Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 13:1-52

HAAPOTORAA O TE MAU TUMU PARAU

  • Tonohia Baranaba raua Saulo ei mitionare (1-3)

  • Taviniraa i Kupero (4-12)

  • Oreroraa parau a Paulo i Anetiohia no Pisidia (13-41)

  • Poroi parau tohu e poro i te mau nunaa ěê (42-52)

13  E teie nei, e peropheta e e orometua haapii to te amuiraa no Anetiohia: Baranaba, Timeona piihia Nigere, Lukio no Kurene, Manaena hoê â to raua Heroda te arii haereraa i te haapiiraa, e Saulo.  Te haamori ra ratou ia Iehova* e te haapae ra i te maa, na ô maira te varua mo‘a: “A faataa mai na ia Baranaba raua Saulo, ua maiti au ia raua no te tahi ohipa.”  Haapae a‘era ratou i te maa, pure atura, tuu a‘era i to ratou rima i nia iho ia raua e tono atura ia raua.  Pou ihora ïa nau tane, tei tonohia e te varua mo‘a, i Seleukia e mai reira ’tu, fano atura i Kupero.  Tapae atura raua i Salami, e faaite atura i te parau a te Atua i roto i te mau sunago a te ati Iuda. Tei ia raua atoa ra Ioane ei tauturu ia raua.  Na roto atura ratou i taua motu taatoa ra e tae roa i Papho, e farerei atura i te hoê ati Iuda o Bara-Iesu te i‘oa. E tahutahu e e peropheta haavare oia.  Te tia ra oia i ǒ te tavana hau* Serigio Paulo, te hoê taata maramarama. Tii maira o ’na ia Baranaba raua Saulo no to ’na hinaaro rahi e faaroo i te parau a te Atua.  Teie râ, patoi maira te tahutahu Elima* (tera hoi te auraa o to ’na i‘oa) ia raua, a imi ai i te ravea ia ore te tavana hau e tiaturi i te Fatu.  Î ihora Saulo pii-atoa-hia Paulo i te varua mo‘a, hi‘o noa ’tura ia ’na 10  e na ô atura: “E taata haavare roa oe e e taata ino roa atoa, e tamaiti oe na te Diabolo, mea au ore roa na oe te mau mea tia atoa. Eita oe e faaea i te haapi‘o i te mau raveraa afaro a Iehova?* 11  Inaha, e faautua Iehova* ia oe, e matapohia oe, eita oe e ite faahou i te maramarama o te mahana maa taime.” Mohimohi ihora e poiri roa ’tura to ’na na mata, perehahu noa ’tura oia i te imiraa i te tahi taata no te aratai rima ia ’na. 12  I te iteraa te tavana hau i te ohipa i tupu, tiaturi ihora oia i te Fatu no to ’na maere rahi i te haapiiraa a Iehova.* 13  Fano atura Paulo e to ’na nau hoa mai Papho atu e tapae atura i Perege i Pamephulia. Tera râ, faarue maira Ioane ia raua e ho‘i atura i Ierusalema. 14  Mai Perege atu, haere atura raua i Anetiohia i Pisidia. I te mahana Sabati,* tomo atura raua i roto i te sunago e parahi ihora. 15  I muri a‘e i te taioraahia te ture a Mose e te mau papai a te mau peropheta, ani atura te mau aratai o te sunago ia Paulo raua Baranaba: “Taeae ma, e parau faaitoitoraa ta orua no matou, a parau mai ïa.” 16  Tia maira Paulo, apǎ ’tura i te rima ia mamû te taata e na ô atura: “Outou to Iseraela e outou atoa e mǎta‘u ra i te Atua, a faaroo mai. 17  Ua maiti te Atua o te nunaa Iseraela i to tatou mau tupuna, ua tauturu ia ratou a parahi ai ratou ei taata ěê i te fenua Aiphiti e ua hopoi ia ratou i rapae i taua fenua ra ma te rima puai. 18  E 40 matahiti to ’na faaoromai-noa-raa ia ratou i roto i te medebara. 19  I muri a‘e i to ’na haamouraa e hitu nunaa o te fenua Kanaana, tufa ihora i taua fenua ra e opere atura na te mau opu o Iseraela ia fatu ratou. 20  E 450 tiahapa matahiti te tupuraa teie mau mea atoa. I muri a‘e i te reira, faatoroa ’tura te Atua i te mau tavana no ratou e tae roa ’tu i te tau o Samuela te peropheta. 21  I reira ratou i te aniraa i te hoê arii, e horoa ’tura te Atua ia Saula te tamaiti a Kisa no roto mai i te opu o Beniamina, ua arii oia e 40 matahiti. 22  I muri a‘e i to te Atua tatararaa i to ’na tiaraa, maiti atura oia ia Davida ei arii no ratou, no ’na hoi i parau ai oia: ‘E taata o Davida te tamaiti a Iese ta to ’u aau e farii e e rave oia i te mau mea atoa ta ’u e hinaaro.’ 23  Ia au i ta ’na parau fafau, no roto mai i te huaai* o taua taata ra e faatupu ai te Atua i te hoê faaora no Iseraela, o Iesu. 24  Na mua a‘e Iesu i haere mai ai, ua poro Ioane i te mau taata atoa o Iseraela ia bapetizohia ratou ei faaiteraa i to ratou tatarahapa. 25  Tera râ, i te pae hopea o ta Ioane taviniraa i parau na oia: ‘O vai au i to outou mana‘o? E ere au te Mesia. Inaha, o tei haere mai i muri a‘e ia ’u, e ore e tia ia ’u ia tatara i te tiaa o to ’na na avae.’ 26  Taeae ma, tamarii o te utuafare o Aberahama e outou atoa e mǎta‘u ra i te Atua, ua faatae mai te Atua i te parau o teie faaoraraa ia tatou. 27  Aita i taa i te mau taata no Ierusalema e to ratou mau raatira e o ’na tera, i to ratou râ haavaraa ia ’na, ua faatupu ratou i ta te mau peropheta i parau o te taiohia i mua i te taata i te mau Sabati atoa. 28  Noa ’tu e aita e tumu ia haapohehia o ’na, ua ani ratou ia Pilato ia haapohe ia ’na. 29  Oti a‘era ia ratou i te faatupu i te mau mea atoa i papaihia no ’na, haapou maira ratou ia ’na mai nia mai i te pou* e tuu ihora ia ’na i roto i te hoê menema.* 30  Tera râ, ua faatia mai te Atua ia ’na mai te pohe mai, 31  e e rave rahi mahana to ’na faraa ’tu i ta ’na mau pǐpǐ tei pauma na muri ia ’na i Ierusalema mai Galilea ’tu. O ratou i teie nei to ’na mau ite i mua i te taata. 32  No reira ïa matou e faaite atu ai i te parau apî oaoa no nia i te parau i fafauhia i to tatou mau tupuna. 33  Ua faatupu roa te Atua i taua parau fafau ra no tatou, ta ratou ïa mau tamarii, ma te faatia mai ia Iesu, mai tei papaihia i roto i te Salamo piti: ‘O oe ta ’u tamaiti. I teie mahana ua riro vau ei metua no oe.’ 34  Ua faatia mai te Atua ia ’na mai te pohe mai, a ore roa ’tu ai o ’na e tahuti. Teie hoi ta ’na i parau: ‘E hamani maitai iho â vau ia outou ma te here mai ta ’u i fafau na ia Davida.’ 35  Te na ô atoa ra te tahi atu Salamo: ‘E ore oe e vaiiho i te tino o to tavini taiva ore ia tahuti.’ 36  Ua tavini Davida i te Atua* i to ’na ra tau, ua pohe, ua hunahia i pihai iho i to ’na mau tupuna, e ua tahuti to ’na tino. 37  Area tei faatiahia mai e te Atua, aita ïa to ’na tino i tahuti. 38  Ia ite mai ïa outou taeae ma, te faaitehia ’tu nei e maoti o ’na e faaorehia ’i te hara, 39  e aita outou i riro mai ei taata parau-tia na roto i te ture a Mose, te taata râ e tiaturi e riro mai ïa ei taata parau-tia na roto ia ’na. 40  No reira, a haapao maitai ia ore outou ia roohia i tei parauhia i roto i te mau papai a te mau peropheta: 41  ‘A hi‘o na, outou te feia vahavaha, a maere e a mou atu, te rave nei hoi au i te tahi ohipa i to outou ra mau mahana, ta outou e ore roa e tiaturi, noa ’tu e e faatia pauroa ’tu te tahi taata i te reira.’” 42  A haere ai Paulo raua Baranaba i rapaeau i te sunago, onoono maira te taata ia parau â raua i te reira i to muri iho Sabati. 43  I muri a‘e i te putuputuraa i te sunago, mea rahi te ati Iuda e te taata o tei farii i te haapaoraa ati Iuda* tei pee ia Paulo raua Baranaba. Ua paraparau raua ia ratou ma te ani ru atu ia mau papu i te hamani maitai rahi o te Atua. 44  I te Sabati i muri iho, fatata pauroa te taata o te oire tei putuputu mai no te faaroo i te parau a Iehova.* 45  I te iteraa te ati Iuda i tera rahiraa taata, pohehae roa ’tura ratou e patoi atura i ta Paulo mau parau ma te faaino ia ’na. 46  Parau atura Paulo raua Baranaba ia ratou ma te taiâ ore: “Ia faaitehia te parau a te Atua ia outou na mua roa e tia ’i. I te mea e te patoi ra outou i te reira e te haafaufaa ore ra i te ora mure ore, e poro ïa mâua i te mau nunaa ěê. 47  Ua poroi mai hoi Iehova:* ‘Ua faatoroa vau ia oe ei maramarama no te mau nunaa, ia riro hoi oe ei faaora e tae noa ’tu i te hopea o te fenua.’” 48  I to te mau nunaa ěê faarooraa i taua parau ra, oaoa roa ihora ratou, faahanahana ’tura i te parau a Iehova,* e tiaturi a‘era pauroa te taata aau farii i te ora mure ore ia Iesu. 49  Parare atoa ’tura te parau a Iehova* na taua fenua taatoa ra. 50  Tera râ, faahuehue a‘era te ati Iuda i te mau vahine tiaraa teitei e mǎta‘u ra i te Atua e te mau raatira o taua oire ra, hamani-ino-hia ’tura Paulo raua Baranaba e tiahihia ’tura i rapae i to ratou fenua. 51  Tûtû atura raua i te repo o to raua avae* ei faaararaa ia ratou e reva ’tura i Ikonio. 52  E î noa ’tura te mau pǐpǐ i te varua mo‘a e oaoa roa a‘era.

Nota i raro i te api

A hi‘o i te titionare.
Te tavana hau Roma o te hoê tuhaa fenua. A hi‘o i te titionare.
Oia hoi Bara-Iesu.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
“Huero” na roto i te reo Heleni.
Aore ra “raau.”
Aore ra “menema haamana‘oraa.”
Aore ra “Ua rave Davida i te hinaaro o te Atua.”
Aore ra “peroseluto.”
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
E faaiteraa ïa e na te taata iho e amo i ta ’na utua.