Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 5:1-48

HAAPOTORAA O TE MAU TUMU PARAU

  • A‘ORAA I NIA I TE MOU‘A (1-48)

    • Haamata Iesu i te haapii i te taata i nia i te mou‘a (1, 2)

    • E iva tumu e oaoa ’i (3-12)

    • Te miti e te maramarama (13-16)

    • Faatupu Iesu i te ture a Mose (17-20)

    • A‘oraa no nia i te riri (21-26), te faaturi (27-30), te faataaraa (31, 32), te tǎpǔ (33-37), te tahoo (38-42), te hereraa i te enemi (43-48)

5  I to Iesu iteraa i te nahoa taata, pauma a‘era oia i nia i te mou‘a. Parahi ihora oia i raro e haere maira ta ’na mau pǐpǐ ia ’na ra.  Haamata ’tura oia i te haapii ia ratou a na ô ai:  “E oaoa te feia e hiaai ra* i te mau mea pae varua, no ratou hoi te Faatereraa arii* o te ra‘i.  E oaoa te feia e oto nei, no te mea e tamahanahanahia ratou.  E oaoa te feia mǎrû,* e fatu hoi ratou i te fenua.  E oaoa te feia e poia e poihâ ra i te parau-tia, e mâha hoi to ratou poia e poihâ.  E oaoa te feia aroha hamani maitai, e aroha-hamani-maitai-hia hoi ratou.  E oaoa te feia aau tia, e ite hoi ratou i te Atua.  E oaoa te feia faatupu i te hau,* e parauhia hoi ratou e tamarii* na te Atua. 10  E oaoa te feia tei hamani-ino-hia no te parau-tia, no ratou hoi te Faatereraa arii o te ra‘i. 11  E oaoa outou ia faahapa, ia hamani ino e ia pari haavare te taata ia outou i te mau mea ino atoa no ’u nei. 12  A oaoa e ia oaoa roa outou, e haamaitairaa rahi hoi ta outou i te ra‘i, mea na reira hoi te mau peropheta na mua ’tu ia outou i te hamani-ino-raahia. 13  O outou te miti o te fenua, ia maaro râ te miti, e nafea ïa e avaava faahou ai? Ua riro atura ïa ei mea faufaa ore, a faaruehia ’tu ai ia taataahihia e te taata. 14  O outou te maramarama o teie nei ao. Te oire i nia i te mou‘a, e ite-maitai-hia ïa. 15  Ia tutui te taata i te mori, no te tuu atu ïa eiaha i raro a‘e i te hoê farii,* i nia râ i to ’na vairaa e maramarama ’i to te fare atoa. 16  Ia anaana atoa ïa to outou maramarama i mua i te taata, ia ite hoi ratou i ta outou mau ohipa maitatai, a faahanahana ’tu ai i to outou Metua i te ra‘i. 17  Eiaha outou e mana‘o e ua haere mai au e faaore i te ture a Mose e te mau papai a te mau peropheta. Aita vau i haere mai no te faaore, ia tupu mau râ te reira. 18  Oia mau ta ’u e parau atu: E mou te ra‘i e te fenua, e ore râ te hoê reta hu‘a roa ’‘e o te ture a Mose aore ra te hoê tapao reta e mou e ia hope roa te mau mea atoa i papaihia i te tupu. 19  No reira, te taata o te ore e auraro i te hoê parau iti haihai roa o teie mau faaueraa e o te haapii ia vetahi ê ia na reira atoa, e ore ïa e tia ia ’na ia ô i roto i te Faatereraa arii o te ra‘i. Area o te haapao i te reira e o te haapii i te taata ia na reira atoa, e ô ïa i roto i te Faatereraa arii o te ra‘i. 20  Te parau atu nei hoi au e ia ore to outou haerea parau-tia ia hau a‘e i to te mau papai parau e to te mau Pharisea, e ore roa ïa outou e ô i roto i te Faatereraa arii o te ra‘i. 21  Ua ite outou e i parauhia na i tahito ra: ‘Eiaha roa oe e taparahi pohe i te taata, o tei taparahi pohe râ i te taata, e haavahia ïa.’ 22  Te parau atu nei râ vau e te taata atoa o te riri tamau i to ’na taeae, e haavahia ïa. E o tei vahavaha i to ’na taeae ma te parau ino, e haavahia ïa i te Tiripuna teitei. Area o tei parau e ‘Maamaa,’ e roohia ïa i te auahi o Gehena.* 23  No reira, ia hopoi oe i ta oe ô i te fata e haamana‘o ihora oe e ua inoino to taeae ia oe, 24  a vaiiho i ta oe ô i mua i te fata e a haere e farerei i to taeae. Ia hau orua na mua e ho‘i mai ai oe e pûpû i ta oe ô. 25  Ia ru oe i te faaafaro i to oe fifi e tei horo ia oe i te haavaraa a haere ai orua i te tiripuna, ia ore hoi oia e tuu ia oe i te haava, e te haava i te uitie, a hurihia ’tu ai oe i roto i te tapearaa. 26  Oia mau ta ’u e parau atu: E ore oe e matara mai ia ore ia pee ta oe tarahu e tae noa ’tu i te koderane* hopea. 27  Ua ite outou e i parauhia na: ‘Eiaha roa oe e faaturi.’ 28  Te parau atu nei râ vau e te taata atoa o te hi‘o noa i te hoê vahine a hinaaro atu ai ia ’na, ua faaturi ïa ia ’na i roto i to ’na aau. 29  No reira, te hapa ra oe no to oe mata atau, a paaro i to oe mata atau e a faarue atu. Mea maitai a‘e ia ere oe i te hoê mero o to oe tino i te hurihia to oe tino taatoa i Gehena.* 30  Ia hapa atoa oe no to oe rima atau, a tâpû ê i te reira e a faarue atu. Mea maitai a‘e ia ere oe i te hoê mero o to oe tino i te hurihia to oe tino taatoa i Gehena.* 31  I parau-atoa-hia na: ‘Te tane o te faataa i ta ’na vahine faaipoipo, ia horoa ïa ia ’na ra i te tahi parau faataaraa.’ 32  Te parau atu nei râ vau e te tane o te faataa i ta ’na vahine faaipoipo tei ore i rave i te peu taotoraa tia ore,* e riro ïa ta ’na vahine i te faaturi ia faaipoipo faahou oia, e te tane o te faaipoipo i te hoê vahine ua taa raua ta ’na tane faaipoipo mai teie te huru, ua faaturi atoa ïa. 33  Ua ite atoa outou e i parauhia na i tahito ra: ‘Eiaha roa oe e tǎpǔ faufaa ore noa, ia rave râ oe i ta oe i euhe ia Iehova.’* 34  Te parau atu nei râ vau: Eiaha roa ’tu e tǎpǔ i te ra‘i, o te terono hoi o te Atua. 35  Eiaha atoa i te fenua, o to ’na hoi taahiraa avae, eiaha atoa ia Ierusalema, o te oire hoi o te Arii rahi. 36  Eiaha e tǎpǔ i to upoo, e ore hoi e uouo aore ra e ereere te hoê noa ’‘e rouru ia oe. 37  Ia riro râ ta outou ‘E’ ei e, ta outou ‘Eita’ ei eita. Te mea ê atu i te reira, no ǒ mai ïa i te varua ino.* 38  Ua ite outou e i parauhia na: ‘E mata, ei mata ïa. E niho, ei niho ïa.’ 39  Te parau atu nei râ vau: Eiaha e aro i te taata ino. I tei poara mai râ i to papari‘a atau, a fariu atoa ’tu i te tahi atu papari‘a. 40  E ia hinaaro te hoê taata e horo ia oe i te haavaraa, a rave atu ai hoê o to oe na ahu, a horoa atoa ’tu i te tahi atu ahu, 41  e ia ani mai te hoê taata ia amo i te tahi mea teiaha hoê kilometera i te atea, a haere ïa na muri ia ’na e piti kilometera. 42  A horoa i tei anihia mai ia oe e eiaha e pipiri i tei hinaaro e tarahu ia oe i te moni.* 43  Ua ite outou e i parauhia na: ‘Ia here oe i to oe taata tupu e ia hae oe i to oe enemi.’ 44  Tera râ, te parau atu nei au: A here noa i to outou mau enemi e a pure noa no tei hamani ino ia outou, 45  a riro atu ai outou ei tamarii* na to outou Metua i te ra‘i, e faahiti hoi oia i to ’na mahana i nia i te feia ino e te feia maitai atoa e e haamairi oia i te ûa i nia i te feia parau-tia e te feia parau-tia ore atoa. 46  Mai te peu e o te feia ana‘e e here mai ia outou ta outou e here atu, eaha ïa te apî? Te na reira atoa nei te feia titau tute, e ere anei? 47  E ia aroha* outou i to outou noa mau taeae, eaha ïa te mea faahiahia? Te na reira atoa nei te feia o te mau nunaa ěê, e ere anei? 48  Ia tia roa hoi outou mai to outou Metua tia roa i te ra‘i.

Nota i raro i te api

Aore ra “e taparu ra.”
Aore ra “Basileia.”
Aore ra “haehaa.”
Aore ra “te feia faaea hau noa.”
“Tamaiti” na roto i te reo Heleni.
Aore ra “farii faito maa.”
Te vahi taninaraa pehu i rapaeau ia Ierusalema. A hi‘o i te titionare.
Oia hoi te moni no piri i te 10 minuti ohipa.
A hi‘o i te titionare.
A hi‘o i te titionare.
A hi‘o i te titionare.
A hi‘o i te titionare.
Aore ra “ia Satani.”
Oia hoi e tarahu ma te ore e titau i te moni taime.
“Tamaiti” na roto i te reo Heleni.
Aore ra “farii popou.”