Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 25:1-27

HAAPOTORAA O TE MAU TUMU PARAU

  • Haavahia Paulo i mua ia Fesito (1-12)

    • “Na Kaisara e haava ia ’u!” (11)

  • Paraparau Fesito i te arii Ageripa (13-22)

  • Paulo i mua ia Ageripa (23-27)

25  Tae maira ïa Fesito i te fenua o Iudea e tavana maira. E toru mahana i muri iho, pauma ’tura oia i Ierusalema mai Kaisarea ’tu.  Faaite maira te mau tahu‘a tiaau e te mau raatira ati Iuda ia Fesito i ta ratou mau pariraa ia Paulo. Taparu maira ïa ratou ia ’na  ia faaroo mai ia ratou e ia aratai mai ia Paulo i Ierusalema. Te tamoemoe ra hoi ratou ia ’na no te haapohe atu na te purumu.  Teie râ, pahono atura Fesito e ia vaiiho-noa-hia Paulo i roto i te tapearaa i Kaisarea e ua fatata o ’na i te ho‘i i ǒ.  Na ô atura oia: “Ia pou atoa ïa te feia mana i rotopu ia outou na muri ia ’u e ia pari ia ’na mai te peu iho â râ e e ohipa ino ta tera taata i rave.”  I muri a‘e e va‘u aore ra ahuru mahana ia ratou ra, pou maira Fesito i Kaisarea. I te mahana i muri iho, parahi ihora oia i te vahi haavaraa e faaue atura ia arataihia mai Paulo.  I to Paulo taeraa mai, haaati maira te ati Iuda na Ierusalema i te pouraa mai ia ’na, a pari ai ia ’na e rave rahi ohipa ino mau aita hoi i tia ia ratou ia haapapu e e parau mau.  Pahono atura râ Paulo: “Aita ta ’u e hara i rave i te ture a te ati Iuda, aita atoa i te hiero e aita hoi ia Kaisara.”  Ui maira Fesito o te hinaaro ra ia auhia mai oia e te ati Iuda: “Hinaaro anei oe e pauma i Ierusalema ia haavahia oe i ǒ no nia i teie mau pariraa?” 10  Na ô atura râ Paulo: “Te tia nei au i mua i te vahi haavaraa a Kaisara, i ǒ nei hoi au e haavahia ’i e tia ’i. Aita ta ’u e hara i rave i te ati Iuda, ua ite maitai hoi oe. 11  Mai te peu e e taata ohipa ino iho â vau e ua rave au i te tahi ohipa e tano ai ia pohe au, ia pohe ïa vau. Mai te peu râ e e ere i te parau mau te mau pariraa a teie mau taata ia ’u, aita roa e taata e nehenehe e tuu noa ia ’u ia ratou ra. Na Kaisara e haava ia ’u!” 12  I muri a‘e i to Fesito paraparauraa i te mau haava, pahono maira oia: “Na Kaisara e haava ia oe, ia Kaisara ïa oe e haere ai.” 13  Tau mahana i muri iho, tae maira Ageripa te arii raua Bereni i Kaisarea no te aroha ia Fesito. 14  I te mea ua faaea mai raua i reira e rave rahi mahana, faaite atura Fesito i te parau no Paulo i te arii, a na ô ai: “E taata to ǒ nei tei vaiiho-noa-hia e Felisi i roto i te tapearaa, 15  e a parahi ai au i Ierusalema, faaite maira te mau tahu‘a tiaau e te mau aratai ati Iuda i ta ratou mau pariraa ia ’na, a ani mai ai ia faautua ia ’na. 16  Ua pahono atu râ vau e eita to Roma e faautua noa i te hoê taata, hou te taata parihia e tia ’i i mua i te feia pari, a nehenehe atu ai e faataa e e ere i te parau mau te pariraa. 17  No reira i to ratou taeraa mai i ǒ nei, aita vau i haamaoro. I te mahana i muri iho, parahi ihora vau i te vahi haavaraa e faaue atura ia arataihia mai taua taata ra. 18  I to te feia pari tiaraa mai, aita ratou i pari ia ’na i te mau ohipa ino ta ’u i mana‘o e i rave na o ’na. 19  Ta ratou noa mârôraa ia ’na, no nia ïa i ta ratou iho haamoriraa i te hoê atua* e no nia i te tahi taata i pohe na o Iesu te i‘oa, ta Paulo râ e parau noa ra e te ora ra o ’na. 20  No te mea râ aita i papu ia ’u e nafea ia faaafaro i teie mârôraa, ani atura vau ia Paulo e e hinaaro anei o ’na e haere i Ierusalema ia haavahia o ’na no nia i teie parau. 21  I to Paulo râ parauraa e vaiiho noa ia ’na i roto i te tapearaa a tiai atu ai i te faaotiraa a te emepera, faaue atura vau ia tapeahia o ’na e tae noa ’tu i te mahana e tono ai au ia ’na ia Kaisara ra.” 22  Na ô maira Ageripa ia Fesito: “Hinaaro vau e faaroo i tera taata.” Parau atura Fesito: “Ananahi oe e faaroo ai ia ’na.” 23  I te mahana i muri iho, haere maira ïa Ageripa raua Bereni ma te unauna rahi e tomo maira i roto i te tiripuna e te mau raatira o te nuu e te feia tiaraa teitei o te oire. Faaue ihora Fesito ia arataihia mai Paulo. 24  Na ô atura Fesito: “Arii Ageripa e outou atoa i putuputu mai, te ite nei outou i teie taata ta te ati Iuda taatoa, ma te tutuô, i ani onoono mai ia ’u i Ierusalema e i ǒ nei atoa ia haapohe. 25  Ua taa râ ia ’u e aita o ’na i rave i te tahi ohipa e tano ai ia pohe o ’na. No reira, i to teie taata parauraa e na te emepera e haava ia ’na, faaoti ihora vau e aratai ia ’na i te emepera. 26  Teie râ, aita ta ’u e parau papu no nia ia ’na e papai i to ’u Fatu. No reira ïa vau i aratai mai ai ia ’na i mua ia outou pauroa, i mua iho â râ ia oe arii Ageripa, ia uiuihia o ’na, a nehenehe atu ai au e papai i te tahi mea. 27  Eita hoi e tano, i to ’u mana‘o, ia aratai i te hoê taata tapeahia ma te ore e faaite i te mau hara i parihia ’i o ’na.”

Nota i raro i te api

Aore ra “ta ratou iho haapaoraa.”