Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 9:1-38

HAAPOTORAA O TE MAU TUMU PARAU

  • Faaora Iesu i te hoê hapepa (1-8)

  • Pii Iesu ia Mataio (9-13)

  • Uiraa no nia i te haapaeraa maa (14-17)

  • Tamahine a Iaeiro. Tapea te hoê vahine i to Iesu ahu (18-26)

  • Faaora Iesu i te matapo e te vava (27-34)

  • Rahi te auhune, iti râ te rave ohipa (35-38)

9  Haere atura Iesu i nia i te poti, fano atura i te tahi a‘e pae e tae ihora i to ’na oire.  E inaha, afai maira te tahi mau taata ia ’na ra i te hoê hapepa e tarava noa ra i nia i te ro‘i. I to Iesu iteraa i to ratou faaroo, na ô ihora oia i te hapepa: “A faaitoito, ta ’u tamaiti! Ua faaorehia ta oe mau hara.”  Na ô a‘era te tahi mau papai parau te tahi i te tahi: “Te faaino nei teie taata i te Atua.”  Ua ite râ Iesu i to ratou mana‘o e na ô atura: “Eaha outou e mana‘o ino ai i roto i to outou aau?  Eaha hoi te mea ohie a‘e ia parau: ‘Ua faaorehia ta oe mau hara,’ aore ra: ‘A tia i nia, a haere’?  E faaite râ vau ia outou e e mana to te Tamaiti a te taata nei i te fenua e faaore i te hara . . .” Na ô atura oia i te hapepa: “A tia i nia, a rave i to oe ro‘i e a haere i to oe fare.”  Tia a‘era taua taata ra e haere atura i to ’na fare.  I to ratou iteraa i te reira, mǎta‘u ihora te nahoa taata e faahanahana ’tura i te Atua, tei horoa i taua mana ra i te taata.  A haere noa ’i Iesu mai reira mai, ite atura oia i te hoê tane o Mataio te i‘oa, e parahi ra i te fare aufauraa tute, e na ô atura: “A pee mai ia ’u.” Tia a‘era taua taata ra e pee maira ia ’na. 10  I muri a‘e, a tamaa noa ’i Iesu e ta ’na mau pǐpǐ* i ǒ Mataio, inaha e rave rahi titau tute e taata rave hara tei haere mai e tamaa atoa* i pihai iho ia ratou. 11  A ite ai râ te mau Pharisea i te reira, parau atura ratou i ta ’na mau pǐpǐ: “Eaha ta outou orometua e tamaa ’i e te feia titau tute e te feia rave hara?” 12  I to Iesu faarooraa i ta ratou parau, na ô ihora oia: “E ere te taote no te feia oraora maitai, no te feia ma‘i râ. 13  A haere na ïa a haapii i te auraa o teie parau: ‘O te aroha hamani maitai ta ’u e hinaaro eiaha te tusia.’ Ua haere mai hoi au e titau i te feia rave hara ia tatarahapa, eiaha râ te feia parau-tia.” 14  Haere maira te mau pǐpǐ a Ioane ia Iesu ra e ui maira: “E peu matauhia e matou e te mau Pharisea ia haapae i te maa, no te aha ïa ta oe mau pǐpǐ e ore ai e na reira atoa?” 15  Na ô atura Iesu ia ratou: “Aita e tumu e oto ai te mau hoa o te tane faaipoipo a vai noa mai ai oia i rotopu ia ratou, e ere anei? E tae mai râ te mau mahana e hopoi-ê-hia ’i te tane faaipoipo, i reira ïa ratou e haapae ai i te maa. 16  Aita e taata e tafai i te ahu apî i nia i te ahu tahito, e tô hoi te ahu apî i nia i te ahu tahito, a rahi atu ai te mutu. 17  Aita atoa e taata e tuu i te uaina apî i roto i te mau pute uaina* tahito. Ia na reira ratou, e mahae te mau pute uaina, e tahe te uaina, e ino atoa te mau pute uaina. E tuu râ te taata i te uaina apî i roto i te mau pute uaina apî, a ore atu ai e mâu‘a na mea e piti.” 18  A parau noa ’i Iesu i teie mau mea, inaha tapiri maira te hoê tavana e tahopu ihora ia ’na, a na ô ai: “Ua pohe atura paha ïa ta ’u tamahine, a haere mai na râ e tuu i to rima i nia ia ’na, e ora ïa oia.” 19  Tia a‘era Iesu i nia, pee atura ia ’na, e ta ’na atoa mau pǐpǐ. 20  E inaha, haere maira te hoê vahine 12 matahiti to ’na tapahi-noa-raa i muri ia Iesu e tapea maira i to ’na hiti ahu, 21  i parau noa na hoi oia ia ’na iho: “Ia tapea noa ’tu vau i to ’na ahu, e ora ïa to ’u ma‘i.” 22  Fariu a‘era Iesu i muri e ite atura ia ’na, e parau ihora: “A faaitoito, ta ’u tamahine! No to faaroo i ora ’i oe.” Ora ihora te ma‘i o taua vahine ra. 23  I to Iesu tomoraa ’tu i roto i te fare o te tavana e iteraa i te feia faata‘i vivo e te nahoa taata e auê ra, 24  parau atura oia: “A haere i rapaeau, aita hoi te potii i pohe, te taoto ra râ.” Ata faaooo a‘era ratou ia ’na. 25  I to te nahoa taata haereraa ’tu i rapaeau, tomo ihora Iesu i roto i te vahi to reira te potii, tapea ’tura i to ’na rima, e tia maira te tamahine. 26  Atutu atura teie parau e ati a‘e taua tuhaa fenua ra. 27  Te haere mai ra Iesu mai reira mai a pee mai ai e piti matapo ia ’na a pii noa ’i: “Aroha* mai ia mâua, Tamaiti a Davida.” 28  A tomo atu ai Iesu i roto i te tahi fare, tapiri maira na matapo ia ’na. Ui atura Iesu ia raua: “Tiaturi anei orua e e araara to orua mata ia ’u?” Pahono maira raua: “E, e te Fatu.” 29  Tapea ’tura oia i to raua mata a parau ai: “Mai ta orua i tiaturi, ia tupu ïa.” 30  Araara a‘era to raua mata. Faaara maitai atura Iesu ia raua a na ô ai: “Eiaha roa e faaite atu i te taata.” 31  I to raua râ haereraa ’tu i rapaeau i te fare, faatia a‘era raua i ta Iesu i rave e ati a‘e taua tuhaa fenua ra. 32  Te haere atu ra hoi raua, inaha arataihia maira ia Iesu ra te hoê vava tei uruhia e te demoni, 33  e i to Iesu tiavaruraa i te demoni, paraparau ihora te vava. Maere roa a‘era te nahoa taata e na ô atura: “Aita teie huru ohipa i tupu a‘enei i Iseraela.” 34  Parau a‘era râ te mau Pharisea: “I te mana hoi o te raatira o te mau demoni e tiavaru ai oia i te mau demoni.” 35  Haere atura Iesu na roto i te mau oire rahi e oire rii, i te haapiiraa i roto i te mau sunago, te pororaa i te parau apî oaoa o te Faatereraa arii* e te faaoraraa i te mau huru ma‘i atoa. 36  I to ’na iteraa i te nahoa taata, aroha ’tura oia ia ratou, no te mea ua rave-ino-hia ratou e te tâu‘a-ore-hia mai te mau mamoe aore e tiai. 37  Na ô atura oia i ta ’na mau pǐpǐ: “Te rahi mau nei te auhune, mea iti râ te rave ohipa. 38  A taparu ïa i te Fatu o te auhune ia tono mai i te rave ohipa no te ootiraa.”

Nota i raro i te api

Aore ra “a tarava noa ’i Iesu e ta ’na mau pǐpǐ i te amuraa maa.”
Aore ra “e tarava atoa i te amuraa maa.”
Pute uaina iri animara.
Aore ra “Aroha hamani maitai.”
Aore ra “Basileia.”