Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 15:1-41

HAAPOTORAA O TE MAU TUMU PARAU

  • Mârôraa i Anetiohia no te peritomeraa (1, 2)

  • Afaihia teie parau i Ierusalema (3-5)

  • Putuputu te mau matahiapo e te mau aposetolo (6-21)

  • Rata a te tino aratai (22-29)

    • Haapae i te toto (28, 29)

  • Faaitoitohia te mau amuiraa na roto i te rata (30-35)

  • Haereraa Paulo i to ’na tere e Baranaba i to ’na (36-41)

15  Pou maira te tahi mau tane i Anetiohia mai Iudea mai e haapii maira i te mau taeae: “Ia ore outou e peritomehia ia au i te ture a Mose, e ore outou e faaorahia.”  Teie râ, mârô e patoi atura Paulo raua Baranaba ia ratou e faanahohia ’tura e ia pauma Paulo, Baranaba e te tahi mau taeae i Ierusalema e farerei i te mau aposetolo e te mau matahiapo no te faaite atu i taua fifi* ra.  I muri a‘e i to te amuiraa apeeraa ia ratou maa taime, haere atura taua mau tane ra na Phenikia e na Samaria, a faatia maite ai mea nafea to te mau taata o te mau nunaa ěê fariuraa i te Atua no te haamori ia ’na, a oaoa roa ’tu ai te mau taeae atoa.  I to ratou taeraa ’tu i Ierusalema, farii-maitai-hia maira ratou e te amuiraa e te mau aposetolo e te mau matahiapo, e faatia ’tura e rave rahi ohipa ta te Atua i rave na roto ia ratou.  Teie râ, tia maira vetahi o te pǔpǔ faaroo amaha Pharisea tei tiaturi na i te Mesia e na ô maira: “Ia peritomehia te mau taata o te mau nunaa ěê e tia ’i e ia faauehia ratou ia haapao i te ture a Mose.”  Putuputu a‘era ïa te mau aposetolo e te mau matahiapo no te hi‘opoa i taua parau ra.  Tupu ihora te hoê aparauraa* rahi, tia maira Petero e na ô atura: “Taeae ma, ua ite maitai outou e mai te omuaraa mai â, ua maiti te Atua ia ’u i rotopu ia outou ia faaite au i te mau taata o te mau nunaa ěê i te parau apî oaoa e ia tiaturi ratou.  E ua haapapu te Atua, tei ite eaha to roto i te aau, e ua farii oia ia ratou ma te horoa ’tu i te varua mo‘a, mai ta ’na i na reira atoa ia tatou.  Aita roa atoa oia i faataa ê ia tatou ia ratou, ua tamâ râ i to ratou aau no to ratou faaroo. 10  No te aha ïa outou e mârô ai i te Atua ma te faateimaha i te mau pǐpǐ i te hoê zugo aita i maraa i to tatou mau tupuna e ia tatou atoa nei ia amo? 11  Area tatou, te tiaturi ra ïa e e faaorahia tatou maoti te hamani maitai rahi o te Fatu ra o Iesu, ta ratou atoa ïa e tiaturi ra.” 12  Mamû a‘era ratou pauroa, e faaroo atura ia Baranaba raua Paulo ia faatia e rave rahi semeio e ohipa maere* ta te Atua i rave na roto ia raua i rotopu i te mau nunaa ěê. 13  I te otiraa ta raua faatiaraa, na ô atura Iakobo: “Taeae ma, a faaroo mai na. 14  Ua faatia maite mai Simeona* e ua farii mai nei te Atua i te mau nunaa ěê e ua maiti i rotopu ia ratou i te hoê nunaa no te amo i to ’na i‘oa. 15  O ta te mau peropheta iho â ïa i parau, mai tei papaihia: 16  ‘I muri a‘e i teie mau mea, e ho‘i mai au e e faatia faahou vau i te tiahapa o Davida tei mairi i raro. E tataî au i te mau vahi paparari, a faatia faahou ai i taua tiahapa ra, 17  a nehenehe atu ai te feia e toe ra e te nunaa i mairihia i to ’u nei i‘oa no roto mai i te mau nunaa ěê atoa, e imi mau â ia Iehova.* Te parau ïa a Iehova,* o te rave nei i teie mau mea 18  ta ’na i faaoti ê na e rave.’ 19  No reira, teie ta ’u faaotiraa,* eiaha e haapeapea i to te mau nunaa ěê o te haamori nei i te Atua, 20  ia papai râ ia ratou ia haapae i te mau mea tei viivii i te idolo, i te mau peu taotoraa tia ore,* i te animara uumihia* e i te toto. 21  Mai tahito mai â hoi, i porohia na te mau papai a Mose i tera e tera oire, e i taiohia na ta ’na mau papai i roto i te mau sunago i te mau Sabati* atoa.” 22  Faaoti a‘era ïa te mau aposetolo, te mau matahiapo e te amuiraa taatoa e tono e piti tane maitihia i rotopu ia ratou na muri ia Paulo raua Baranaba i Anetiohia. Tono a‘era ratou ia Iuda piihia Barasaba e ia Sila, nau tane aratai i rotopu i te mau taeae. 23  Teie ta ratou i papai e i hapono na roto i taua mau tane ra: “Te aroha ’tu nei te mau aposetolo e te mau matahiapo, to outou mau taeae, i te mau taeae o te mau nunaa ěê no Anetiohia, Suria e Kilikia! 24  Ua faaroo matou e ua haapeapea vetahi no ǒ nei atu ia matou nei ia outou i ta ratou mau parau, a tamata ’i i te faahuehue ia outou,* noa ’tu e aita matou i faaue ia ratou. 25  Faaoti a‘era ïa matou paatoa e maiti e piti tane no te tono ia outou ra na muri i to matou nau taeae here Baranaba raua Paulo, 26  o tei faaruru i te pohe no te i‘oa o to tatou Fatu ra o Iesu Mesia. 27  Te tono atu nei ïa matou ia Iuda raua Sila, na raua ïa e faatia atoa ’tu i teie mau mea. 28  Ua faaoti hoi te varua mo‘a e matou iho nei eiaha e faateimaha ia outou, teie noa râ ta outou e haapao e tia ’i: 29  e haapae i te mau mea pûpûhia ei tusia na te idolo, i te toto, i te animara uumihia* e i te mau peu taotoraa tia ore.* Ia haapae outou i teie mau mea, e maitai ïa outou. Ia maitai noa outou!” 30  Tuuhia ’tura taua nau tane ra, pou ihora raua i Anetiohia, haaputuputu a‘era i te mau pǐpǐ atoa e horoa ’tura i te rata. 31  I te otiraa ta ratou taioraa i te rata, oaoa a‘era ratou no te faaitoitoraa i roto. 32  Tauturu e faaitoito atura Iuda raua Sila, e peropheta atoa hoi raua, i te mau taeae na roto e rave rahi oreroraa parau. 33  I muri a‘e i to raua faaearaa i reira tau mahana, aroha maira te mau taeae ia raua e ho‘i atura raua i Ierusalema. 34  *—— 35  Teie râ, parahi ihora Paulo raua Baranaba i Anetiohia, a haapii ai i te taata e a faaite haere ai raua e e rave rahi atoa taeae i te parau apî oaoa o te parau a Iehova.* 36  Tau mahana i muri iho, na ô atura Paulo ia Baranaba: “Mai, ho‘i ana‘e e hi‘o i te mau taeae i roto i te mau oire atoa i reira to tâua faaiteraa i te parau a Iehova,* ia ite tâua eaha to ratou huru.” 37  Onoono ihora Baranaba e rave atoa ia Ioane piihia Mareko. 38  Area Paulo, aita ïa i mana‘o e mea tano ia rave ia ’na na muri ia raua, i te mea e i vaiiho na oia ia raua i Pamephulia e aita ’tura i apee ia raua i roto i te pororaa. 39  Riri roa ’tura te tahi i te tahi e taa ê atura raua. Rave ihora Baranaba ia Mareko e fano atura raua i Kupero. 40  Maiti ihora Paulo ia Sila e i muri a‘e i to te mau taeae pureraa ia hamani maitai rahi Iehova* ia Paulo, reva ’tura o ’na. 41  Haere atura oia na Suria e na Kilikia, a faaitoito ai i te mau amuiraa.

Nota i raro i te api

Aore ra “mârôraa.”
Aore ra “mârôraa.”
Aore ra “tapao.”
Pii-atoa-hia Petero.
A hi‘o i te titionare.
A hi‘o i te titionare.
Aore ra “to ’u mana‘o.”
A hi‘o i te titionare.
Aore ra “te animara tupaihia aita râ te toto i faatahehia.”
A hi‘o i te titionare.
Heleni pusuke. A hi‘o i te titionare.
Aore ra “te animara tupaihia aita râ te toto i faatahehia.”
A hi‘o i te titionare.
Te vai ra teie irava i roto i te tahi mau huriraa Bibilia, aita râ i roto e rave rau papai Heleni tahito fariihia.
A hi‘o i te titionare.
A hi‘o i te titionare.
A hi‘o i te titionare.