Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 7:1-29

HAAPOTORAA O TE MAU TUMU PARAU

  • A‘ORAA I NIA I TE MOU‘A (1-27)

    • Faaea i te haava (1-6)

    • Tamau i te ani, te imi, te patoto (7-11)

    • Ture auro (12)

    • Uputa pirihao (13, 14)

    • I ta ratou mau hotu e itehia ’i o vai ratou (15-23)

    • Fare i nia i te pǎpǎ, fare i nia i te one (24-27)

  • Maere te nahoa i ta Iesu haapiiraa (28, 29)

7  A faaea i te haava ia ore outou ia haavahia,  e haavahia hoi outou mai ta outou i haava ia vetahi ê, e tei te huru o ta outou faitoraa e faitohia ’i ta outou.  Eaha ïa oe e hi‘o ai i te raau hu‘a roa i roto i te mata o to taeae, aita râ oe e tâu‘a ra i te pou i roto i to oe iho mata?  E nafea e tia ’i ia oe ia parau i to taeae: ‘Vaiiho na ia ’u ia iriti i te raau hu‘a roa i roto i to oe mata,’ e inaha e pou to roto i to oe iho mata?  Haavarevare! A iriti na mua i te pou i roto i to oe iho mata, e ite maitai ïa oe ia iriti i te raau hu‘a roa i roto i te mata o to taeae.  Eiaha e horoa i te mea mo‘a na te urî, eiaha atoa e hue i ta outou mau poe na te puaa ia ore ratou e taataahi i te reira e ia ore outou e pepe maitai ia ratou.  A tamau i te ani, e horoahia mai. A tamau i te imi, e itehia mai. A tamau i te patoto, e iritihia mai.  Te taata hoi e ani, e noaa ïa ta ’na. Te taata hoi e imi, e itehia ïa ia ’na. Te taata e patoto, e iritihia mai ïa.  O vai hoi o outou, ia ani mai ta ’na tamaiti i te faraoa,* e horoa ’tu ïa i te ofai? 10  E ia ani mai oia i te i‘a, e horoa ’tu ïa oia i te ophi? 11  No reira, noa ’tu e e taata ino outou, ua ite outou i te horoa i te mau mea maitatai na ta outou mau tamarii, hau atu â ïa to outou Metua i te ra‘i i te horoa i te mau mea maitatai na te feia e ani atu ia ’na! 12  Te mau mea atoa ïa ta outou e hinaaro ia rave te taata no outou, a rave atoa ïa no ratou. O ta te ture ïa a Mose e ta te mau papai a te mau peropheta e haapii mai ra. 13  A tomo na te uputa pirihao, mea ateatea hoi te uputa e mea aano te e‘a e tae atu ai i te haamouraa, e mea rahi o te na reira i te haere. 14  Mea pirihao râ te uputa e mea ôaôa te e‘a e tae atu ai i te ora, e aita i rahi te taata o te ite atu i taua e‘a ra. 15  A ara i te mau peropheta haavare o te haere mai ia outou mai te mamoe ra te huru, area o roto ra, e luko taehae ïa. 16  I ta ratou mau hotu e ite maitai ai outou ia ratou. E pofaihia anei te vine aore ra te suke i nia i te raau taratara? 17  Oia atoa, e faahotu mai te tumu raau maitai i te maa maitai, area te tumu raau ino i te maa ino. 18  E ore roa te hoê tumu raau maitai e faahotu mai i te maa ino, e ore atoa te hoê tumu raau ino e faahotu mai i te maa maitai. 19  Te tumu raau o te ore e horoa mai i te maa maitai, e tâpûhia ïa a hurihia ’tu ai i roto i te auahi. 20  I ta ratou ïa mau hotu e ite maitai ai outou i taua mau taata ra. 21  E ere o te feia atoa e parau mai: ‘E te Fatu, e te Fatu,’ te ô i roto i te Faatereraa arii* o te ra‘i, o te taata ana‘e râ o te rave i te hinaaro o to ’u Metua i te ra‘i. 22  E rave rahi te parau mai ia ’u ia tae i tera mahana: ‘E te Fatu, e te Fatu, aita anei matou i tohu ma to oe i‘oa, i tiavaru i te demoni ma to oe i‘oa e i faatupu i te mau ohipa mana ma to oe i‘oa?’ 23  Teie ïa ta ’u e parau atu ia ratou: ‘Aore roa vau i ite ia outou! Haere ê atu, outou e ofati nei i te ture!’ 24  No reira, o te faaroo i ta ’u i parau mai nei e o te haapao atu, e au ïa oia i te hoê taata paari tei faatia i to ’na fare i nia i te pǎpǎ. 25  Mairi ihora te ûa, tahe maira te pape pue, farara a‘era te mata‘i i nia i taua fare ra, aita râ i parari no te mea ua haamauhia i nia i te pǎpǎ. 26  Area o te ore e faaroo i ta ’u i parau mai nei e o te ore e haapao atu, e au ïa oia i te taata maamaa tei faatia i to ’na fare i nia i te one. 27  Mairi ihora te ûa, tahe maira te pape pue, farara a‘era te mata‘i i nia i taua fare ra. Marua ihora te fare e parari roa ’tura.” 28  O te parau hopea ïa teie a Iesu e ua maere te nahoa i ta ’na huru haapiiraa, 29  te haapii ra hoi oia ia ratou eiaha mai ta ratou mau papai parau, mai te hoê râ taata e mana to ’na no ǒ mai i te Atua ra.

Nota i raro i te api

Aore ra “pane.”
Aore ra “Basileia.”