Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 24:1-27

HAAPOTORAA O TE MAU TUMU PARAU

  • Pariraa ia Paulo (1-9)

  • Faataa Paulo ia Felisi i te ohipa i tupu (10-21)

  • Faataimehia to Paulo haavaraa e piti matahiti (22-27)

24  E pae mahana i muri iho, pou maira te tahu‘a rahi o Anania, te tahi mau aratai ati Iuda e te hoê auvaha* o Teretulo te i‘oa, e faaite maira i te tavana i ta ratou mau pariraa ia Paulo.  I to Teretulo aniraahia ia paraparau, haamata ’tura o ’na i te pari ia Paulo i mua ia Felisi: “I te mea te fana‘o nei matou i te hau rahi na roto ia oe, e te ravehia nei te tahi mau tauiraa i roto i teie nunaa maoti to oe aravihi i te faanaho i te mau mea,  te farii nei matou i te reira i te mau taime atoa e i te mau vahi atoa, e tavana rahi Felisi, ma te mauruuru rahi.  Teie râ, ia ore au e tapea maoro atu â ia oe, te taparu nei au ia oe ia faaroo rii noa mai oe ia matou no to oe hamani maitai.  Ua itehia hoi e matou e e imi hara teie taata,* e te orure hau i rotopu i te ati Iuda atoa e ati a‘e te fenua, e aratai atoa i te pǔpǔ faaroo amaha a to Nazareta.  Ua tamata atoa o ’na i te haaviivii i te hiero, no reira matou i haru ai ia ’na.  *——  Ia uiui oe ia ’na, e ite oe e e parau mau ta matou mau pariraa atoa ia ’na.”  Faahapa atoa ’tura te ati Iuda ia Paulo, a haapapu ai e e parau mau iho â. 10  I to te tavana titauraa ia Paulo ia paraparau, pahono maira Paulo: “Ua ite au e e rave rahi matahiti to oe haavaraa i teie nunaa, oaoa ïa vau i te paraparau atu ia oe no te faataa i te ohipa i tupu. 11  Mai ta oe e nehenehe e titorotoro, aita â i 12 atura mahana mai to ’u paumaraa i Ierusalema e haamori i te Atua e tae mai i teie nei. 12  Aita ratou i ite mai ia ’u i te mârôraa i te tahi taata i roto i te hiero, e te faahuehueraa i te nahoa i roto i te mau sunago aore ra na te oire. 13  Eita atoa ratou e nehenehe e haapapu e e parau mau iho â te mau mea ta ratou e pari mai nei ia ’u. 14  Teie râ ta ’u e fa‘i ia oe, te ora nei au ia au i te e‘a ta ratou e parau ra e e pǔpǔ faaroo amaha, te pûpû nei au i te hoê taviniraa mo‘a i te Atua o to ’u mau tupuna, e te tiaturi ra vau i te mau mea atoa e vai ra i roto i te ture a Mose e te mau papai a te mau peropheta. 15  Ta ’u tiaturiraa i te Atua, tiaturiraa ta teie mau taata e tiai ru atoa nei, oia hoi e tia-faahou-raa to te feia parau-tia e to te feia parau-tia ore. 16  No reira ïa vau e faaitoito ai i te tapea noa i te hoê mana‘o haava maitai* i te aro o te Atua e o te taata. 17  I muri a‘e e rave rahi matahiti, ho‘i maira vau i Ierusalema e afai i te ô aroha hamani maitai* na to ’u nunaa e e pûpû i te tusia i te Atua. 18  I to ratou iteraa mai ia ’u i roto i te hiero, ua mâ vau ia au i te peu a te ati Iuda, aita râ e nahoa e aita atoa e faahuehueraa. Te vai ra râ vetahi ati Iuda no te fenua Asia, 19  ahiri e pariraa ta ratou ia ’u, ia tia mai ïa i ǒ nei i mua ia oe no te pari mai ia ’u. 20  Aore ra ia parau mai teie mau taata i ǒ nei eaha ta ’u hara i rave a haava ’i ratou ia ’u i mua i te Sunederi. 21  Hoê noa mea ta ratou e nehenehe e pari mai ia ’u, to ’u ïa tuôraa a tia noa ’i au i rotopu ia ratou: ‘Te haavahia nei au i mua ia outou no te tia-faahou-raa o te feia pohe!’” 22  Teie râ, faaue ihora Felisi tei ite maitai i te parau o teie nei E‘a, ia ratou ia ho‘i mai i te tahi atu mahana e na ô atura: “Ia pou mai Lusia te raatira o te nuu e rave ai au i ta ’u faaotiraa no nia i teie ohipa.” 23  Faaue atura oia i te raatira faehau ia tapea â ia Paulo, ma te haamâmâ râ i te reira, e ia faatia i to ’na mau hoa ia aupuru ia ’na. 24  Tau mahana i muri iho, tae maira Felisi raua Derusila ta ’na vahine faaipoipo ati Iuda, tii ihora oia ia Paulo e faaroo atura ia ’na ia paraparau no nia i te tiaturiraa i te Mesia ra o Iesu. 25  I to Paulo râ paraparauraa no nia i te parau-tia e te haavîraa ia ’na iho e te haavaraa e tupu a muri a‘e, mehameha ihora Felisi e pahono atura: “A haere râ, e tii atu â vau ia oe i te tahi atu taime ia vata vau.” 26  Te mana‘o atoa ra Felisi e e horoa Paulo i te moni na ’na. No reira o ’na i tii pinepine atu â ’i ia Paulo, a paraparau atu ai raua. 27  E piti râ matahiti i muri iho, mono maira Porio Fesito ia Felisi. No to Felisi hinaaro ia farii-maitai-hia o ’na e te ati Iuda, vaiiho noa ’tura oia ia Paulo i roto i te tapearaa.

Nota i raro i te api

Aore ra “paruru.”
Aore ra “e taata faahuehue teie.”
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
Aore ra “hapa ore.”
Aore ra “ô no te feia veve.” A hi‘o i te titionare.