Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Mataio 4:1-25

HAAPOTORAA O TE MAU TUMU PARAU

  • Faahema te Diabolo ia Iesu (1-11)

  • Haamata Iesu i te poro i Galilea (12-17)

  • Piihia te mau pǐpǐ matamua (18-22)

  • Poro, haapii, e faaora Iesu i te ma‘i (23-25)

4  Arataihia ’tura Iesu e te varua mo‘a i te medebara e faahema ihora te Diabolo ia ’na.  I muri a‘e i to Iesu haapaeraa i te maa e 40 rui e 40 ao, poia ihora oia.  Haere maira te Diabolo e faahema ia ’na a na ô ai: “E tamaiti oe na te Atua, a parau i teie mau ofai ia riro ei faraoa.”*  Pahono atura râ Iesu: “Ua papaihia: ‘E ore te taata e ora i te maa ana‘e, i te mau parau atoa râ no ǒ mai ia Iehova* ra.’”  Afai atura te Diabolo ia Iesu i te oire mo‘a e tuu ihora ia ’na i te vahi teitei roa o te hiero  e na ô atura: “E tamaiti oe na te Atua, a ou‘a i raro. Ua papaihia hoi: ‘E faaue oia i ta ’na mau melahi e paruru ia oe,’ e ‘Na to ratou rima e mau ia oe ia ore to oe avae e tano i nia i te ofai.’”  Pahono atura Iesu: “Ua papai-atoa-hia: ‘Eiaha oe e ‘a‘a ia Iehova* to oe Atua.’”  Afai faahou a‘era te Diabolo ia Iesu i nia i te hoê mou‘a teitei roa, faaite maira ia ’na i te mau faatereraa arii atoa o te ao nei e to ratou hanahana,  e na ô maira: “Teie mau mea atoa e horoa vau na oe ia tipapa mai oe i raro a haamori mai ai ia ’u.”* 10  Pahono atura Iesu: “A haere ê atu e Satani. Ua papaihia hoi: ‘O Iehova* to oe Atua ta oe e haamori, e ia ’na ana‘e e pûpû ai oe i te hoê taviniraa mo‘a.’” 11  Vaiiho atura te Diabolo ia ’na. Inaha, haere maira te mau melahi e aupuru ia Iesu. 12  I to ’na faarooraa e ua tapeahia Ioane, reva ’tura oia i Galilea. 13  Faarue ihora oia ia Nazareta e haere atura e parahi i Kaperenaumi tei te pae miti i te fenua o Zebuluna e to Naphatali, 14  ia tupu hoi tei parauhia na roto ia Isaia te peropheta, tei na ô: 15  “E te fenua o Zebuluna e te fenua o Naphatali, na te e‘a e tae atu i te miti ra, i teie pae mai o Ioridana, e Galilea o te mau nunaa ěê! 16  Ua ite te feia e parahi ra i roto i te poiri i te maramarama rahi e ua anaana mai te maramarama i nia i tei parahi ra i te fenua o te maru pohe.” 17  I reira to Iesu haamataraa i te poro: “A tatarahapa, ua fatata mai hoi te Faatereraa arii* o te ra‘i.” 18  Te haere ra oia na te pae miti o Galilea, ite atura oia e toopiti taeae, o Simona pii-atoa-hia Petero e to ’na taeae o Anederea, te taora ra i te upe‘a, e ravaai hoi raua. 19  Na ô atura oia ia raua: “A pee mai ia ’u, e faariro vau ia orua ei ravaai taata.” 20  I reira iho, vaiiho a‘era raua i ta raua upe‘a, e pee maira ia ’na. 21  Haere atura Iesu, e ite ihora oia e toopiti atu â, e taeae raua, o Iakobo e to ’na taeae o Ioane na tamaiti a Zebedaio. Tei roto raua i te poti e to raua metua tane, te tafai ra i te upe‘a. Pii ihora oia ia raua. 22  I reira iho, vaiiho a‘era raua i te poti e to raua metua tane, e pee maira ia Iesu. 23  Haere atura oia e ati a‘e Galilea i te haapiiraa i roto i te mau sunago, te pororaa i te parau apî oaoa* o te Faatereraa arii e te faaoraraa i te mau huru ma‘i atoa o te taata. 24  Faaroo a‘era to Suria atoa i ta ’na i rave, arataihia maira ia ’na te feia ua rau to ratou ma‘i, tei uruhia e te demoni, te hopii e te hapepa. Faaora ihora oia i to ratou ma‘i. 25  E nahoa rahi tei pee mai ia ’na mai Galilea, Dekapoli,* Ierusalema, Iudea e no tera ’tu pae mai o Ioridana.

Nota i raro i te api

Aore ra “pane.”
A hi‘o i te titionare.
A hi‘o i te titionare.
Aore ra “a haamori mai ai ia ’u hoê noa taime.”
A hi‘o i te titionare.
Aore ra “Basileia.”
Aore ra “evanelia.”
Aore ra “na oire hoê ahuru.”