Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 17:1-34

HAAPOTORAA O TE MAU TUMU PARAU

  • Paulo e Sila i Tesalonia (1-9)

  • Paulo e Sila i Berea (10-15)

  • Paulo i Ateno (16-22a)

  • Oreroraa parau a Paulo i te Areopago (22b-34)

17  Haere atura ïa Paulo, Sila e Timoteo na Amephipoli e na Apolonia e tae atura i Tesalonia. E sunago ta te ati Iuda i reira.  Mai ta Paulo i matau, tomo atura oia i roto i te sunago, haaferuri ihora ia ratou i nia i te mau Papai e toru Sabati,*  faataa ’tura e haapapu atura ma te faahiti i tei papaihia e ia mauiui te Mesia e ia tia mai oia mai te pohe mai, a na ô ai: “Teie te Mesia, o Iesu ta ’u e faaite atu nei ia outou.”  Tiaturi a‘era vetahi ia Iesu e amui maira ia Paulo raua Sila, na reira atoa e rave rahi roa taata Heleni e haamori ra i te Atua, oia atoa e rave rahi vahine tiaraa teitei.  Teie râ, pohehae a‘era vetahi atu ati Iuda, haaputuputu maira i te tahi mau taata ino e tia hanoa ra na te mahora,* amui a‘era ratou e faahuehue atura i te oire. Tomo atura ratou i roto i te fare o Iasona e imi a‘era ia Paulo raua Sila no te arato ia raua i mua i tera rahiraa taata.  Teie râ, aita raua i itehia mai, aratai maira ïa ratou ia Iasona e te tahi mau taeae i te mau tavana o te oire, a tuô noa ’i: “Tera nau taata tei faahuehue i te fenua taatoa, to ǒ nei atoa ïa,  e ua farii Iasona ia raua i to ’na fare. Te patoi nei teie mau taata atoa i te mau faaueraa mana a Kaisara,* ma te parau e te vai ra te tahi atu arii, o Iesu.”  Taiâ a‘era tera rahiraa taata e te mau tavana o te oire i to ratou faarooraa i taua mau parau ra.  Faaaufau atura ratou ia Iasona ma i te tahi tino moni, e tuu atura ia ratou. 10  Tono ihora te mau taeae ia Paulo raua Sila i te po i Berea. I to raua taeraa ’tu, tomo atura raua i roto i te sunago a te ati Iuda. 11  Teie râ, e feruriraa maitai a‘e to Berea i to Tesalonia, ua farii hoi ratou i te parau a te Atua ma te aau tae mau, a hi‘opoa maitai ai i te mau Papai i te mau mahana atoa no te ite e e parau mau anei. 12  Tiaturi a‘era ïa e rave rahi o ratou ia Iesu, oia atoa e rave rahi vahine Heleni faaturahia e te tahi mau tane. 13  Teie râ, i te faarooraa te ati Iuda no Tesalonia e te faaite haere atoa ra Paulo i te parau a te Atua na Berea, haere maira ratou i reira e faahuehue i te taata. 14  Faahaere ihora ïa te mau taeae ia Paulo i tai, area Sila raua Timoteo, faaea maira ïa i reira. 15  Teie râ, aratai roa ’tura te feia tei apee mai ia Paulo i Ateno, e reva ’tura i to Paulo parauraa ia ratou e ia haere oioi mai Sila raua Timoteo ia ’na ra. 16  Tera râ, a tiai noa ’i Paulo ia raua i Ateno, riri ihora oia i te iteraa e ua î te oire i te idolo. 17  No reira i roto i te sunago, haaferuri atura oia i te ati Iuda e te tahi atu mau taata e haamori ra i te Atua, e i te mau taata ta ’na e farerei i te mahora* i te mau mahana atoa. 18  Teie râ, mârô maira te tahi mau philosopho Epikuro* e Setoiko* ia ’na, e na ô a‘era vetahi: “Eaha ta teie taata paraparau e faaite mai?” Na ô a‘era te tahi atu: “E au ra e e taata poro oia i te mau atua ěê.” No te mea ïa te faaite ra oia i te parau apî oaoa no nia ia Iesu e no nia i te tia-faahou-raa. 19  Haru a‘era ïa ratou ia ’na e aratai atura i te Areopago, a na ô ai: “Nehenehe oe e faaite mai eaha tena parau apî ta oe e haapii haere nei? 20  Te faahiti nei hoi oe i te tahi mau parau e mea huru ê i to matou tari‘a, e te hinaaro nei matou e ite i te auraa o te reira.” 21  Inaha, e pau noa te taime o to Ateno atoa e to te mau taata ěê e parahi* ra i reira, i te paraparau e te faaroo i te tahi parau apî. 22  Tia a‘era Paulo i ropu i te Areopago e na ô atura: “Outou to Ateno, ia hi‘o vau, i roto i te mau taata atoa, o outou te mǎta‘u a‘e i te mau atua.* 23  I to ’u hahaereraa e hi‘o-maitai-raa i ta outou mau tao‘a mo‘a,* ite atura vau i te hoê fata ua papaihia i nia iho ‘Na te hoê Atua aita matou i ite o vai.’ Ta outou e haamori nei ma te ite ore o vai, o ’na ïa ta ’u e faaite atu ia outou. 24  Te Atua tei hamani i te ao e te mau mea atoa i roto, o ’na hoi te Fatu o te ra‘i e o te fenua, e ore ïa e parahi i roto i te mau hiero hamanihia e te rima taata. 25  E ore atoa o ’na e tavinihia e te rima taata mai te mea ra e te ere ra oia i te tahi mea. Na ’na hoi e horoa na te taata atoa i te ora e te aho e te mau mea atoa. 26  E i te hoê noa taata, ua hamani oia i te mau nunaa atoa ia parahi ratou i nia i te fenua taatoa, e ua haamau oia i te mau tau faataahia e te mau otia o te nohoraa o te taata, 27  ia imi hoi ratou i te Atua, noa ’tu e mea perehahu a itehia ’tu ai oia, aita hoi oia i atea ia tatou tataitahi. 28  Maoti o ’na e ora ’i, e hahaere ai e e vai mai ai tatou, mai ta vetahi o ta outou mau rohipehe i parau: ‘E tamarii atoa hoi tatou na ’na.’ 29  No reira, i te mea e e tamarii tatou na te Atua, eiaha ïa tatou e mana‘o e e mai te auro, te ario aore ra te ofai te Atua, mai te tahi mea i mana‘ohia e i hamanihia e te taata. 30  Aita iho â te Atua i haapao i taua mau anotau ra i ore ai te taata i ite o vai o ’na. I teie nei râ, te faaite nei oia i te taata atoa i te mau vahi atoa e ia tatarahapa ratou e tia ’i. 31  Ua faataa hoi oia i te hoê mahana e haava ’i oia i to te fenua atoa ma te parau-tia na roto i te hoê taata ta ’na i maiti, e ua horoa i te haapapuraa i te taata atoa ma te faatia mai ia ’na mai te pohe mai.” 32  I to ratou faarooraa i te parau o te tia-faahou-raa o te taata pohe, faaooo maira vetahi, area te tahi atu, na ô maira ïa: “I te tahi atu mahana e faaroo ai matou ia oe no nia i tena parau.” 33  Vaiiho maira ïa Paulo ia ratou, 34  amui atura râ te tahi mau taata ia ’na e tiaturi a‘era ia Iesu. O Dionusio te tahi, haava o te Areopago, te hoê vahine o Damarisi te i‘oa e te tahi atu mau taata.

Nota i raro i te api

A hi‘o i te titionare.
I reira te taata e hoohoo ai e e ruru ai.
Aore ra “te emepera no Roma.”
I reira te taata e hoohoo ai e e ruru ai.
A hi‘o i te titionare.
A hi‘o i te titionare.
Aore ra “ratere.”
Aore ra “mea haapao a‘e i te mau ohipa faaroo.”
Aore ra “haamoriraa.”