Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 6:1-34

HAAPOTORAA O TE MAU TUMU PARAU

  • A‘ORAA I NIA I TE MOUA (1-34)

    • Eiaha e rave i te parau-tia no te faaiteite (1-4)

    • Nafea ia pure? (5-15)

      • Hoho‘a pure (9-13)

    • Haapaeraa maa (16-18)

    • Tao‘a i te fenua e i te ra‘i (19-24)

    • Faaea i te haapeapea (25-34)

      • Tamau i te imi na mua i te Faatereraa arii (33)

6  A ara o te rave outou i te parau-tia i mua i te taata ia itehia mai outou. Ia na reira outou, e ore to outou Metua i te ra‘i e haamaitai ia outou.  No reira, ia horoa oe i te ô aroha hamani maitai,* eiaha e faaoto na mua i te pu mai ta te feia haavarevare e rave nei i roto i te mau sunago e na te mau aroâ ia aruehia ratou e te taata. Oia mau ta ’u e parau atu: Ta ratou noa e noaa mai, te arueraahia ratou e te taata.  O oe râ, ia horoa oe i te ô aroha hamani maitai, eiaha to oe rima aui ia ite i ta to oe rima atau e rave ra,  a ore atu ai te taata e ite i ta oe ô aroha hamani maitai. E na to Metua o te ite i te mau mea atoa e haamaitai ia oe.  Ia pure atoa outou, eiaha mai ta te feia haavarevare. Mea au hoi na ratou e pure tia noa i roto i te mau sunago e i te mau maaraa purumu ia itehia mai ratou. Oia mau ta ’u e parau atu: Ta ratou noa e noaa mai, te arueraahia ratou e te taata.  Ia pure râ oe, a tomo i roto i to oe piha, a tapiri i te opani e a pure i to Metua i te ra‘i. E na to Metua o te ite i te mau mea atoa e haamaitai ia oe.  Ia pure oe, eiaha e tahana i te parau mai ta te feia o te mau nunaa ěê. Te mana‘o ra hoi ratou e no te rahi o te parau e faaroo ai te Atua ia ratou.  Eiaha ïa outou e rave i ta ratou peu, ua ite hoi to outou Metua i ta outou e hinaaro mau hou outou a ani atu ai ia ’na.  E na ô outou ia pure: ‘To matou Metua i te ra‘i, ia mo‘a* to oe i‘oa. 10  Ia tae mai ta oe Faatereraa arii.* Ia tupu to oe hinaaro i te fenua nei, mai i te ra‘i atoa na. 11  Horoa mai na i ta matou maa no teie mahana, 12  e faaore mai na i ta matou mau tarahu,* mai ia matou atoa i faaore i ta vetahi ê. 13  E tauturu mai na ia matou ia ore ia hema, faaora mai na râ ia matou i te varua ino.’* 14  Ia faaore hoi outou i ta te taata ra hapa, e faaore atoa mai ïa to outou Metua i ta outou. 15  Ia ore râ outou e faaore i ta te taata ra hapa, e ore atoa ïa to outou Metua e faaore i ta outou. 16  Ia haapae outou i te maa, eiaha ei mata oto to outou mai to te feia haavarevare, o te faaea repo noa* ia ite te taata e te haapae ra ratou i te maa. Oia mau ta ’u e parau atu: Ta ratou noa e noaa mai, te arueraahia ratou e te taata. 17  O oe râ, ia haapae oe i te maa, a parai i to oe upoo i te mono‘i e a horoi i to oe mata, 18  ia itehia mai ta oe haapaeraa maa e to oe Metua, eiaha râ e te taata. E na to Metua o te ite i te mau mea atoa e haamaitai ia oe. 19  A faaea i te haapue i te tao‘a na outou i te fenua nei, e pau hoi te reira i te manumanu,* e pê i te tutae auri e e haruhia e te eiâ. 20  A haapue râ i te tao‘a na outou i te ra‘i, e ore hoi te reira e pau i te manumanu, e pê i te tutae auri e e haruhia e te eiâ. 21  Te vahi hoi to reira ta oe tao‘a, to reira atoa to oe aau. 22  Te mori o te tino, o te mata ïa. Ia hi‘o to oe mata i te hoê noa mea,* e maramarama* ïa to oe tino taatoa. 23  Ia nounou* râ to oe mata, e poiri ïa to oe tino taatoa. Mai te peu e e ere te maramarama to roto ia oe, o te poiri râ, auê ïa te rahi o te poiri e! 24  E ore e tia i te hoê taata ia tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. E ore e tia ia outou ia tavini i te Atua e te moni. 25  No reira vau e parau atu ai: A faaea i te haapeapea no to outou ora* eaha ta outou e amu aore ra eaha ta outou e inu, aore ra no to outou tino eaha ta outou e oomo. E ere anei mea faufaa a‘e te ora* i te maa e te ahu? 26  A hi‘o maitai na i te mau manu o te reva. Eita ratou e ueue i te huero, e ooti e e haaputu i te maa. Teie râ, te faaamu ra to outou Metua i te ra‘i ia ratou. E ere anei mea faufaa a‘e outou ia ratou? 27  O vai o outou e tia ia ’na ia faaroa ’tu â i to ’na ora hoê noa ’‘e kubiti* ia haapeapea oia? 28  Eaha outou e haapeapea atoa ’i no te ahu? A hi‘o maitai na i te mau tiare, e nafea ratou e tupu ai. Eita ratou e rave i te ohipa, eita atoa e hamani i te ahu. 29  Te parau atu nei râ vau e aita te ahu o te arii Solomona, noa ’tu to ’na unauna rahi, i hau a‘e i te nehenehe i to te hoê o teie mau tiare. 30  Te faaahu nei te Atua i teie mau tiare, o te tupu nei i teie mahana, a hurihia ’tu ai ananahi i roto i te auahi. E hau atu â ïa oia i te faaahu ia outou te feia mea iti te faaroo! 31  Eiaha ïa outou e haapeapea, a na ô ai: ‘Eaha ta matou e amu, e inu aore ra e oomo?’ 32  O teie mau mea hoi ta te mau nunaa e titau rahi nei. Ua ite to outou Metua i te ra‘i e e hinaaro iho â outou i teie mau mea. 33  No reira, a tamau i te imi na mua i te Faatereraa arii a te Atua e ta ’na parau-tia, e e horoahia mai teie mau mea atoa na outou. 34  Eiaha roa ïa e haapeapea no ananahi, no te mea e haapeapearaa ê to ananahi. Tera mahana to ’na fifi.

Nota i raro i te api

Aore ra “ô no te feia veve.” A hi‘o i te titionare.
Aore ra “haamo‘ahia.”
Aore ra “to oe Basileia.”
Aore ra “hara.”
Aore ra “ia Satani.”
Aore ra “o te ore e faanehenehe ia ratou.”
Oia hoi te manumanu rere o te amu i te ahu.
Aore ra “Ia maramarama to oe mata.” “Ia maitai to oe mata” na roto i te reo Heleni.
Aore ra “maramarama roa.”
“Ia ino” na roto i te reo Heleni.
Heleni pusuke. A hi‘o i te titionare.
Heleni pusuke. A hi‘o i te titionare.
A hi‘o i te titionare.