Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 20:1-38

HAAPOTORAA O TE MAU TUMU PARAU

  • Paulo i Makedonia e i Heleni (1-6)

  • Faatia-faahou-hia Eutiko i Teroa (7-12)

  • Mai Teroa ’tu i Mileto (13-16)

  • Farerei Paulo i te mau matahiapo no Ephesia (17-38)

    • Haapiiraa na tera e tera fare (20)

    • “E rahi a‘e te oaoa ia horoa ’tu i te horoahia mai” (35)

20  I te oreraa te faahuehueraa, haaputuputu maira Paulo i te mau pǐpǐ. Faaitoito e aroha ’tura oia ia ratou, e reva ’tura i Makedonia.  Haere atura oia na taua mau pae fenua ra, a faaitoito ai i te mau pǐpǐ na reira, e tae atura i Heleni.  Parahi ihora oia i reira e toru ava‘e. Tera râ, no te opuaraa a te ati Iuda e haapohe ia ’na a fatata ’i oia i te fano i Suria, faaoti ihora ïa oia e ho‘i na Makedonia.  Apee maira ia ’na Sopatero te tamaiti a Puro no Berea, Arisetareho raua Sekunedo no Tesalonia, Gaio no Derebe, Timoteo e Tuhiko raua Terophimo no te fenua Asia.  Na mua ’tura taua mau tane ra ia mâua Paulo e tiai maira i Teroa.  O mâua râ, faarue maira ïa i Philipi i muri a‘e i te mau mahana o te Oroa pane* hopue ore, e i roto noa e pae mahana, tapae atura mâua i Teroa ia ratou ra e parahi ihora matou i reira e hitu mahana.  I te mahana matamua o te hebedoma, a putuputu ai matou no te tamaa, haamata ihora Paulo i te paraparau, no te mea e reva oia ia poipoi a‘e. Paraparau maira oia e tae roa ’tu i te tuiraa po.  Mea rahi hoi te mori i roto i taua piha i nia ra i reira matou i te putuputuraa.  Te parahi noa ra te hoê taata apî o Eutiko te i‘oa i te haamaramarama, varea roa ihora oia i te taoto a paraparau noa ’i Paulo. Taoto roa ’tura oia e marua ihora i raro mai te tahua piti atu. I to ’na raveraahia mai, ua pohe roa oia. 10  Tera râ, pou maira Paulo, tipapa ihora i nia ia ’na, tauahi atura e na ô a‘era: “Faaea na i te haapeapea, te ora ra hoi o ’na.”* 11  Ho‘i atura ïa Paulo i nia, ofati ihora i te faraoa e amu atura. Paraparau faahou atura oia e aahiata noa ’tura e reva ’tura. 12  Faaho‘i atura ratou i taua taata apî ra e oaoa roa a‘era ratou, te ora ra hoi oia. 13  Haere atura matou i nia i te pahi e fano atura i Asoso, i reira matou e rave atoa mai ai ia Paulo mai ta ’na i faaue mai, ua hinaaro hoi oia e haere na raro noa. 14  Tae maira oia ia matou ra i Asoso, rave a‘era matou ia ’na i nia i te pahi e fano atura i Mitulene. 15  I to muri iho mahana, faarue maira matou i tera vahi, fano atura e faaea ’tura na tua i te motu o Hiu. Tera râ, i te mahana i muri iho, faaea rii noa ’tura matou i Samo, e i to muri iho mahana, tapae ihora matou i Mileto. 16  I faaoti na Paulo e fano na tua ’tu i Ephesia ia ore oia ia maoro i te fenua Asia, te hinaaro ra hoi oia e tae oioi i Ierusalema no te mahana Penetekose. 17  Tera râ, mai Mileto atu, tono atura Paulo i te vea i Ephesia ia haere mai te mau matahiapo o te amuiraa. 18  I to ratou taeraa mai, na ô atura oia: “Ua ite maitai outou i to ’u huru oraraa i rotopu ia outou, mai te mahana matamua mai â i tae mai ai au i te fenua Asia, 19  i te taviniraa i te Fatu ma te haehaa e te roimata e te ati no te opuaraa a te ati Iuda e haapohe ia ’u. 20  Aita râ vau i taiâ i te parau ia outou i te mau mea atoa e maitai ai outou e i te haapii atoa ia outou i mua i te taata e na tera e tera fare. 21  Tera râ, ua faataa maitai au i te ati Iuda e te taata Heleni atoa e ia tatarahapa ratou e tia ’i, ia haamori i te Atua e ia tiaturi i te Fatu ra o Iesu. 22  I teie nei, ma te faahepohia* e te varua mo‘a, te haere nei au i Ierusalema, noa ’tu e aita vau i ite i te mea e roohia vau i reira. 23  Teie râ, i tera e tera oire e faaara noa mai te varua mo‘a ia ’u e e tuuhia vau i roto i te tapearaa e e faaruru vau i te ati. 24  Tera râ, e ere to ’u iho ora* i te mea faufaa no ’u, ia oti râ ta ’u hororaa e te taviniraa no ǒ mai i te Fatu ra o Iesu, oia hoi e faataa maitai i te parau apî oaoa o te hamani maitai rahi o te Atua. 25  I teie nei, ua ite au e e ore outou pauroa o ta ’u i poro i te Faatereraa arii* e ite faahou ia ’u. 26  Te parau atu nei ïa vau ia outou i teie nei mahana e e ere no ’u te hape ia ore te taata e faaorahia, 27  inaha ua faaite iho â vau ia outou i te mau mea atoa no nia i te hinaaro o* te Atua. 28  A haapao maitai ia outou iho e i te nǎnǎ taatoa, ua faatoroa hoi te varua mo‘a ia outou ei tiaau no te aupuru i te amuiraa a te Atua, ta ’na i hoo mai i te toto o ta ’na iho Tamaiti. 29  Ua ite au e ua reva ana‘e au, e ô mai te luko taehae i rotopu ia outou e e ore ratou e faaherehere i te nǎnǎ. 30  E tia atoa mai no rotopu mai ia outou iho te tahi mau tane o te taviri i te parau mau no te ume i te mau pǐpǐ na muri ia ratou. 31  A vai ara noa ïa, e a haamana‘o e ua haapii noa vau ia outou tataitahi ma te roimata e toru matahiti i te po e te ao. 32  I teie nei, ia paruru mai te Atua e te parau o to ’na hamani maitai rahi ia outou, na taua parau ra e faaitoito ia outou, a fatu atu ai outou i ta te Atua e horoa na te feia mo‘a atoa. 33  Aita vau i nounou noa ’‘e i ta te taata ario, auro aore ra to ’na ahu. 34  Ua ite maitai outou e na teie na rima i rave i te ohipa i noaa mai ai ta ’u e ta te feia atoa tei amui mai ia ’u i hinaaro mau. 35  Aita e mea toe ia ’u i te faaite atu e ma te rohi mai teie te huru e tauturu ai outou i tei paruparu, a haamana‘o atoa ’i i ta te Fatu ra o Iesu i parau: ‘E rahi a‘e te oaoa ia horoa ’tu i te horoahia mai.’” 36  I muri a‘e i to ’na parauraa i teie mau mea, tuturi ihora oia e ratou pauroa e pure atura. 37  Ta‘i roa ’tura ratou pauroa, tauahi e apa maitai maira ia Paulo, 38  ua peapea roa hoi ratou i to ’na parauraa ’tu e e ore ratou e ite faahou ia ’na. Aratai atura ratou ia ’na i te pahi.

Nota i raro i te api

Aore ra “faraoa.”
Heleni pusuke. A hi‘o i te titionare.
“Taamuhia” na roto i te reo Heleni.
Heleni pusuke. A hi‘o i te titionare.
Aore ra “Basileia.”
Aore ra “opuaraa a.”