Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 18:1-28

HAAPOTORAA O TE MAU TUMU PARAU

  • Ta Paulo taviniraa i Korinetia (1-17)

  • Ho‘iraa i Anetiohia no Suria (18-22)

  • Revaraa Paulo i Galatia e i Pherugia (23)

  • Tauturuhia Apolo mea ite roa i te paraparau (24-28)

18  I muri a‘e i te reira, faarue maira Paulo i Ateno e haere atura i Korinetia.  Farerei atura oia i te hoê ati Iuda o Akuila te i‘oa tei fanauhia i Ponoto. No tae noa mai ra raua Perisila ta ’na vahine faaipoipo mai Italia mai, no te mea ua faaue Kalaudio pauroa te ati Iuda ia faarue i Roma. Haere atura ïa oia i ǒ raua ra.  E no te mea hoê â ohipa ta ratou, faaea ihora Paulo i to raua fare e hamani atura i te fare ie e o raua.  I te mau Sabati* atoa, e horoa oia i te hoê oreroraa parau* i roto i te sunago no te haaferuri i te ati Iuda e te taata Heleni ia tiaturi ratou ia Iesu.  I to Sila raua Timoteo pouraa mai Makedonia mai, haamata ’tura Paulo i te poro i te parau a te Atua ma te itoito rahi, a faaite papu ai i te ati Iuda e o Iesu te Mesia.  Teie râ, patoi e faaino noa maira ratou ia ’na, ueue ihora oia i to ’na ahu e parau atura: “Ia ho‘i mai to outou toto i nia ia outou iho. No outou noa te hape. Mai teie atu nei, e haere au i te mau taata o te mau nunaa ěê.”  Mai reira,* haere atura oia i ǒ te hoê taata haamori i te Atua o Tito Iuseto te i‘oa, mea piri roa to ’na fare i te sunago.  Teie râ, tiaturi atura Kerisepo te aratai o te sunago e to ’na atoa utuafare taatoa i te Fatu. Tiaturi atoa ’tura e rave rahi taata Korinetia tei faaroo i te parau apî oaoa e bapetizohia a‘era ratou.  Parau maira te Fatu ia Paulo na roto i te hoê orama i te po: “Eiaha e taiâ, a tamau râ i te paraparau e eiaha roa oe e mamû. 10  Tei pihai iho hoi au ia oe. Aore roa e taata e aro atu ia oe no te hamani ino ia oe, mea rahi hoi to ’u mau taata i roto i teie oire.” 11  Faaea ihora ïa oia i reira hoê matahiti e te afa i te haapiiraa i te parau a te Atua i to reira mau taata. 12  O Galio te tavana hau* i Ahaia a haru ai pauroa te ati Iuda ia Paulo e a aratai atu ai ia ’na i te vahi haavaraa, 13  a na ô ai: “Te ume ra teie tane i te mau taata ia haamori i te Atua ma te haapae i te ture.” 14  Teie râ, te faaineine ra Paulo i te pahono atu, a na ô ai Galio i te ati Iuda: “Ahiri te vai ra iho â te tahi hapa aore ra ohipa ino, mea tano ïa ia faaroo maite atu vau ia outou. 15  Teie râ, mai te peu e e mârôraa no nia i te mau parau, te mau i‘oa e ta outou iho ture, na outou ïa e haapao i te reira. Eita vau e hinaaro e haava i tena mau mea.” 16  Tiahi ihora oia ia ratou mai te vahi haavaraa mai. 17  Haru a‘era ïa ratou pauroa ia Sositene, te aratai o te sunago, e rutu a‘era ia ’na i mua i te vahi haavaraa. Aita roa ’tu râ Galio i tâu‘a ’tu. 18  Tera râ, faaea maira Paulo tau mahana atu â, aroha ihora i te mau taeae e fano atura i Suria, e o Perisila raua Akuila. I tâpû-haapoto-hia na to ’na rouru i Keneherea no ta ’na euhe. 19  Tae atura ratou i Ephesia e vaiiho maira Paulo ia raua i reira. Tomo atura râ oia i roto i te sunago e haaferuri ihora i te ati Iuda. 20  Noa ’tu e ua ani ratou ia ’na ia faaea mai â, aita oia i farii. 21  Teie râ, aroha ihora oia ia ratou e parau atura: “E ho‘i mai â vau ia outou ra, mai te peu e e hinaaro Iehova.”* Fano atura oia mai Ephesia ’tu 22  e tapae atura i Kaisarea. Pauma a‘era oia,* aroha ’tura i te amuiraa e pou ihora i Anetiohia. 23  I muri a‘e i to ’na faaea-rii-raa mai i reira, reva ’tura oia e haere atura na tera e tera oire e ati a‘e Galatia e Pherugia a faaitoito ai i te mau pǐpǐ atoa. 24  Tae maira i Ephesia te hoê ati Iuda i fanauhia i Alesanederia, o Apolo to ’na i‘oa. Mea ite roa o ’na i te paraparau e mea ite atoa i te mau Papai. 25  I haapiihia na taua taata ra i te e‘a o Iehova* e no to ’na itoito rahi maoti te varua mo‘a, paraparau atura oia e haapii atura i te taata ma te tano no nia ia Iesu, tera râ, o te bapetizoraa a Ioane ana‘e ta ’na i ite. 26  Haamata ’tura oia i te paraparau i roto i te sunago ma te mǎta‘u ore. I to Perisila raua Akuila faarooraa ia ’na, rave maira raua ia ’na e faataa ’tura i te e‘a o te Atua ma te tano atu â. 27  No to ’na hinaaro e haere i Ahaia, papai a‘era te mau taeae i te mau pǐpǐ ia farii maitai ia ’na. No reira i to ’na taeraa ’tu, tauturu rahi atura oia i te feia tei tiaturi ia Iesu no te hamani maitai rahi o te Atua, 28  ma te haapapu roa i mua i te taata e mea hape te mau haapiiraa a te ati Iuda, a faaite atu ai na roto i te mau Papai e o Iesu te Mesia.

Nota i raro i te api

A hi‘o i te titionare.
Aore ra “e haaferuri oia ia ratou.”
Oia hoi te sunago.
Te tavana hau Roma o te hoê tuhaa fenua. A hi‘o i te titionare.
A hi‘o i te titionare.
Eita e ore i Ierusalema.
A hi‘o i te titionare.