Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 22:1-30

HAAPOTORAA O TE MAU TUMU PARAU

  • Faataa o Paulo i te ohipa i tupu i mua i te nahoa (1-21)

  • Parau Paulo e taata Roma o ’na (22-29)

  • Putuputu te Sunederi (30)

22  “Taeae ma e outou te feia metua, a faaroo mai ia faataa ’tu vau i te ohipa i tupu.”  I to ratou faarooraa ia ’na i te paraparauraa mai na roto i te reo Hebera, mamû roa ’tura ratou e na ô atura oia:  “E ati Iuda vau fanauhia i Tareso no Kilikia, haapiihia râ i teie nei oire e Gamaliela ia haapao maite i te ture a Mose tei peehia na e to tatou mau tupuna, e e tavini itoito roa vau na te Atua mai ia outou pauroa i teie mahana.  Ua hamani ino vau i te feia e pee ra i teie nei E‘a, ua taamu hoi au i te tane e te vahine atoa e ua huri ia ratou i roto i te tapearaa e ia haapohehia ratou.  E nehenehe te tahu‘a rahi e te mau aratai ati Iuda atoa e haapapu mai. Na ratou hoi i horoa mai i te mau rata na to tatou mau taeae ati Iuda i Damaseko, ia haere au e tii i to reira mau pǐpǐ e aratai ma te taamuhia i Ierusalema ia faautuahia ratou.  Teie râ, a haere noa ’i au i to ’u tere e a fatata ’i i te tae i Damaseko, ua avatea hoi, anaana ihora te maramarama rahi no te ra‘i mai e ati a‘e ia ’u,  marua ihora vau i raro e faaroo a‘era i te hoê reo i te na ôraa mai: ‘Saulo, Saulo, eaha oe e hamani ino mai ai ia ’u?’  Pahono atura vau: ‘O vai oe?’ Na ô maira oia: ‘O Iesu no Nazareta ta oe e hamani ino nei.’  Ua ite te mau tane tei na muri atoa mai ia ’u i te maramarama, aita râ i taa i ta taua reo ra i parau mai ia ’u. 10  Ui atura vau: ‘Eaha ïa ta ’u e rave?’ Na ô maira te Fatu: ‘A tia i nia e a haere i roto i te oire o Damaseko, i reira e faaitehia ’tu ai i tei faaotihia ia rave oe.’ 11  Tera râ, no te mea ua matapohia vau no te anaana o te maramarama, aratai-rima-hia ’tura vau e te feia tei na muri mai ia ’u e tae roa i Damaseko. 12  To reira te hoê tane o Anania te i‘oa. E taata mǎta‘u i te Atua e te haapao i te ture a Mose. E roo maitai to ’na i rotopu i te ati Iuda atoa e faaea ra i reira. 13  Haere maira o ’na, tia maira i pihai iho ia ’u e na ô maira: ‘Saulo, to ’u taeae, ia ite faahou oe!’ I reira iho, ite atura vau ia ’na. 14  Na ô maira o ’na: ‘Ua maiti te Atua o to tatou mau tupuna ia oe ia ite oe eaha to ’na hinaaro, ia ite oe ia Iesu mea parau-tia oia, e ia faaroo oe i to ’na reo, 15  no te mea ia riro oe ei ite no ’na e tia ’i, a faaite ai i te taata atoa i ta oe i ite e i faaroo. 16  Eaha ïa ta oe e tiai nei? A tia i nia, ia bapetizohia oe e ia mâ oe i ta oe mau hara ma te tiaoro i to ’na i‘oa.’ 17  Ho‘i atura ïa vau i Ierusalema. Teie râ, a pure noa ’i au i roto i te hiero, ite ihora vau i roto i te hoê orama 18  i te Fatu i te na ôraa mai: ‘Haaviti, a faarue oioi i Ierusalema, no te mea eita ratou e farii i ta oe e faaite ra no ’u.’ 19  Na ô atura vau: ‘E te Fatu, ua ite maitai ratou e i haere na vau na tera e tera sunago, a tuu ai i te feia e tiaturi ra ia oe i roto i te tapearaa e a hui ai ia ratou. 20  E a haapohehia ’i Setephano to oe ite, te tia noa ra vau i reira, a turu ai i taua ohipa ra e a tiai ai i te ahu tapo‘i o te feia e haapohe ra ia ’na.’ 21  Tera râ, na ô maira oia: ‘A haere, no te mea e tono vau ia oe i te mau nunaa ěê i te atea ê.’” 22  Te faaroo noa ra ratou ia ’na e tae roa i taua parau ra. I muri iho râ, tuô a‘era ratou: “Haapohe i tena taata, eita hoi e tano ia ora o ’na!” 23  No te mea te tuô noa ra ratou, te taora ra i to ratou ahu tapo‘i e te taora ra i te repo i nia, 24  faaue ihora te raatira o te nuu ia afaihia Paulo i te nohoraa o te mau faehau, e parau atura ia uiuihia o ’na ma te hui ia ’na, ia ite hoi o ’na no te aha ratou e tuô noa ’i e haapohe ia Paulo. 25  Teie râ, i te otiraa to ratou taamuraa ia ’na no te hui atu, na ô ihora Paulo i te raatira faehau e tia ra na reira: “Mea tano anei ia au i te ture ia hui outou i te hoê taata Roma aita i faautuahia?”* 26  I to te raatira faehau faarooraa i te reira, haere ihora oia e parau i te raatira o te nuu: “E nafea oe i teie nei? E taata Roma hoi o ’na.” 27  Haere maira te raatira o te nuu e na ô maira ia Paulo: “Faaite mai na, e taata Roma oe?” Parau atura Paulo: “E.” 28  Pahono maira te raatira o te nuu: “E moni rahi ta ’u i aufau no te riro ei taata Roma.” Parau atura Paulo: “O vau nei râ, e taata Roma ïa mai to ’u fanauraahia mai â.” 29  I reira iho, otohe maira te feia i fatata i te uiui ia ’na ma te hamani ino atu. Mǎta‘u ihora te raatira o te nuu i to ’na iteraa e e taata Roma Paulo e na ’na i faaue ia taamuhia o ’na i te fifi auri. 30  I te mahana i muri iho, no to ’na hinaaro e ite papu i te tumu i parihia ’i Paulo e te ati Iuda, tuu atura te raatira o te nuu ia ’na e faaue atura i te mau tahu‘a tiaau e te Sunederi taatoa ia putuputu mai. Haapou maira oia ia Paulo e tuu atura ia ’na i mua ia ratou.

Nota i raro i te api

Aore ra “aita i haavahia?”