Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 11:1-30

HAAPOTORAA O TE MAU TUMU PARAU

  • Faatia Petero i te ohipa i tupu i te mau aposetolo (1-18)

  • Baranaba raua Saulo i Anetiohia no Suria (19-26)

    • Parauhia te mau pǐpǐ e Kerisetiano (26)

  • Tohu Agabo e tupu te o‘e (27-30)

11  Faaroo ihora te mau aposetolo e te mau taeae no Iudea e ua farii atoa te taata o te mau nunaa ěê i te parau a te Atua.  No reira, i to Petero paumaraa i Ierusalema, faaino* maira te feia e turu ra i te peritomeraa ia ’na,  a na ô ai: “Ua tomo oe i roto i te fare o te feia aita i peritomehia e ua tamaa oe e o ratou.”  Tatara ’tura Petero i te ohipa i tupu a na ô ai:  “Tei te oire au i Iopa, e te pure ra vau, ite orama ihora vau i te tahi mea e au i te hoê ahu lino rahi mea tapeahia na poro e maha, e pou maira mai te ra‘i mai e tae roa mai ia ’u ra.  I to ’u hi‘o-maitai-raa ’tu i roto, ite ihora vau i te animara avae maha o te fenua, te animara oviri, te animara e nee haere e te manu o te reva.  Faaroo atoa ’tura vau i te hoê reo i te na ôraa mai: ‘A tia Petero, a tupai e a amu!’  Na ô atura râ vau: ‘Eita, no te mea aita roa ’tu te hoê mea viivii i ô a‘enei i roto i to ’u vaha.’  Pahono maira te reo mai te ra‘i mai, te piti ïa o te taime: ‘A faaea oe i te parau e mea viivii ta te Atua i tamâ.’ 10  Tatoru maira te reo i te parauraa mai, e faaho‘ihia a‘era te mau mea atoa i nia i te ra‘i. 11  E i taua atoa ra taime, tae maira e toru tane i te fare to reira mâua Simona, mea tonohia mai ratou ia ’u ra mai Kaisarea mai. 12  Parau maira ïa te varua mo‘a ia ’u ia haere na muri ia ratou, eiaha roa vau e feaa. Apee atoa maira râ teie na taeae e ono ia ’u, e tomo atura matou i roto i te fare o taua taata ra. 13  Faatia maira oia ia matou e ua ite oia i te hoê melahi i roto i to ’na fare e tei na ô mai: ‘A tono i te taata i Iopa e tii ia Simona piihia Petero, 14  e na ’na e faaite atu e nafea oe e to oe utuafare taatoa e ora ’i.’ 15  I to ’u râ haamataraa i te paraparau, tae maira te varua mo‘a i nia ia ratou mai i nia atoa ia matou i te taime matamua. 16  Haamana‘o ihora vau i ta te Fatu i parau noa na: ‘I bapetizo na Ioane i te taata i te pape, outou râ, e bapetizohia ïa i te varua mo‘a.’ 17  Ua horoa noa te Atua ia ratou i taua ô ra ta ’na i horoa atoa mai ia matou, o tei tiaturi i te Fatu ra o Iesu Mesia, o vai ïa vau no te tapea i te Atua ia ore oia e na reira?” 18  I to ratou faarooraa i teie mau parau, faaea a‘era ratou i te mârô,* e faahanahana ’tura i te Atua, a na ô ai: “No reira ’tura, ua horoa atoa te Atua i te taata o te mau nunaa ěê i te ravea e tatarahapa e noaa ’i ia ratou te ora.” 19  Teie râ, te mau pǐpǐ tei purara ê no te hamani-ino-raa i tupu i muri a‘e i te haapoheraahia Setephano, haere roa ’tura ïa i Phenikia, Kupero e i Anetiohia, ua poro noa râ ratou i te ati Iuda. 20  Teie râ, no Kupero e no Kurene mai vetahi o ratou i te haereraa mai i Anetiohia e poro atura i te feia paraparau Heleni, a faaite atu ai i te parau apî oaoa no nia i te Fatu ra o Iesu. 21  Tei ia ratou atoa ra te rima o Iehova,* e mea rahi tei tiaturi e tei pee i te Fatu. 22  Tae roa maira taua parau ra i te tari‘a o te amuiraa i Ierusalema, e tono atura ratou ia Baranaba i Anetiohia. 23  I to Baranaba taeraa ’tu e iteraa i te hamani maitai rahi o te Atua, oaoa ihora oia e faaitoito atura ia ratou pauroa ia tapea noa i to ratou taiva ore i te Fatu ma te aau aueue ore. 24  E taata maitai hoi oia, e te faaroo rahi e tei î i te varua mo‘a. E mea rahi te taata tei tiaturi i te Fatu. 25  Haere atura ïa oia i Tareso e imi haere ia Saulo. 26  Ite atura oia ia ’na e aratai maira ia ’na i Anetiohia. Putuputu atura raua e te amuiraa e haapii atura i te taata e rave rahi hoê matahiti taatoa. I Anetiohia na mua te mau pǐpǐ i parauhia ’i e Kerisetiano ia au i te aratairaa a te Atua. 27  I taua mau mahana ra, pou maira te tahi mau peropheta mai Ierusalema mai i Anetiohia. 28  Tia maira hoê o ratou, o Agabo te i‘oa, e tohu ihora maoti te varua mo‘a e e tupu te hoê o‘e rahi i te fenua taatoa. Ua tupu iho â te reira a faatere ai Kalaudio. 29  Faaoti a‘era ïa te mau pǐpǐ, ia au i te maraa ia ratou tataitahi, e hapono i te tauturu na te mau taeae e parahi ra i Iudea. 30  Na reira ’tura ratou, hapono atura i te reira na te mau matahiapo i te rima o Baranaba raua Saulo.

Nota i raro i te api

Aore ra “mârô.”
“Mamû a‘era ratou” na roto i te reo Heleni.
A hi‘o i te titionare.