Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 2:1-47

HAAPOTORAA O TE MAU TUMU PARAU

  • Niniihia te varua mo‘a i te Penetekose (1-13)

  • Oreroraa parau a Petero (14-36)

  • Farii te nahoa i ta Petero oreroraa parau (37-41)

    • 3 000 tei bapetizohia (41)

  • Amuimui te mau Kerisetiano te tahi i te tahi (42-47)

2  I te mahana Penetekose, tei te hoê â vahi te mau pǐpǐ atoa.  A parahi noa ’i ratou, faaroo taue a‘era ratou i te hoê haruru no te ra‘i mai e au i te mata‘i puai, e faaroohia ’tura te reira i roto i te fare taatoa.  Ite atura ratou i te mau arero e au i te auahi, tau maira taua mau arero ra i nia ia ratou, hoê i nia i te pǐpǐ tataitahi,  î a‘era ratou pauroa i te varua mo‘a, e haamata ’tura i te paraparau na roto i te mau reo ěê, mai ta te varua mo‘a i haaparaparau ia ratou.  I taua mau mahana ra, e ati Iuda mǎta‘u i te Atua no te mau fenua atoa te parahi ra i Ierusalema.  No reira, i to te nahoa faarooraa i taua haruru ra, tairuru maira ratou e maere ihora no to ratou faarooraa i to ratou iho reo e paraparauhia ra e te mau pǐpǐ.  Faahiahia roa ihora ratou e na ô a‘era: “Tera mau taata atoa e paraparau ra, e ere ratou no Galilea?  Eaha râ teie e faaroo ai tatou tataitahi i to tatou iho reo?  Tatou atoa nei, to Paretia, Medai, Elama, Mesopotamia, Iudea, Kapadokia, Ponoto i te fenua Asia, 10  Pherugia, Pamephulia, Aiphiti, Libia i pihai iho ia Kurene, to Roma mau ratere, te ati Iuda e te feia i farii i te haapaoraa ati Iuda,* 11  to Kereta e to Arabia, te faaroo nei tatou ia ratou ia paraparau na roto i to tatou reo i te mau mea faahiahia a te Atua.” 12  Maere ihora ratou pauroa e na ô a‘era: “Eaha hoi teie?” 13  Faaooo maira râ te tahi atu ia ratou e na ô maira: “Ua taero ratou.” 14  Tia a‘era râ Petero i nia e na 11* e na ô atura oia ma te reo puai: “Outou to Iudea e to Ierusalema taatoa, a faaroo maitai mai i ta ’u e parau atu. 15  Aita teie mau taata i taero mai ta outou e mana‘o ra, o te toru hoi teie o te hora.* 16  Teie râ tei parauhia na roto i te peropheta Ioela: 17  ‘“I te mau mahana hopea,” ta te Atua ïa e parau mai ra, “e ninii au i te tahi tuhaa o to ’u varua i nia i te mau huru taata atoa, e tohu ta outou mau tamarii tamaroa e ta outou mau tamahine, e ite to outou mau taata apî i te orama e e moemoeâ to outou mau ruhiruhia, 18  e ninii atoa vau i te tahi tuhaa o to ’u varua i nia i ta ’u mau tavini tane e ta ’u mau tavini vahine i taua mau mahana ra, e e tohu ratou. 19  E faaite atu vau i te mau ohipa maere* i nia i te ra‘i e te mau tapao i nia i te fenua: te toto, te auahi e te au auahi. 20  E riro te mahana ei poiri e te ava‘e ei toto hou te mahana rahi hanahana o Iehova* e tae mai ai. 21  E te taata atoa o te tiaoro i te i‘oa o Iehova,* e faaorahia ïa.”’ 22  Outou to Iseraela, a faaroo mai i teie parau: Mai ta outou i ite, mea tonohia mai Iesu no Nazareta e te Atua. Ua ite-maitai-hia te reira na roto i te mau ohipa mana, te ohipa maere* e te semeio ta ’na i rave i rotopu ia outou. 23  Teie taata ta outou i haru mai ta te Atua i opua papu e i ite ê na, ua patiti ïa outou ia ’na i nia i te pou i te rima o te feia ofati ture e ua haapohe outou ia ’na. 24  Ua faatia mai râ te Atua ia ’na, a matara mai ai oia i te tapea o te pohe, no te mea e ore e tia i te pohe ia tapea noa ia ’na. 25  Te na ô ra hoi Davida no ’na: ‘E tuu noa vau ia Iehova* i mua ia ’u.* Tei to ’u rima atau hoi oia ia ore au e aueue. 26  No reira to ’u aau i oaoa ’i e to ’u vaha i paraparau ai ma te oaoa rahi. E ora atoa vau* ma te tiaturi, 27  no te mea e ore oe e faarue ia ’u* i roto i te Apoo,* e ore atoa oe e vaiiho i te tino o to tavini taiva ore ia tahuti. 28  Ua faaite mai oe ia ’u i te e‘a e tae atu ai i te ora e e faaî oe ia ’u i te oaoa rahi i mua ia oe.’* 29  Taeae ma, e nehenehe ta ’u e paraparau roa ’tu ia outou no to tatou tupuna o Davida, ua pohe oia e ua hunahia, e te vai nei to ’na menema i ǒ tatou nei e tae mai i teie mahana. 30  E peropheta o ’na e ua ite o ’na i ta te Atua i tǎpǔ ia ’na, oia hoi e parahi hoê o to ’na huaai i nia i to ’na terono. 31  No reira oia i ite atea ’i e i faahiti ai i te tia-faahou-raa o te Mesia, oia hoi e ore oia e faaruehia i roto i te Apoo* e e ore atoa to ’na tino e tahuti. 32  Ua faatia mai te Atua i taua Iesu ra, e o matou pauroa tei ite i te reira. 33  No te mea ua faateiteihia oia i te rima atau o te Atua e ua noaa ia ’na te varua mo‘a ta te Metua i fafau atu, ua ninii mai o ’na i taua varua ra. Ta outou ïa e ite nei e e faaroo nei. 34  Aita Davida i haere i nia i te ra‘i, te na ô ra râ oia: ‘Ua parau Iehova* i to ’u Fatu: “A parahi i to ’u rima atau nei 35  e ia faariro roa vau i to oe mau enemi ei taahiraa avae no oe.”’ 36  Ia ite maitai ïa te nunaa Iseraela taatoa e ua faariro te Atua ia ’na ei Fatu e ei Mesia, taua Iesu ra ta outou i haapohe i nia i te hoê pou.” 37  I to ratou faarooraa i taua parau ra, putapû roa ihora to ratou aau, e na ô maira ratou ia Petero e i te tahi atu mau aposetolo: “Taeae ma, eaha ïa ta matou e rave?” 38  Na ô atura Petero: “A tatarahapa, e ia bapetizohia outou pauroa i te i‘oa o Iesu Mesia ia faaorehia ta outou mau hara, e e fana‘o ïa outou i te ô o te varua mo‘a ta te Atua e horoa noa. 39  No outou hoi teie parau fafau e no ta outou mau tamarii e no te feia atoa tei atea ê, oia hoi te feia atoa ta Iehova* to tatou Atua e maiti.” 40  Faataa maitai atura Petero no nia ia Iesu na roto e rave rahi atu â parau e faaara ’tura: “Ia faaorahia outou mai rotopu mai i tera mau taata ino.” 41  Bapetizohia ’tura te feia o tei farii ma te oaoa i ta ’na parau. I taua mahana ra, piri i te 3 000 taata* tei amui mai i te mau pǐpǐ. 42  Tamau noa ’tura ratou i te haapao maite i te mau haapiiraa a te mau aposetolo, i te amuimui te tahi i te tahi,* i te tamaa e i te pure. 43  Mǎta‘u a‘era te taata* atoa, mea rahi hoi te ohipa maere* e te semeio ta te mau aposetolo i haamata i te rave. 44  Amui a‘era taua feia ra tei tiaturi ia Iesu i ta ratou mau mea atoa, opere atura na te tahi e te tahi, 45  hoo atura i ta ratou mau tao‘a e to ratou mau fenua, e opere atura i te moni i noaa mai na ratou pauroa, ia au i ta te taata tataitahi i hinaaro mau â. 46  E pauroa te mahana e tia ratou i roto i te hiero ma te hoê â mana‘o, e haere i tera e tera fare e tamaa ma te oaoa rahi e te aau tae, 47  a arue atu ai i te Atua e a farii-maitai-hia mai ai e te taata atoa. E i te mau mahana atoa, amui noa maira Iehova* i te feia tei faaorahia ia ratou.

Nota i raro i te api

Aore ra “peroseluto.”
Oia hoi na 11 aposetolo.
I te area hora 9 i te poipoi.
Aore ra “tapao.”
A hi‘o i te titionare.
A hi‘o i te titionare.
Aore ra “tapao.”
A hi‘o i te titionare.
Aore ra “i mua i to ’u mata.”
“To ’u i‘o” na roto i te reo Heleni.
Heleni pusuke. A hi‘o i te titionare.
Aore ra “Hade,” oia hoi te menema o te huitaata. A hi‘o i te titionare.
Aore ra “i mua i to aro.”
Aore ra “Hade,” oia hoi te menema o te huitaata. A hi‘o i te titionare.
A hi‘o i te titionare.
A hi‘o i te titionare.
Heleni pusuke. A hi‘o i te titionare.
Aore ra “tufa na te tahi e te tahi.”
Heleni pusuke. A hi‘o i te titionare.
Aore ra “tapao.”
A hi‘o i te titionare.