o te pahi noa râ te parari. 23  Inapo ra, ua tia mai te hoê melahi a te Atua ta ’u e haamori e e pûpû ra i te hoê taviniraa mo‘a, i pihai iho ia ’u 24  e ua na ô mai: ‘Eiaha e mǎta‘u Paulo. E tae iho â oe i Roma e e tia ’tu oe i mua ia Kaisara. Inaha e faaora te Atua i te feia atoa e fano ra e o oe.’ 25  No reira a faaitoito, e homa, te tiaturi nei hoi au i te Atua, e rave iho â oia mai ta te melahi i parau mai. 26  Teie râ, ia îri tatou i nia i te tahi motu e tia ’i.” 27  I te 14raa o te po, i te tuiraa po, a taueue noa ’i te pahi i nia i te miti Aderia, mana‘o a‘era te mau mataro e te fatata ’tu ra ratou i te tahi fenua. 28  Faito ihora ratou i te hohonu o te miti e itea maira e 36 metera.* Tere rii atura ratou e faito faahou a‘era, itea maira e 27 metera.* 29  Mǎta‘u a‘era ratou a‘unei te pahi e hurihia ’i i nia i te to‘a, taora ihora ïa ratou e maha tutau o te muriraa o te pahi e tiai ru atura ia ao. 30  Tamata a‘era râ te mau mataro i te faarue i taua pahi ra e i te tuu i te poti i raro i te miti mai te huru ra e te tuu ra ratou i te tutau o te muaraa o te pahi. 31  Na ô atura Paulo i te raatira faehau e i te mau faehau: “Ia ore teie nei feia e faaea noa i nia i te pahi, eita outou e ora.” 32  Tâpû ihora ïa te mau faehau i te mau taura o te poti e vaiiho atura ia topa ’tu te poti i raro. 33  Hou rii a ao ai, faaitoito ihora Paulo ia ratou pauroa ia tamaa, a na ô ai: “Teie mahana, o te 14raa ïa o te mahana to outou tiai-noa-raa ma te mana‘ona‘o e to outou oreraa e tamaa. 34  Te faaitoito nei ïa vau ia outou ia tamaa no to outou maitai, eita hoi te hoê o outou e pohe.” 35  I muri a‘e i to ’na parauraa i te reira, rave ihora oia i te faraoa, haamauruuru a‘era i te Atua i mua ia ratou pauroa, ofati ihora i te faraoa* e tamaa ’tura. 36  Itoito maira ïa ratou pauroa e tamaa ’tura. 37  E 276 matou pauroa i nia i te pahi. 38  I muri a‘e i to ratou paiaraa, huri ihora ratou i te sitona i roto i te miti ia mâmâ te pahi. 39  I te aoraa, aita i taa ia ratou teihea fenua tera, ta ratou noa e ite atura, te hoê ïa ooa e te one i tatahi. Mana‘o a‘era ratou e peneia‘e e nehenehe ta ratou e faaîri i te pahi i tatahi. 40  Tâpû ihora ïa ratou i te mau taura tutau e faarue atura i roto i te miti, tatara atoa a‘era i te mau taura tapea o na hôe faatere e piti, huti ihora i te ie nainai ia pûhi te mata‘i i te pahi i tatahi. 41  Teie râ, û atura te pahi i nia i te hoê vahi papa‘u e îri atura. Mau ihora te muaraa o te pahi e aita ’tura i taueue faahou. Area te muriraa o te pahi, hu‘ahu‘a ’tura ïa i te are. 42  Faaoti ihora te mau faehau e haapohe i te feia mau auri ia ore ratou e ǎu a ora ’tu ai. 43  Area te raatira faehau, no to ’na hinaaro e faaora ia Paulo, tapea ihora ïa ia ratou ia ore ia tupu ta ratou opuaraa. Faaue ihora oia i te feia tei ite i te ǎu ia ou‘a i roto i te miti e ia ǎu i uta, 44  a na muri atu ai te toea, a tapii ai vetahi i te mau iri raau e vetahi i te mau hu‘ahu‘a o te pahi. Tae maitai atura ratou pauroa i uta.

Nota i raro i te api

Oia hoi te hamani maitai i te taata tupu.
Heleni pusuke. A hi‘o i te titionare.
“Eurokaludo” na roto i te reo Heleni.
“Sureti” na roto i te reo Heleni. A hi‘o i te titionare
Heleni pusuke. A hi‘o i te titionare.
Aore ra “20 umi.” A hi‘o i te titionare.
Aore ra “15 umi.” A hi‘o i te titionare.
Aore ra “pane.”