Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 26:1-32

HAAPOTORAA O TE MAU TUMU PARAU

  • Faataa Paulo ia Ageripa i te ohipa i tupu (1-11)

  • Faataa Paulo i to ’na fariuraa i te Atua (12-23)

  • Pahonoraa a Fesito e ta Ageripa (24-32)

26  Na ô maira Ageripa ia Paulo: “E nehenehe oe e paraparau no nia i ta ratou pariraa ia oe.” Toro ihora ïa Paulo i to ’na rima e haamata ’tura i te paraparau:  “No nia i te mau ohipa atoa ta te ati Iuda i pari ia ’u, arii Ageripa, te oaoa nei au i te paraparau ia oe i teie mahana,  no te mea iho â râ e ua ite maitai oe i te mau peu atoa e te mau mârôraa a te ati Iuda. No reira, te taparu nei au ia oe ia faaroo maite mai ia ’u.  Ua ite maitai te ati Iuda atoa i to ’u huru oraraa mai to ’u apîraa mai i rotopu i to ’u nunaa e i Ierusalema.  Ahiri ratou i hinaaro, ua faaite ïa ratou ia oe e e Pharisea vau na mua ’‘e, te pǔpǔ faaroo amaha etaeta roa ’‘e o ta tatou haamoriraa.  I teie râ mahana, te haavahia ra vau no te tiaturiraa o ta te Atua i fafau i to tatou mau tupuna.  Te tiai atoa nei na opu 12 o to tatou nunaa ia tupu taua parau fafau ra, a pûpû maite ai ratou i te hoê taviniraa mo‘a i te Atua i te po e te ao. No taua tiaturiraa ra i parihia ’i au e te ati Iuda, arii Ageripa.  No te aha outou e ore ai e tiaturi e e faatia mai te Atua i te feia pohe?  No ’u nei, ua mana‘o roa vau e ia faaohipa vau i te mau ravea atoa no te patoi i te i‘oa o Iesu no Nazareta. 10  O ta ’u iho â ïa i rave i Ierusalema e ua huri au e rave rahi o te feia mo‘a i roto i te tapearaa, ua horoa mai hoi te mau tahu‘a tiaau i te mana. E ia haapohehia ratou, ua turu vau i te reira. 11  Ua hamani ino pinepine au ia ratou i roto i te mau sunago atoa no te faahepo ia ratou ia haapae i to ratou faaroo. E no to ’u riri rahi ia ratou, ua tae roa vau i roto i te tahi atu mau oire no te hamani ino ia ratou. 12  O to ’u ïa tere i to ’u haereraa i Damaseko ma te mana e ma te faauehia mai e te mau tahu‘a tiaau. 13  I te avatea ite ihora vau, arii Ageripa, i te maramarama anaana a‘e i to te mahana no te ra‘i mai e ati a‘e ia ’u e i te feia tei na muri mai ia ’u. 14  Marua ihora matou pauroa i raro e faaroo atura vau i te hoê reo i te parauraa mai na roto i te reo Hebera: ‘Saulo, Saulo, eaha oe e hamani ino mai ai ia ’u? Ia patu noa oe i te patia,* e pepe oe.’ 15  Teie râ, na ô atura vau: ‘O vai oe?’ Na ô maira te Fatu: ‘O Iesu ta oe e hamani ino nei. 16  A tia râ i nia e a tia noa mai. Ua fa ’tu vau ia oe no te maiti ia oe ei tavini e ei ite no te mau mea ta oe i ite e no te mau mea ta ’u e faaite ia oe no nia ia ’u. 17  E faaora vau ia oe i teie nunaa e i te mau nunaa ěê, ia ratou hoi e tono ai au ia oe i teie nei 18  ia araara to ratou mata, ia fariu mai ratou mai te poiri mai i te maramarama e mai te mana o Satani mai i te Atua, ia faaorehia hoi ta ratou mau hara e ia fatu ratou i ta te Atua e horoa na te feia mo‘a no to ratou faaroo ia ’u.’ 19  No reira, arii Ageripa, ua rave au i ta Iesu i faaue mai i roto i taua orama ra. 20  Ua poroi au i to Damaseko na mua e to Ierusalema i muri iho, to Iudea taatoa e te mau nunaa ěê atoa, ia tatarahapa e ia fariu i te Atua ma te rave i te mau ohipa e faaite ra i to ratou tatarahapa. 21  Tera te tumu i haru ai te ati Iuda ia ’u i roto i te hiero e i tamata ’i i te haapohe ia ’u. 22  Ma te tauturuhia mai râ e te Atua, te tamau noa ra vau e tae mai i teie mahana i te faataa i te parau apî oaoa i te feia rii e te feia tiaraa teitei, a faaite ai i ta te mau peropheta e ta Mose noa i parau e e tupu: 23  e haamauiuihia te Mesia e ei matamua o te faatiahia mai te pohe mai, e faaite haere oia i te maramarama i teie nunaa e i te mau nunaa ěê.” 24  A paraparau noa ’i râ Paulo, tuô maira Fesito: “Ua maamaahia oe, Paulo! Ua ino to oe upoo no to oe ite rahi!” 25  Na ô atura râ Paulo: “Aita vau i maamaahia, Tavana rahi Fesito, te parau nei râ vau i te parau mau e te tano. 26  Inaha, ua ite maitai te arii ta ’u e paraparau roa ’tu nei i teie mau mea. Ua papu ia ’u e aita hoê a‘e o teie mau mea i mo‘e ia ’na, aita hoi te reira i ravehia i te vahi mo‘e. 27  E tiaturi oe, Arii Ageripa, i te mau peropheta? Ua ite au e e tiaturi oe.” 28  Teie râ na ô maira Ageripa ia Paulo: “Fatata vau i te riro ia oe ei Kerisetiano.” 29  Parau atura Paulo: “To ’u hinaaro i mua i te Atua, ia tae i te hoê mahana, ia riro mai oe e pauroa te taata e faaroo nei ia ’u i teie mahana ei Kerisetiano mai ia ’u nei aita râ teie nau fifi auri.” 30  Tia a‘era te arii, te tavana, Bereni e te feia i parahi i pihai iho ia ratou. 31  A haere ai râ ratou i rapae, parau a‘era te tahi i te tahi: “Aita tera taata e rave nei i te tahi ohipa e tano ai ia pohe o ’na aore ra ia tapeahia.” 32  Na ô maira Ageripa ia Fesito: “E nehenehe tera taata e tuuhia ahani aita o ’na i ani e na Kaisara e haava ia ’na.”

Nota i raro i te api

E raau oeoe teie no te patia i te hoê animara ia haere i mua.