Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 12:1-25

HAAPOTORAA O TE MAU TUMU PARAU

  • Haapohehia Iakobo, tapeahia Petero (1-5)

  • Tuu-semeio-hia mai Petero (6-19)

  • Tairihia Heroda e te hoê melahi (20-25)

12  I taua anotau ra, te hamani ino ra Heroda te arii vetahi mau mero o te amuiraa.  Haapohe ihora oia ia Iakobo te taeae o Ioane i te ‘o‘e.  I to ’na iteraa e ua mauruuru te ati Iuda i te reira, tapea atoa ihora oia ia Petero. (O te mau mahana hoi o te Oroa pane* hopue ore.)  Haru ihora oia ia Petero, tuu atura i roto i te tapearaa e faaue atura ia tiai e maha pǔpǔ faehau ia ’na te tahi i muri iho i te tahi. E maha faehau te pǔpǔ hoê. Ua opua oia e aratai mai ia ’na i rapaeau* i mua i te taata i muri a‘e i te Pasa.  A tiaihia ’i Petero i roto i te tapearaa, tamau noa ’tura te amuiraa i te pure i te Atua no ’na.  I te po hou Heroda a aratai mai ai ia Petero i rapaeau, te taoto noa ra Petero tei taamuhia te rima i e piti fifi auri i ropu e piti faehau, e piti atoa faehau to mua i te uputa e tiai ra i te tapearaa.  Teie râ, fa maira te hoê melahi a Iehova* e anaana maira te maramarama i roto i taua piha tapearaa ra. Tapea ihora oia i te aoao o Petero no te faaara ia ’na e na ô maira: “A tia haaviti!” Marua ihora na fifi auri i taamuhia ’i to ’na na rima.  Na ô maira te melahi ia ’na: “A faaineine ia oe e a oomo i to oe tiaa.” Na reira ihora Petero. E na ô maira te melahi: “A oomo i to oe ahu tapo‘i e a pee mai ia ’u.”  Na muri atura Petero i te melahi i te haereraa ’tu i rapae, aita râ oia i ite e te tupu ra iho â ta te melahi e rave ra. Ua mana‘o hoi o ’na e e orama ta ’na e ite ra. 10  Mairi maira ia raua te pǔpǔ tiai matamua e te piti, tae atura raua i te uputa auri mea na reira ia haere atu i te oire, e te matara noa ra taua uputa ra i mua ia raua. Haere atura raua i rapae, na roto atura i te hoê aroâ i te pouraa e faarue maira te melahi ia ’na i reira iho. 11  Taa ihora ia Petero te ohipa e tupu ra e na ô ihora: “Papu atura ia ’u i teie nei e ua tono mai Iehova* i ta ’na melahi e ua faaora ia ’u i te rima o Heroda e i te mau mea atoa ta te ati Iuda e tiai noa ra ia tupu.” 12  I muri a‘e i to ’na feruriraa i te reira, haere atura oia i te fare o Maria te metua vahine o Ioane piihia Mareko, mea rahi te pǐpǐ tei putuputu i reira e te pure ra. 13  I to ’na patotoraa ’tu i te uputa, haere maira te hoê tavini vahine o Roda te i‘oa e hi‘o o vai tera. 14  Taa a‘era ia ’na e o Petero i to ’na faarooraa i to ’na reo. No to ’na oaoa rahi, aita oia i iriti i te uputa, horo atura râ i roto e parau e tei te uputa Petero. 15  Na ô maira ratou: “Ua maamaahia oe.” Onoono atura râ oia i te parau e o Petero iho â. Na ô maira ratou: “O ta ’na ïa melahi.” 16  Teie râ, tia noa ihora Petero i te uputa, a patoto noa ’i. Iriti maira ratou i te uputa, ite maira ia ’na e maere a‘era. 17  Apǎ ’tura râ Petero i te rima ia mamû ratou, faatia pauroa ’tura mea nafea Iehova* i te aratairaa mai ia ’na i rapae i te tapearaa e na ô atura: “A faaite i teie mau mea ia Iakobo e i te mau taeae.” Reva ’tura oia i te tahi atu vahi. 18  E ao a‘era, atutu roa ’tura te parau no Petero i rotopu i te mau faehau teihea roa o ’na. 19  Paimi ihora Heroda ia Petero, aita râ i itehia e ana, uiui atura i te mau faehau e faaue ihora ia arataihia ratou i te faautuaraa. Pou atura Heroda mai Iudea ’tu i Kaisarea e parahi ihora i reira tau mahana. 20  Teie râ, e riri rahi to ’na* i to Turia e to Sidona. No reira, ma te hoê â mana‘o, haere maira ratou ia ’na ra, e i muri a‘e i te taparuraa ia Belaseto, taata haapao i te mau ohipa utuafare a te arii,* ia tauturu ia ratou, ani maira ratou e faatupu i te hau e te arii, no te mea no ǒ mai ta ratou maa i te fenua o te arii. 21  I te hoê mahana a putuputu ai te taata, oomo ihora Heroda i te ahu arii, parahi ihora i te vahi haavaraa e orero atura. 22  Tuô maira taua mau taata ra: “E reo atua, e ere i te reo taata!” 23  Tairi ihora te melahi a Iehova* ia ’na, no te mea aita oia i faahanahana i te Atua, aihia ’tura oia e te to‘e e pohe atura. 24  Teie râ, atutu atura te parau a Iehova* e tiaturi a‘era e rave rahi. 25  Area Baranaba raua Saulo, ho‘i atura ïa i Anetiohia i te otiraa ta raua ohipa tauturu i Ierusalema, e rave atoa maira ia Ioane pii-atoa-hia Mareko na muri ia raua.

Nota i raro i te api

Aore ra “faraoa.”
Aore ra “e aratai mai ia ’na i rapae no te haava ia ’na.”
A hi‘o i te titionare.
A hi‘o i te titionare.
A hi‘o i te titionare.
Aore ra “e hinaaro rahi to ’na e aro.”
“Te piha taotoraa o te arii” na roto i te reo Heleni.
A hi‘o i te titionare.
A hi‘o i te titionare.