Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 8:1-34

HAAPOTORAA O TE MAU TUMU PARAU

  • Faaorahia te hoê lepera (1-4)

  • Faaroo o te hoê raatira faehau (5-13)

  • Faaora Iesu e rave rahi taata ma‘i i Kaperenaumi (14-17)

  • Nafea ia pee ia Iesu? (18-22)

  • Pohe te vero ia Iesu (23-27)

  • Tuu Iesu i te mau demoni i roto i te puaa (28-34)

8  I muri a‘e i to Iesu pouraa mai nia mai i te mou‘a, e nahoa rahi tei pee mai ia ’na.  E inaha, haere maira te hoê lepera e tahopu maira ia ’na, a na ô ai: “E te Fatu, ia tia ia oe, e nehenehe oe e tamâ ia ’u.”  Toro ihora ïa Iesu i to ’na rima e tapea ’tura ia ’na a parau atu ai: “E tia ia ’u. Ia mâ oe.” Ora ihora to ’na lepera.  Parau atura Iesu ia ’na: “Haapao maitai, eiaha oe e faaite i te taata, a haere râ e faaite ia oe i te tahu‘a, a pûpû atu ai i te ô i faauehia mai e Mose, ia ite ratou e ua ora to oe ma‘i.”  I to ’na tomoraa ’tu i Kaperenaumi, haere maira te hoê raatira faehau ia ’na ma te taparuparu  a na ô ai: “E te Fatu, te tarava noa ra ta ’u tavini i te fare e hapepa oia e te pohe roa ra oia i te mauiui.”  Parau atura oia: “Ia tae atu vau i te fare, e faaora vau i to ’na ma‘i.”  Pahono maira te raatira faehau: “Eita e tano ia ’u ia farii ia oe i to ’u fare. A parau noa râ i te tahi parau, e ora ïa te ma‘i o ta ’u tavini.  E taata hoi te faatere mai ia ’u, e faehau atoa ta ’u o te auraro mai ia ’u, e ia parau vau i teie faehau: ‘A haere!’ e haere oia, i te tahi atu: ‘A haere mai!’ e haere mai oia, e i ta ’u tavini: ‘A na ô!’ e na ô oia.” 10  I to Iesu faarooraa i taua parau ra, maere ihora oia e na ô atura i tei pee mai ia ’na: “Oia mau ta ’u e parau atu: Aita vau i ite a‘enei i te faaroo rahi mai teie i Iseraela. 11  Te parau atu nei râ vau e e rave rahi no hitia o te râ e no tooa o te râ o te haere mai, a tarava ’tu ai i te amuraa maa e o Aberahama, Isaaka e Iakoba i roto i te Faatereraa arii* o te ra‘i. 12  Area te mau tamarii* a te Faatereraa arii, e hurihia ïa i roto i te poiri i rapae. I reira ratou e ta‘i ai e to ratou niho e ma‘u‘u ai i te ahoaho.” 13  Na ô atura Iesu i te raatira faehau: “A haere. Mai ta oe i tiaturi, ia tupu ïa.” I reira iho, ora ’tura te ma‘i o te tavini. 14  E i to Iesu tomoraa i roto i te fare o Petero, ite atura oia i te metua vahine hoovai o Petero e tarava noa ra, e fiva to ’na. 15  Tapea ihora Iesu i to ’na rima, e pee atura te fiva. Tia a‘era te vahine i nia e faaineine ihora i te maa na ratou. 16  E ahiahi ihora, aratai maira te taata ia Iesu ra e rave rahi tei uruhia e te demoni, tiavaru ihora oia i taua mau varua ra i te hoê noa reo, e faaora ’tura i te feia ma‘i atoa, 17  ia tupu hoi ta te peropheta Isaia i parau: “Ua rave oia iho i to tatou mau ma‘i e ua hopoi ê i to tatou mau mauiui.” 18  I to Iesu iteraa e e nahoa taata te haaati ra ia ’na, faaue a‘era oia i ta ’na mau pǐpǐ ia fano i tera ’tu pae. 19  Haere maira te tahi papai parau e na ô maira: “Orometua, e pee au ia oe i te mau vahi atoa ta oe e haere.” 20  Parau atura râ Iesu: “E apoo to te urî oviri* e e ofaaraa to te manu o te reva. Te Tamaiti râ a te taata nei, aita ïa to ’na e vahi taotoraa.” 21  Na ô maira te tahi pǐpǐ: “E te Fatu, a tuu na oe ia ’u ia haere na mua e huna i to ’u metua tane.” 22  Parau atura Iesu: “A pee noa mai ia ’u, e a vaiiho na tei pohe e huna i tei pohe.” 23  Haere atura oia i nia i te poti e ta ’na mau pǐpǐ i muri iho. 24  E inaha, e mata‘i rahi tei farara mai i nia i te miti, î a‘era te poti i te miti. Area Iesu, te taoto noa ra ïa. 25  Tapiri maira te mau pǐpǐ e faaara ia ’na, a na ô atu ai: “E te Fatu, a faaora ia tatou, a pohe tatou!” 26  Parau atura râ oia: “Eaha outou e mǎta‘u* roa ’i, feia mea iti te faaroo?” Tia a‘era oia e tama‘i ihora i te mata‘i e te miti, mania roa ’tura. 27  Maere ihora ratou e na ô a‘era: “O vai hoi teie taata? E faaroo atoa te mata‘i e te miti ia ’na.” 28  I to Iesu taeraa i tera ’tu pae o te roto i te tuhaa fenua o Gadara, haere maira e piti tane tei uruhia e te demoni na roto mai i te vahi hunaraa. No to raua taehae, aita e taata e tae ia haere na taua e‘a ra. 29  E inaha, tuô a‘era raua: “Eaha ta oe ohipa i ǒ nei, Tamaiti a te Atua? Haere mai oe e haamauiui ia mâua hou te tau faataahia?” 30  E nǎnǎ puaa te amu ra i te maa i te atea ê. 31  Taparu a‘era te mau demoni ia ’na: “Ia tiavaru oe ia matou, a tuu ia matou i roto i te nǎnǎ puaa.” 32  Parau atura ïa oia: “Haere!” Haere maira ratou i rapae e tomo a‘era i roto i te puaa, e inaha horo ihora te nǎnǎ taatoa e topa ’tura i roto i te miti na nia mai i te pari,* e pohe roa a‘era. 33  Horo atura râ te mau tiai puaa i te oire, e faatia pauroa ’tura i te ohipa i tupu, oia atoa no na tane tei uruhia e te demoni. 34  E inaha, haere maira to te oire atoa e farerei ia Iesu, e i to ratou iteraa ia ’na, parau onoono maira ia ’na ia faarue mai i to ratou fenua.

Nota i raro i te api

Aore ra “Basileia.”
“Tamaiti” na roto i te reo Heleni.
Aore ra “alope.”
Aore ra “taiâ.”
Aore ra “mato tarere.”