Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 14:1-28

HAAPOTORAA O TE MAU TUMU PARAU

  • Maraaraa e patoiraa i Ikonio (1-7)

  • Mana‘ohia e atua i Lusetera (8-18)

  • Pehihia Paulo e ua ora mai (19, 20)

  • Faaitoitoraa i te mau amuiraa (21-23)

  • Ho‘iraa i Anetiohia no Suria (24-28)

14  Tera râ, i Ikonio tomo atura Paulo raua Baranaba i roto i te sunago a te ati Iuda e no to raua ite i te paraparau, tiaturi a‘era e rave rahi roa ati Iuda e Heleni atoa ia Iesu.  Area te ati Iuda aita i tiaturi, faahuehue a‘era ïa i te mau taata o te mau nunaa ěê ia riri ratou ia Paulo raua Baranaba.  No reira, tau hebedoma i te maoro, maoti te mana o Iehova,* poro atura raua ma te taiâ ore i te poroi o to ’na hamani maitai rahi, ta ’na i haapapu atu ia raua ma te horoa ’tu i te mana no te faatupu i te semeio e te ohipa maere.*  Amahamaha a‘era râ te rahiraa taata o taua oire ra. Ua turu vetahi i te ati Iuda, te tahi atu râ i na aposetolo ïa.  Opua a‘era te mau taata o te mau nunaa ěê e te ati Iuda e to ratou mau raatira e tuhi e e pehi ia raua i te ofai,  ite atura raua i te reira, e horo ê atura i na oire i Lukaonia o Lusetera e Derebe, e te mau oire rii tapiri.  I reira faaite noa ’tura raua i te parau apî oaoa.  Teie râ i Lusetera, te parahi noa ra te tahi taata e avae paruparu to ’na. E piri‘o‘i oia mai to ’na fanauraahia mai â e aita oia i haere a‘enei.  Te faaroo noa ra taua taata ra ia Paulo e paraparau ra. Hi‘o noa ’tura Paulo ia ’na, ite ihora e e faaroo to ’na e ora ’i to ’na ma‘i, 10  parau haapuai atura: “A tia mai.” Ou‘a a‘era taua taata ra i nia e haere ihora. 11  I to te nahoa iteraa i ta Paulo i rave mai nei, tuô a‘era ratou na roto i te reo Lukaonia: “Ua riro te mau atua mai te taata ra te huru e ua pou mai ia tatou nei!” 12  Mairi a‘era ratou ia Baranaba i te i‘oa ra o Dia, ia Paulo râ o Hereme ïa, i te mea e o ’na te taata paraparau roa ’‘e. 13  Tei te tomoraa o te oire te hiero o Dia. Afai maira te tahu‘a a Dia i te puaatoro oni e te hei i te uputa o te oire e hinaaro a‘era o ’na e te nahoa e tupai i te puaatoro oni no te haamori ia Paulo raua Baranaba. 14  Teie râ, i to na aposetolo Baranaba raua Paulo faarooraa i te reira, hahae a‘era raua i to raua ahu, horo atura i ropu i te nahoa e tuô atura: 15  “E homa, no te aha outou e na reira ’i? E taata noa hoi mâua mai ia outou. E te faaite atu nei mâua i te parau apî oaoa ia haapae outou i teie mau mea faufaa ore no te haamori i te Atua ora, o tei hamani i te ra‘i e te fenua e te miti e te mau mea atoa i roto. 16  I mutaa ihora, i vaiiho na oia i te mau nunaa atoa ia rave mai ta ratou i hinaaro. 17  Ua faaite mai râ o ’na i to ’na huru a hamani maitai mai ai, ma te horoa ’tu i te ûa mai te ra‘i mai e te tau auhune, a fana‘o rahi atu ai outou i te maa e a oaoa ’i to outou aau.” 18  Noa ’tu râ teie mau parau, e ere mea ohie no raua i te tapearaa i tera rahiraa taata ia ore e pûpû i te tusia ia raua. 19  Tera râ, tae maira vetahi ati Iuda mai Anetiohia e Ikonio mai e faahuehue a‘era i tera rahiraa taata, e pehihia ’tura e aratohia ’tura Paulo i rapaeau i te oire, ua mana‘o hoi ratou e ua pohe o ’na. 20  Teie râ, haaati a‘era te mau pǐpǐ ia ’na, tia maira oia e tomo atura i roto i te oire. I te mahana i muri iho, reva ’tura raua Baranaba i Derebe. 21  Faaite atura raua i te parau apî oaoa na taua oire ra, faariro atura raua vetahi ei pǐpǐ e ho‘i maira i Lusetera, Ikonio e Anetiohia. 22  Faaitoito a‘era raua i te mau pǐpǐ na reira ia mau papu i roto i te faaroo, a na ô ai: “E na roto atu tatou i te ati e rave rahi e ô ai tatou i roto i te Faatereraa arii a te Atua.”* 23  E faatoroa ’tura raua i te mau matahiapo i roto i te mau amuiraa atoa, ma te pure e ma te haapae i te maa, e pûpû atura i taua mau matahiapo ra ia Iehova,* ta ratou i tiaturi. 24  Na roto atura raua ia Pisidia, tae atura i Pamephulia, 25  faaite haere atura i te parau a te Atua na Perege e pou ihora i Atalia. 26  Mai reira mai, fano atura raua i Anetiohia, i reira to te mau taeae pureraa ia hamani maitai rahi te Atua ia raua no te ohipa ta raua i faaoti a‘enei. 27  I to raua taeraa ’tu i Anetiohia e haaputuputuraa i te amuiraa, faatia ’tura raua e rave rahi ohipa ta te Atua i rave na roto ia raua, e i horoa na oia i te ravea e farii ai te mau nunaa ěê i te faaroo. 28  Faaea maoro atura ïa raua i ǒ te mau pǐpǐ ra.

Nota i raro i te api

A hi‘o i te titionare.
Aore ra “tapao.”
Aore ra “Basileia o te Atua.”
A hi‘o i te titionare.