Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 16:1-40

HAAPOTORAA O TE MAU TUMU PARAU

  • Maiti Paulo ia Timoteo (1-5)

  • Orama no nia i te tane Makedonia (6-10)

  • Fariuraa Ludia i te Atua i Philipi (11-15)

  • Tapeahia Paulo raua Sila (16-24)

  • Bapetizohia te tiai fare tapearaa e to ’na utuafare (25-34)

  • Ani Paulo ia tii mai te mau tavana hau ia raua Sila e aratai i rapae (35-40)

16  Tae atura ïa Paulo i Derebe e i Lusetera atoa. E pǐpǐ to reira o Timoteo te i‘oa, e tamaiti na te hoê vahine ati Iuda faaroo, to ’na râ metua tane, e taata Heleni ïa.  E roo maitai to Timoteo i rotopu i te mau taeae i Lusetera e i Ikonio.  Hinaaro atura Paulo ia apee mai Timoteo ia ’na, rave ihora ia ’na e peritome ihora ia ’na no te ati Iuda o taua mau vahi ra, ua ite hoi ratou pauroa e e metua tane Heleni to Timoteo.  A ratere ai ratou na te mau oire, ua faaite ratou i to reira mau taeae i te mau faaotiraa a te mau aposetolo e a te mau matahiapo no Ierusalema, ia haapao hoi ratou.  Mau papu noa ’tura ïa te mau amuiraa i roto i te faaroo e rahi noa mai ra te mau mero o te mau amuiraa i te mau mahana atoa.  Haere atoa ’tura ratou na Pherugia e na Galatia, no te mea ua opanihia ratou e te varua mo‘a ia faaite i te parau a te Atua i te fenua Asia.  E i to ratou pouraa ’tu i Misia, tamata a‘era ratou i te haere i Bitunia, aita râ Iesu maoti te varua mo‘a i faatia ia ratou.  Na Misia ’tura ratou* i te haere e pou atura i Teroa.  E i te po, ite orama ihora Paulo i te hoê tane Makedonia e tia noa ra i mua ia ’na, a taparu mai ai: “Fano mai na i Makedonia e tauturu mai na ia matou.” 10  I to Paulo iho â iteraa i taua orama ra, faaineine a‘era matou e reva i Makedonia, ua taa hoi ia matou e na te Atua i tono ia matou e faaite i te parau apî oaoa i to reira mau taata. 11  Fano tia ’tura ïa matou mai Teroa ’tu i Samoteraia, i te mahana râ i muri iho i Neapoli ïa. 12  E mai reira ’tu, reva ’tura matou i Philipi, oire faaterehia e to Roma e te oire rahi atoa o Makedonia. Faaea ihora matou i taua oire ra tau mahana. 13  I te mahana Sabati,* haere atura matou i rapaeau i te oire i pihai iho i te hoê anavai, ua mana‘o hoi matou e e vahi pureraa to reira, parahi ihora matou e paraparau atura i te mau vahine tei putuputu mai. 14  Te faaroo noa mai ra Ludia, te hoê vahine hoo ahu vareau no te oire o Tuatira, o te haamori atoa ra i te Atua. Haamahorahora roa ihora Iehova* i to ’na aau ia farii oia i te mau parau a Paulo. 15  E oti a‘era Ludia e to ’na utuafare i te bapetizohia, taparu maira oia: “Ia mana‘o outou e te tiaturi nei au ia Iehova,* a haere mai ïa e parahi i to ’u fare.” E onoono maira o ’na ia matou. 16  Teie râ, i te hoê mahana a haere ai matou i te vahi pureraa, farerei maira te hoê tavini vahine tei uruhia e te hoê varua, te hoê demoni hi‘ohi‘o, ia matou. Ua onahia to ’na mau fatu i ta ’na peu hi‘ohi‘o.* 17  Na muri noa maira taua potii ra ia matou Paulo ma, a tuô noa ’i: “E tavini teie mau tane na te Atua Teitei e te faaite atu nei ratou i te ravea e faaorahia ’i outou.” 18  Na reira noa maira oia e rave rahi mahana. Taahoa roa ihora Paulo, fariu atura i muri e na ô atura i taua varua ra: “Te faaue atu nei au ia oe i te i‘oa o Iesu Mesia ia haere mai i rapae ia ’na.” I reira iho, haere maira taua varua ra i rapae. 19  I te iteraa to ’na mau fatu e eita ratou e ona-faahou-hia, haru a‘era ratou ia Paulo raua Sila e arato atura ia raua i te mahora* i te mau tia faatere. 20  A aratai ai ratou ia raua i taua mau tavana tivira ra, na ô atura ratou: “Te faahuehue roa nei teie nau taata i to tatou oire. E ati Iuda raua, 21  e te faaite haere nei raua i te mau mea ua opanihia tatou ia farii aore ra ia rave, e taata Roma hoi tatou.” 22  Parau iria maira te nahoa ia raua, e faaue ihora te mau tavana tivira ia huti mai i to raua ahu e ia tairi ia raua i te raau. 23  I muri a‘e i to ratou tairiraa ia raua e rave rahi taime, huri atura ratou ia raua i roto i te tapearaa e poroi atura i te tiai ia tiai maitai ia raua. 24  No taua poroi ra, huri ihora te tiai ia raua i roto i te piha i roto roa e haamau atura i to raua avae i roto i te raau. 25  Teie râ, piri i te tuiraa po, te pure ra e te arue ra Paulo raua Sila i te Atua ma te himene e te faaroo noa mai ra te feia tapeahia ia raua. 26  I reira iho, aueue roa a‘era te fenua e hautiuti atura te niu o te fare tapearaa. Matara atoa ihora te mau uputa atoa e te mau fifi auri o te taata atoa. 27  Ara a‘era te tiai, ite ihora e ua matara te mau uputa o te fare tapearaa, e huti maira i ta ’na ‘o‘e no te haapohe ia ’na, ua mana‘o hoi oia e ua horo te feia tapeahia. 28  Teie râ, tuô atura Paulo: “Eiaha e haapohe ia oe, to ǒ nei hoi matou pauroa!” 29  Ani maira ïa te tiai i te mori, horo maira i roto, e topa turi ihora ma te rûrû i mua ia Paulo raua Sila. 30  Aratai atura oia ia raua i rapaeau e na ô maira: “Ia aha vau e faaorahia ’i au?” 31  Parau atura raua: “A tiaturi i te Fatu ra o Iesu, e faaorahia ïa oe e to oe utuafare.” 32  Faaite atura raua i te parau a Iehova* ia ’na e i te feia atoa o to ’na utuafare. 33  I taua taime o te po ra, afai atura oia ia raua i te hoê vahi no te horoi i to raua pepe. E bapetizohia ihora oia e to ’na utuafare taatoa. 34  Aratai atura oia ia raua i roto i to ’na fare, faanaho ihora i te maa i nia i te amuraa maa na raua, e oaoa roa ’tura oia e to ’na utuafare taatoa, i te mea e te tiaturi ra oia i te Atua. 35  E ao a‘era, tono maira te mau tavana tivira i te mau tiai e parau i te tiai fare tapearaa: “A tuu i tena nau tane.” 36  Faaite ihora taua tiai ra i ta ratou mau parau ia Paulo: “Ua tono mai te mau tavana tivira i te taata ia tuuhia orua. No reira, a haere i rapae i teie nei ma te hau.” 37  Teie râ, na ô atura Paulo i te mau tiai: “Ua hui ratou ia mâua i mua i te taata ma te ore mâua e faautuahia,* o mâua e taata Roma, e ua huri ia mâua i roto i te tapearaa. Te hinaaro ra ratou e tuu huna noa ia mâua? Eita ïa! Na ratou e tii mai ia mâua e aratai i rapae.” 38  Faaite atura taua mau tiai ra i teie mau parau i te mau tavana tivira. Mǎta‘u a‘era taua mau tavana ra i to ratou faarooraa e e taata Roma raua. 39  Haere maira ïa ratou e taparuparu ia Paulo raua Sila, aratai atura ia raua i rapaeau e parau atura ia faarue mai i te oire. 40  Teie râ, faarue maira raua i te tapearaa, haere atura i te fare o Ludia, e i to raua iteraa i te mau taeae, faaitoito atura raua ia ratou e reva ’tura.

Nota i raro i te api

Aore ra “Na roto atura ratou ia Misia.”
A hi‘o i te titionare.
A hi‘o i te titionare.
A hi‘o i te titionare.
Aore ra “peu e tohu i te ananahi.”
I reira te taata e hoohoo ai e e ruru ai.
A hi‘o i te titionare.
Aore ra “e haavahia.”