Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 19:1-41

HAAPOTORAA O TE MAU TUMU PARAU

  • Paulo i Ephesia, bapetizo-faahou-hia vetahi (1-7)

  • Ta Paulo ohipa haapiiraa (8-10)

  • Manuïa noa ’tu te mau demoni (11-20)

  • Faahuehueraa i Ephesia (21-41)

19  A parahi ai Apolo i Korinetia, haere atura Paulo na uta i te fenua Asia e pou ihora i Ephesia. I reira, farerei atura oia i te tahi mau pǐpǐ  e na ô atura: “Ua noaa anei ia outou te varua mo‘a i to outou tiaturiraa ia Iesu?” Pahono maira ratou: “Aita matou i faaroo a‘enei e te vai ra te varua mo‘a.”  Na ô atura ïa oia: “I ta vai ïa bapetizoraa i bapetizohia ’i outou?” Parau maira ratou: “I ta Ioane bapetizoraa.”  Na ô atura Paulo: “Ua bapetizo Ioane i te taata ei faaiteraa i to ratou tatarahapa, ma te parau ia ratou ia tiaturi i te taata o te haere mai i muri a‘e ia ’na, oia hoi ia Iesu.”  I to ratou faarooraa i te reira, bapetizohia ’tura ratou i te i‘oa o te Fatu ra o Iesu.  E i to Paulo tuuraa i to ’na rima i nia iho ia ratou, tae maira te varua mo‘a i nia ia ratou e haamata ’tura ratou i te paraparau na roto i te mau reo ěê e i te tohu.  Hoê ahuru ma piti tane ratou pauroa.  Haere noa ’tura Paulo i te sunago e toru ava‘e, a paraparau atu ai ma te taiâ ore, ma te horoa i te mau oreroraa parau e ma te haaferuri i te taata no nia i te Faatereraa arii a te Atua.*  Tera râ, aita roa ’tu vetahi i hinaaro e tiaturi,* e faaino maira i Te E‘a i mua i te rahiraa taata. Vaiiho atura ïa Paulo ia ratou, rave maira i te mau pǐpǐ na muri ia ’na e horoa ’tura i te mau oreroraa parau pauroa te mahana i roto i te fare haapiiraa a Turano. 10  Ua na reira oia e piti matahiti e faaroo atura te taata atoa e parahi ra i te fenua Asia, te ati Iuda e te taata Heleni atoa, i te parau a te Fatu. 11  I te mea e te faatupu noa ra te Atua i te mau ohipa mana rahi na roto ia Paulo, 12  ua hopoi-roa-hia te horoi e te pareu ta Paulo i faaohipa i te feia ma‘i ra, e ua ora to ratou ma‘i e ua haere te mau varua ino i rapae. 13  Teie râ, tamata atoa a‘era vetahi ati Iuda o te tiavaru haere ra i te mau demoni i te faaohipa i te i‘oa o te Fatu ra o Iesu a parau ai i te feia e varua ino to ratou: “Te faaue atu nei au ia outou i te mana o Iesu ta Paulo e poro haere ra.” 14  Te na reira ra hoi na tamarii* e hitu a te hoê tahu‘a tiaau ati Iuda o Sekeva te i‘oa. 15  Tera râ, pahono maira te varua ino ia ratou: “Ua ite au o vai Iesu e o vai Paulo. Outou râ, o vai ïa outou?” 16  Ou‘a maira te taata to roto ia ’na te varua ino i nia iho ia ratou, pohe a‘era ratou pauroa ia ’na, e horo atura ratou i rapae i te fare ma te ahu ore* e ma te pepe. 17  Faaroo a‘era pauroa te ati Iuda e te taata Heleni e parahi ra i Ephesia i taua ohipa ra, mǎta‘u a‘era ratou pauroa e faahanahanahia ’tura te i‘oa o te Fatu ra o Iesu. 18  Haere maira e rave rahi tei tiaturi ia Iesu e fa‘i e e faatia roa mai i ta ratou mau peu. 19  Inaha, haaputu maira e rave rahi tei rave na i te peu tahutahu i ta ratou mau buka e tanina ’tura i te auahi i mua i te taata atoa. I to ratou numeraraa i te moni o taua mau buka ra, ua raea roa e 50 000 moni ario. 20  No reira, parare noa ’tura te parau a Iehova* ma te mana rahi e puai noa ’tura. 21  I muri a‘e i te reira, faaoti ihora Paulo e haere i Ierusalema na Makedonia e na Ahaia ’tu. Na ô atura oia: “Ia tae vau i ǒ, ia haere atoa vau i Roma e tia ’i.” 22  Tono atura ïa oia i Makedonia e piti o to ’na mau tauturu, Timoteo raua Eraseto. O ’na râ, faaea rii maira ïa i te fenua Asia. 23  I taua mau mahana ra, tupu ihora te faahuehueraa huru rahi no nia i Te E‘a o te Atua. 24  Ua ona-rahi-hia te mau rimaî i te hoê taata o Demeterio te i‘oa. Ta ’na ohipa, e hamani hiero ario nainai o Aretemisa. 25  Haaputuputu ihora Demeterio ia ratou e te tahi atu mau rimaî e na ô atura: “E homa, ua ite maitai outou e e oraraa fana‘o to tatou no teie ohipa. 26  Teie râ, ua ite e ua faaroo outou e mea rahi te taata ta tera Paulo i ume eiaha i Ephesia noa, fatata atoa râ i te fenua Asia taatoa, e ua vare ratou i ta ’na parau, oia hoi e ere te mau atua i hamanihia e te rima taata i te atua. 27  E faainohia ïa ta tatou imiraa, e ere râ tera ana‘e te fifi, e haafaufaa-ore-atoa-hia te hiero o te ruahine rahi o Aretemisa, o te haamorihia ra i te fenua Asia taatoa e i te ao atoa nei, a ere atu ai oia i to ’na hanahana.” 28  I to ratou faarooraa i teie parau, riri roa ’tura ratou e tuô a‘era: “E ruahine rahi o Aretemisa a to Ephesia!” 29  Maniania ’tura ïa na te oire e horo atura ratou pauroa i roto i te tahua heiva e tata‘uraa, a arato ai na muri ia ratou i na taata Makedonia ra o Gaio raua Arisetareho, to Paulo na hoa ratere. 30  Hinaaro ihora Paulo e haere atoa i roto i te nahoa, aita râ te mau pǐpǐ i tuu ia ’na. 31  Faatae atoa maira vetahi mau taata faanaho i te heiva e te tata‘uraa, e hoa no ’na, i te tahi poroi a taparu ai ia ’na eiaha e haere i roto i te tahua a pohe oia. 32  Inaha, te tutuô haere ra te nahoa, mea ê ta te tahi parau e mea ê ta te tahi atu. Ua huehue roa hoi ratou e aita te rahiraa i ite no te aha ratou i putuputu mai ai. 33  Rave maira ïa vetahi ia Alesanedero no roto mai i te nahoa, a turai ai te ati Iuda ia ’na i mua, e apǎ ’tura Alesanedero i te rima ia mamû ratou, te hinaaro ra hoi oia e faataa i te ohipa e tupu ra. 34  Tera râ, i to ratou taaraa e e ati Iuda o ’na, tutuô a‘era ratou pauroa fatata e piti hora: “E ruahine rahi o Aretemisa a to Ephesia!” 35  Haamamû ihora te tavana oire i te nahoa e na ô atura: “Outou to Ephesia, o vai mau â i rotopu i te taata atoa aita i ite e na te oire o to Ephesia e tiai ra i te hiero o te ruahine rahi o Aretemisa e i to ’na tii tei mairi mai te ra‘i mai? 36  I te mea e e parau mau iho â teie, a parahi hau noa ïa e eiaha e ru. 37  Ua arato mai outou i teie nau taata i ǒ nei, e ere hoi raua i te eiâ i te mau taihaa o te hiero e i te feia faaino i to tatou ruahine. 38  No reira, mai te peu e e pariraa ta Demeterio e ta te mau rimaî i pee mai ia ’na i te tahi taata, te vai nei ïa te mau mahana haavaraa e te vai nei te mau tavana hau.* Ia horo ïa te tahi i te tahi i te haavaraa. 39  Mai te peu râ e e pariraa ê roa ta outou e imi ra, na te huiraatira ïa o te oire e faaoti i te reira ia au i te ture. 40  A‘unei hoi tatou e parihia ’i i te orure hau no te ohipa i tupu i teie mahana, eita hoi ta tatou e nehenehe e faataa ’tu eaha te tumu o teie faahuehueraa.” 41  I te otiraa ta ’na paraparauraa, tuu atura oia i te nahoa.

Nota i raro i te api

Aore ra “Basileia o te Atua.”
Aore ra “faaetaeta a‘era vetahi e aita i tiaturi.”
“Tamaiti” na roto i te reo Heleni.
Aore ra “e to ratou noa tihere.”
A hi‘o i te titionare.
Te mau tavana hau Roma o te hoê tuhaa fenua. A hi‘o i te titionare.