Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 23:1-35

HAAPOTORAA O TE MAU TUMU PARAU

  • Paraparau Paulo i mua i te Sunederi (1-10)

  • Faaitoitohia Paulo e te Fatu (11)

  • Opuaraa e haapohe ia Paulo (12-22)

  • Afaihia Paulo i Kaisarea (23-35)

23  A hi‘o noa ’i Paulo i te Sunederi, na ô atura oia: “Taeae ma, i ora noa na vau ma te hoê mana‘o haava maitai roa i te aro o te Atua e tae roa mai i teie mahana.”  Faaue ihora te tahu‘a rahi o Anania i te feia e tia ra i pihai iho ia Paulo ia pâ‘i i to ’na vaha.  Na ô atura Paulo: “E tairi te Atua ia oe, haavarevare.* Te parahi nei oe no te haava ia ’u ia au i te ture a Mose e te ofati atoa nei oe i taua ture ra ma te faaue ia pâ‘ihia vau?”  Na ô maira te feia e tia ra i pihai iho ia Paulo: “Te faaino nei oe i te tahu‘a rahi a te Atua?”  Parau atura Paulo: “Taeae ma, aita vau i ite e o te tahu‘a rahi o ’na. Ua papaihia hoi: ‘Eiaha oe e faaino i te hoê raatira o to oe nunaa.’”  I to Paulo iteraa e e Sadukea te hoê pae o te Sunederi e e Pharisea te tahi pae, tuô ihora oia: “Taeae ma, e Pharisea vau, e tamaiti na te Pharisea. Te haavahia nei au no te tiaturiraa o te tia-faahou-raa o te feia pohe.”  No to ’na parauraa i te reira, tupu ihora te umeumeraa i rotopu i te Pharisea e te Sadukea e amahamaha ’tura ratou.  Te parau ra hoi te Sadukea e aita e tia-faahou-raa, aita e melahi e aita atoa e varua. Area te Pharisea, te tiaturi ra ïa i te reira.  Tutuô a‘era te taata, tia maira te tahi mau papai parau o te pǔpǔ a te Pharisea e mârô etaeta maira a na ô ai: “Aita matou i ite noa ’‘e i te tahi hara a teie taata, peneia‘e ua paraparau te hoê varua aore ra te hoê melahi ia ’na.” 10  I te u‘anaraa te umeumeraa, mǎta‘u ihora te raatira o te nuu a‘unei Paulo e pohe ai ia ratou, e faaue atura i te mau faehau ia pou mai e haru ia Paulo mai rotopu mai ia ratou, a aratai atu ai ia ’na i te nohoraa o te mau faehau. 11  Tera râ i taua po ra, tia maira te Fatu i pihai iho ia Paulo e na ô maira: “A faaitoito! Mai ia oe i faataa maitai i te parau no ’u i Ierusalema, ia na reira atoa oe i Roma e tia ’i.” 12  E ao a‘era, opua a‘era te ati Iuda e eita ratou e tamaa e eita atoa e inu e ia pohe noa ’tu Paulo ia ratou ma te horeo.* 13  Hau atu i te 40 tane tei horeo mai teie. 14  Haere atura teie mau tane i te mau tahu‘a tiaau e i te mau aratai ati Iuda e na ô atura: “Ua horeo* matou e eita matou e amu noa ’‘e i te tahi maa e ia pohe noa ’tu Paulo ia matou. 15  No reira, outou e te Sunederi atoa, a faaara i te raatira o te nuu ia haapou mai ia Paulo ia outou nei, mai te mea ra e te hinaaro ra outou e uiui atu â ia ’na. Hou râ o ’na e tae mai ai, ua ineine matou i te haapohe ia ’na.” 16  Teie râ, faaroo ihora te tamaiti a te tuahine o Paulo i ta ratou opuaraa, tomo ihora i roto i te nohoraa o te mau faehau e faaara ’tura ia Paulo. 17  Pii atura Paulo hoê o te mau raatira faehau ia haere mai e na ô atura: “Aratai na oe i teie taurearea i te raatira o te nuu, e parau hoi ta ’na e faaite ia ’na.” 18  Aratai ihora ïa te raatira faehau i te taurearea i te raatira o te nuu e na ô atura: “Ua pii mai te mau auri ra o Paulo ia ’u e ua ani mai ia aratai i teie taurearea ia oe nei, no te mea e parau ta ’na e faaite ia oe.” 19  Rave ihora te raatira o te nuu i te rima o te taurearea, haere rii atura i te hoê vahi o raua ana‘e e ui atura: “Eaha ta oe parau e faaite mai?” 20  Parau maira te taurearea: “Ua tu te mana‘o o te ati Iuda e ani ia oe ia haapou mai ia Paulo i te Sunederi ananahi, mai te mea ra e te hinaaro ra ratou e uiui atu â ia ’na. 21  Eiaha râ oe e faatia i ta ratou aniraa, hau atu hoi i te 40 o to ratou mau tane te tamoemoe ra ia Paulo, e ua horeo* ratou e eita ratou e tamaa e eita atoa e inu e ia pohe noa ’tu Paulo ia ratou. Ua ineine ratou i teie nei e te tiai mai ra i ta oe parau faatia.” 22  Tuu atura ïa te raatira o te nuu i te taurearea ia haere i muri a‘e i to ’na faaueraa ’tu: “Eiaha oe e faaite e ua faaara mai oe ia ’u.” 23  Titau ihora oia e piti raatira faehau e na ô atura: “A faaineine e 200 faehau no te haere i Kaisarea, e 70 atoa tane faahoro puaarehenua e e 200 tane e omore ta ratou, i te toru o te hora* i te po. 24  A faaineine atoa i te puaarehenua no Paulo, ia tae maitai o ’na ia Felisi te tavana.” 25  Papai atura oia i te hoê rata mai teie: 26  “O vau Kalaudio Lusia, te papai atu nei au i teie rata ia oe, tavana rahi Felisi: Ia ora na! 27  I haruhia na teie taata e te ati Iuda e mai pohe o ’na ia ratou, tae oioi atura râ vau e ta ’u mau faehau e faaora ia ’na, no te mea no ite noa maira vau e e taata Roma o ’na. 28  E no to ’u hinaaro e ite eaha te tumu i pari ai ratou ia ’na, haapou maira vau ia ’na i roto i ta ratou Sunederi. 29  Ite a‘era vau e ua parihia o ’na i te mau mea no nia i ta ratou ture, eiaha râ no nia i te tahi hara e tano ai ia pohe o ’na aore ra ia tuuhia i roto i te tapearaa. 30  Ua faaarahia mai râ e te opua ra te ati Iuda e haapohe ia ’na, te tono oioi atu nei ïa vau ia ’na ia oe ra, a faaue ai i te feia pari ia tia atoa ’tu i mua ia oe.” 31  Rave a‘era ïa te mau faehau ia Paulo mai tei faauehia mai e aratai atura ia ’na i Anetipaterisi i te po. 32  E ao a‘era, vaiiho a‘era ratou i te feia faahoro puaarehenua ia aratai ia Paulo. Area ratou, ho‘i maira ïa i te nohoraa o te mau faehau. 33  Tomo atura te feia faahoro puaarehenua i Kaisarea, horoa ’tura i te rata i te tavana e tuu atoa ’tura ia Paulo i mua ia ’na. 34  Taio ihora te tavana i te rata, ui maira ia Paulo no teihea fenua o ’na e ite a‘era e no Kilikia. 35  Na ô maira oia: “E faaroo maitai au ia oe ia tae mai te feia i pari ia oe.” Faaue atura oia ia tapeahia Paulo i roto i te aorai o Heroda.

Nota i raro i te api

“Patu faauouohia” na roto i te reo Heleni.
Ma te tiaturi e e tae mai te utua ia ore ia tapeahia taua horeo ra.
Ma te tiaturi e e tae mai te utua ia ore ia tapeahia taua horeo ra.
Ma te tiaturi e e tae mai te utua ia ore ia tapeahia taua horeo ra.
I te area hora 9 i te po.