Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Ohipa 10:1-48

HAAPOTORAA O TE MAU TUMU PARAU

  • Orama a Korenelio (1-8)

  • Ite orama Petero i te mau animara i tamâhia (9-16)

  • Farerei Petero ia Korenelio (17-33)

  • Poro Petero i te parau apî oaoa i to te mau nunaa ěê (34-43)

    • “E ore te Atua e maitiiti i te taata” (34, 35)

  • Fana‘o to te mau nunaa ěê i te varua mo‘a e bapetizohia ’tura (44-48)

10  Teie râ, te vai ra te hoê taata i Kaisarea o Korenelio te i‘oa, e raatira faehau* no te pǔpǔ Italia.*  E taata mǎta‘u oia i te Atua e te haamori ia ’na e to ’na atoa utuafare taatoa. Mea rahi te ô aroha hamani maitai* ta ’na i horoa na te taata e e taparuparu noa oia i te Atua.  Piri i te iva o te hora i te ao,* ite maitai atura oia i roto i te hoê orama i te hoê melahi a te Atua i te tomoraa mai i ǒ ’na e te na ôraa mai: “Korenelio!”  Hi‘o noa ’tura Korenelio ia ’na ma te mehameha e ui atura: “Eaha teie?” Pahono maira te melahi: “Ua tae roa ta oe mau pure i te Atua ra e ua haamana‘o oia i ta oe mau ô aroha hamani maitai.  A tono ïa i teie nei i te taata i Iopa e tii ia Simona piihia Petero.  Te parahi ra tera taata i ǒ Simona, te hoê rapaau iri, tei tatahi to ’na fare.”  I te revaraa iho â te melahi i paraparau ia ’na, pii atura Korenelio e piti o ta ’na mau tavini e te hoê faehau mǎta‘u i te Atua no roto mai i to ’na mau taata,  faatia pauroa ’tura e tono atura ia ratou i Iopa.  I te mahana i muri iho, a haere noa ’i na tootoru taata i to ratou tere e a fatata ’i i te tae i te oire, pauma a‘era Petero i nia i te fare* e pure piri i te ono o te hora.* 10  Teie râ, poia roa ihora oia e hinaaro atura e tamaa. A faaineinehia ’i te maa, ite ihora oia i te hoê orama 11  e ite a‘era i te ra‘i ua matara e te tahi mea e pou mai ra e au i te hoê ahu lino rahi mea tapeahia na poro e maha. 12  E i roto, ua rau ïa te animara avae maha e te animara e nee haere o te fenua e te manu o te reva. 13  Na ô maira te hoê reo ia ’na: “A tia Petero, a tupai e a amu!” 14  Na ô atura râ Petero: “Eita, no te mea aita vau i amu a‘enei i te mea viivii.” 15  Na ô faahou maira te reo, te piti ïa o te taime: “A faaea i te parau e mea viivii ta te Atua i tamâ.” 16  Tatoru maira te reo i te parauraa mai, e i reira iho, ravehia ’tura taua ahu rahi ra i nia i te ra‘i. 17  A feruri noa ’i Petero i te auraa o te orama ta ’na i ite mai nei, ui a‘era na taata i tonohia e Korenelio teihea to Simona fare, e tia noa ’tura ratou i te uputa. 18  Tuô maira ratou e ani maira e to reira anei Simona piihia Petero. 19  Te feruri noa ra Petero i te orama, na ô maira te varua mo‘a: “E toru taata te ani mai ra ia oe. 20  A pou e a haere na muri ia ratou, eiaha roa oe e feaa, no te mea na ’u i tono mai ia ratou.” 21  Pou ihora Petero i taua mau taata ra e na ô atura: “O vau ta outou e imi nei. Eaha to outou tere?” 22  Na ô maira ratou: “Ua faaue te Atua na roto i te hoê melahi mo‘a ia Korenelio, te hoê raatira faehau parau-tia e te mǎta‘u i te Atua e te roo maitai i rotopu i te ati Iuda atoa, ia tii mai ia oe ia haere i to ’na fare, ia faaroo o ’na i ta oe e parau.” 23  Faatomo maira oia ia ratou e parau atura ia faaea mai. E poipoi a‘era, tia a‘era oia e reva ’tura na muri ia ratou, ua apee atoa mai te tahi mau taeae no Iopa ia ’na. 24  I te mahana i muri iho, tomo atura oia i Kaisarea. Te tiai noa mai ra iho â Korenelio ia ratou e ua titau ê na o ’na i to ’na mau fetii e to ’na mau hoa rahi. 25  I to Petero iho â tomoraa ’tu, haere maira Korenelio ia ’na ra, topa turi ihora i to ’na pae avae e tahopu maira ia ’na. 26  Teie râ, faatia maira Petero ia ’na a na ô ai: “A tia, e taata noa hoi au mai ia oe.” 27  A paraparau noa ’i Petero ia ’na, haere atura oia i roto e ite ihora e mea rahi te taata tei putuputu mai. 28  Na ô atura oia: “Ua ite maitai outou e e opanihia te hoê ati Iuda ia amuimui aore ra ia tapiri atu i te hoê taata ê. Ua faaite mai râ te Atua ia ’u e eiaha vau e parau faahou e mea viivii te taata. 29  No reira, farii ihora vau i te haere mai i to oe tiiraa mai ia ’u. Te ui atu nei ïa vau ia oe no te aha oe i tii mai ai ia ’u.” 30  Parau maira ïa Korenelio: “A maha mahana a‘enei i teie iho â hora, te pure ra vau i roto i to ’u fare i te iva o te hora,* tia maira i mua ia ’u te hoê taata e ahu anaana to ’na 31  e na ô maira: ‘Korenelio, ua faaroo te Atua i ta oe pure e ua haamana‘o i ta oe mau ô aroha hamani maitai. 32  A tono ïa i te taata i Iopa e tii ia Simona piihia Petero. Te parahi ra o ’na i ǒ Simona, te hoê rapaau iri, tei tatahi to ’na fare.’ 33  Tono ihora vau i te taata ia oe ra, e mauruuru ia oe i te haereraa mai. I teie nei, to ǒ nei matou pauroa i mua i te aro o te Atua no te faaroo i te mau mea atoa ta Iehova* i faaue ia oe ia parau.” 34  Na ô atura Petero: “I teie nei, taa ’tura ia ’u e e ore te Atua e maitiiti i te taata, 35  i roto râ i te mau nunaa atoa, e farii oia i te taata o te mǎta‘u ia ’na e o te rave i te mea tia. 36  Ua faatae oia i te hoê poroi i te mau tamarii* Iseraela no te faaite atu i te parau apî oaoa o te hau na roto ia Iesu Mesia, oia hoi o ’na te Fatu o te taata atoa. 37  Ua ite outou eaha te parau tei atutu na Iudea taatoa mai Galilea ’tu i muri a‘e i to Ioane pororaa i te bapetizoraa: 38  no nia ïa ia Iesu no Nazareta. Ua faatavai te Atua ia ’na i te varua mo‘a e i te mana, e ua hamani maitai haere Iesu i te taata e ua faaora i te feia atoa i haavîhia e te Diabolo, no te mea tei ia ’na ra te Atua. 39  Ua ite matou i te mau mea atoa ta ’na i rave i te fenua o te ati Iuda e i Ierusalema. Ua haapohe râ ratou ia ’na ma te rî ia ’na i nia i te hoê pou.* 40  Ua faatia mai te Atua ia ’na i te toru o te mahana ia ite te taata ia ’na, 41  eiaha pauroa te taata, te mau ite râ ta te Atua i faatoroa ê na, o matou ïa o tei tamaa e o ’na i muri a‘e i to ’na tiaraa mai te pohe mai. 42  Ua faaue atoa oia ia matou ia poro i te taata e ia faaite papu e o ’na ta te Atua i faatoroa ei haava i te taata ora e te taata pohe. 43  Ua faahiti te mau peropheta atoa ia ’na, oia hoi i to ’na ra i‘oa e faaorehia ’i te hara a te taata atoa e tiaturi ia ’na.” 44  Te paraparau noa ra Petero, tae maira te varua mo‘a i nia i te feia atoa e faaroo ra i te parau a te Atua. 45  Maere ihora te feia tiaturi* peritomehia tei apee mai ia Petero, no te mea ua niniihia mai te ô horoa noa o te varua mo‘a i nia atoa i te taata o te mau nunaa ěê. 46  Te faaroo ra hoi taua feia tiaturi ra ia ratou ia paraparau na roto i te mau reo ěê e ia faahanahana i te Atua. Parau atura ïa Petero: 47  “Ua noaa i teie mau taata te varua mo‘a mai ia matou atoa, e tia anei ïa i te tahi taata ia tapea ia ratou ia ore ia bapetizohia i te pape?” 48  Faaue atura oia ia bapetizohia ratou i te i‘oa o Iesu Mesia e ani maira ratou ia ’na ia faaea mai tau mahana.

Nota i raro i te api

Aore ra “raatira hanere.”
E pǔpǔ 600 faehau no te nuu Roma.
Aore ra “ô no te feia veve.” A hi‘o i te titionare.
I te area hora 3 i te taperaa mahana.
I tera tau, e tahua te niaraa o te rahiraa o te mau fare e mea rahi te ohipa e ravehia i reira.
I te area hora 12 i te avatea
I te area hora 3 i te taperaa mahana.
A hi‘o i te titionare.
“Tamaiti” na roto i te reo Heleni.
Aore ra “raau.”
Aore ra “te mau taeae.”