Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 21:1-40

HAAPOTORAA O TE MAU TUMU PARAU

  • Revaraa i Ierusalema (1-14)

  • Taeraa i Ierusalema (15-19)

  • Pee Paulo i te a‘oraa a te mau matahiapo (20-26)

  • Faahuehueraa i te hiero, haruhia Paulo (27-36)

  • Faatiahia Paulo ia paraparau i te nahoa (37-40)

21  I muri a‘e i to matou revaraa ma te oto, fano tia ’tura matou e tapae atura i Kono. I te mahana i muri iho, tapae atura matou i Roda, e mai reira mai tapae atura i Patara.  I te iteraahia ia matou te hoê pahi e faareva ra i Phenikia, haere atura matou i nia iho e fano atura.  Ite a‘era matou i te motu o Kupero i te pae aui, na tua noa ’tura râ matou i te fanoraa i te fenua Suria e tapae atura i te oire o Turia, i reira te taihaa o te pahi e hurihia ’i i nia i te uahu.  Imi a‘era e itea maira ia matou te mau pǐpǐ. Faaea a‘era matou i reira e hitu mahana. No ta te varua mo‘a râ i faaite atu, parau onoono noa ’tura te mau pǐpǐ ia Paulo eiaha e haere i Ierusalema.  I te hoperaa to matou tere, faarue maira matou i taua vahi ra e haere atura. Ua apee atoa mai râ ratou pauroa, te vahine e te tamarii atoa, ia matou e tae roa i rapaeau i te oire. Tuturi ihora matou i tatahi, pure atura  e aroha ’tura te tahi i te tahi. Haere a‘era matou i nia iho i te pahi e ho‘i atura ratou i to ratou fare.  Faarue maira matou i Turia na nia i te pahi e tapae atura i Petolemaisi. Aroha ’tura matou i te mau taeae e faaea ihora ia ratou ra hoê mahana.  I te mahana i muri iho, reva ’tura matou e tapae atura i Kaisarea. Tomo atura matou i roto i te fare o Philipa taata poro evanelia,* hoê o na toohitu tane, e faaea ihora i ǒ ’na.  E maha tamahine e tohu haere ra e aita i faaipoipo* ta teie taata. 10  Teie râ, i muri a‘e e rave rahi mahana to matou faaearaa i reira, pou maira te hoê peropheta o Agabo te i‘oa mai Iudea mai. 11  Haere maira oia ia matou ra, rave ihora i te hatua o Paulo, taamu ihora i to ’na iho na avae e na rima e na ô maira: “Te parau mai ra te varua mo‘a: ‘Te taata no ’na teie hatua, e taamuhia ïa mai teie e te ati Iuda i Ierusalema, a tuuhia ’tu ai i te rima o te feia o te mau nunaa ěê.’” 12  I to matou faarooraa i tera parau, taparu atura matou e to reira atoa ia ’na eiaha e pauma i Ierusalema. 13  Pahono maira ïa Paulo: “Eaha outou e ta‘i ai, a peapea ’tu ai to ’u aau? Ua ineine au ia taamuhia vau e ia pohe atoa i Ierusalema no te i‘oa o te Fatu ra o Iesu.” 14  I te mea e aita oia i fati, faaea a‘era matou i te mârô* e na ô atura: “Ia tupu te hinaaro o Iehova.”* 15  I muri a‘e i taua mau mahana ra, faaineine a‘era matou i to matou tere e reva ’tura i Ierusalema. 16  Haere atoa maira te tahi mau pǐpǐ no Kaisarea na muri ia matou no te aratai ia matou i te fare o Nasona no Kupero, hoê o te mau pǐpǐ matamua, i reira hoi matou i te faaearaa. 17  I to matou taeraa ’tu i Ierusalema, farii maitai maira te mau taeae ia matou ma te oaoa. 18  Teie râ, i te mahana i muri iho, haere atura Paulo e matou atoa i ǒ Iakobo, to reira pauroa te matahiapo. 19  Aroha ihora oia ia ratou e faatia maite atura i te mau mea atoa ta te Atua i rave i rotopu i te mau nunaa ěê maoti ta ’na taviniraa. 20  I muri a‘e i to ratou faarooraa i te reira, faahanahana a‘era ratou i te Atua e na ô atura râ ia Paulo: “Ua ite oe taeae, e rave rahi tausani ati Iuda tei tiaturi ia Iesu e mea haapao roa ratou pauroa i te ture a Mose. 21  Teie râ, ua faarooroo ratou e te haapii ra oe i te ati Iuda atoa i rotopu i te mau nunaa ěê ia taiva ia Mose, a parau atu ai e eiaha e peritome i ta ratou mau tamarii e eiaha atoa e haapao i te mau peu matauhia. 22  E nafea ïa tatou? Eita e ore e e faaroo ratou e ua tae mai oe. 23  A rave ïa i ta matou e parau atu: E maha tane i ǒ matou nei e euhe ta ratou. 24  A rave i taua mau tane ra, a tamâ ia oe ia au i te peu a te ati Iuda e o ratou atoa e na oe e aufau i ta ratou mau haamâu‘araa, ia hahuhia to ratou upoo. E ite ïa te taata atoa e e ere ta ratou i faarooroo no nia ia oe i te parau mau, mea afaro râ to oe haerea e te haapao atoa ra oe i te ture a Mose. 25  Area te feia i tiaturi ia Iesu i rotopu i te mau nunaa ěê, ua papai atu ïa matou i ta matou faaotiraa i rave, oia hoi ia haapae ratou i te mau mea pûpûhia na te idolo, i te toto atoa, i te animara uumihia,* e i te mau peu taotoraa tia ore.”* 26  Rave ihora ïa Paulo i taua mau tane ra i te mahana i muri iho, tamâ ’tura ia ’na ia au i te peu a te ati Iuda e o ratou atoa, e tomo atura i roto i te hiero no te faaite atu afea e hope ai na mahana tamâraa ia au i te peu a te ati Iuda, a pûpûhia ’tu ai te tusia no ratou tataitahi. 27  A fatata ’i na mahana e hitu i te hope, ite maira te ati Iuda no Asia ia Paulo i roto i te hiero, faahuehue a‘era i te taata atoa e haru maira ia ’na, 28  a tuô ai: “Outou to Iseraela, tauturu mai! Teie te taata e haapii ra i te taata atoa na te mau vahi atoa i te mau parau faaino no nia i to tatou nunaa e ta tatou ture i horoahia ia Mose e teie vahi. Ua aratai atoa mai o ’na i te taata Heleni i roto i te hiero e ua viivii ia ’na teie vahi mo‘a.” 29  I ite na hoi ratou ia Terophimo taata Ephesia i roto i te oire na muri ia Paulo, e ua mana‘o ratou e i aratai na Paulo ia ’na i roto i te hiero. 30  Huehue ihora te oire taatoa, horo pauroa maira te taata e haru ia Paulo, arato atura ia ’na i rapaeau i te hiero, e tapirihia ihora te mau uputa. 31  A imi ai ratou i te haapohe ia Paulo, tae atura te parau i te raatira o te pǔpǔ faehau e ua huenane roa o Ierusalema taatoa. 32  Rave ihora oia i te mau faehau e te mau raatira faehau e horo atura ia ratou ra. I to ratou iteraa mai i te raatira o te nuu e te mau faehau, faaea a‘era ratou i te taparahi ia Paulo. 33  Tapiri atura te raatira o te nuu, rave ihora ia Paulo, faaue atura ia taamuhia o ’na i e piti fifi auri e ui a‘era o vai o ’na e eaha ta ’na i rave. 34  Teie râ, tutuô maira te nahoa, mea ê ta te tahi parau e mea ê ta te tahi atu. No te maniania, aita ’tura i taa i te raatira o te nuu eaha te fifi, faaue atura ïa ia afaihia Paulo i te nohoraa o te mau faehau. 35  Tera râ, a tae ai Paulo i te e‘a paiumaraa, amo a‘era te mau faehau ia ’na no te mea te hinaaro ra te nahoa e taparahi ia ’na, 36  te na muri noa mai ra hoi ratou a tuô noa ’i: “Haapohe ia ’na!” 37  Te haamata ra te mau faehau i te afai ia ’na i roto i te nohoraa o te mau faehau, na ô atura Paulo i te raatira o te nuu: “Nehenehe anei au e paraparau rii ia oe?” Na ô maira te raatira o te nuu: “Ua ite oe i te reo Heleni? 38  E ere anei o oe te taata Aiphiti tei orure hau a‘enei e tei aratai i te medebara na taparahi taata e 4 000?” 39  Na ô atura Paulo: “E ati Iuda vau no Tareso i Kilikia, e taata no te hoê oire matau-maitai-hia. Te ani atu nei ïa vau ia oe i te parau faatia no te paraparau i teie mau taata.” 40  Faatia maira te raatira o te nuu e a tia noa ’i Paulo i nia i te e‘a paiumaraa, apǎ ’tura oia i te rima ia mamû te taata. Mamû roa a‘era ratou e paraparau atura oia na roto i te reo Hebera, a na ô ai:

Nota i raro i te api

Aore ra “taata poro i te parau apî oaoa.”
“Paretenia” na roto i te reo Heleni, oia hoi e vahine aita i taoto a‘enei i te hoê tane.
“Mamû a‘era matou” na roto i te reo Heleni.
A hi‘o i te titionare.
Aore ra “te animara tupaihia aita râ te toto i faatahehia.”
A hi‘o i te titionare.